ZKIZ Archives


$40速剪速賺23萬

2011-7-28  NM




免吹頭、洗頭,十五分鐘「齋剪」 的速剪文化,近年在香港迅速冒起。三十六歲的洪崧(Isaac)曾在龍頭速剪店QB House任管理層,打理十三間店,人工一萬七千元。今年四月,夥拍連鎖文具店老闆陳岳英(四十九歲)自立門戶,在元朗及天水圍開設兩間速剪店15M,兩 人將管理連鎖店及髮型屋經驗套用到鋪頭,營運僅三個月,上月淨賺廿三萬元。Isaac任髮型師二十年,從揸鉸剪改執計算機,決心打造另一個速剪品牌,十五 分鐘內,髮碎速速落地,銀紙亦速速落袋。

上週五四時,位於天水圍銀座商場的髮型屋15M,店內左右兩排座位已經爆滿,客人多是踢着拖鞋的街坊,有人拿着一個個購物袋,有人推着嬰兒車,如診所輪症 般排排坐。15M提供速剪服務,剪頭髮只需十五分鐘。客人進來,先要買飛輪候,到有空位,髮型師會在詢問客人剪髮要求時,在客人面前消毒鉸剪等工具,另外 梳子亦放在消毒櫃內特別處理。由於髮型屋標榜「單剪」服務,不會為客人洗頭及吹頭,所以每個座位有一個特別裝置,髮型師替客人剪完頭髮後,會開動一條吸氣 管,為客人吸走身上的髮碎,再迎接另一位客人。「好快手,趕時間都可以好快搞掂。」街坊黃小姐最欣賞是夠效率,「我啲頭髮好厚,都係十幾分鐘就剪好,效果 都符合到我要求。」

佣金跳bar 多勞多得

「十五分鐘剪一個頭,無咗洗頭同吹頭步驟,客人省咗時間,公司亦省咗成本。」這套速剪運作模式,是Isaac由QB House全盤抄過來,QB House收五十元,他卻以優惠價四十元作招徠,擺明車馬搶客。他指,這種速剪店比傳統髮型屋運作模式簡單得多,首先裝修不用太多設施,「多啲嚟,密啲 手,員工亦唔使不停推銷,個客同個同事都舒服啲。」不過Isaac知道,要剪得快又好,師傅必須要有一定技巧和經驗,因此店長都擁有超過二十年經驗,而且 還會配合各種配件,例如他們引入八百至一千元的魚骨子梳,梳起來暢順又省時。此外,自己任髮型師二十年,Isaac深明行內流弊,「好多髮型師紀律唔好, 今個月覺得搵夠又唔返,識咗個女仔又會突然唔見一個禮拜。」為此,15M設計一套「跳bar佣金制」。髮型師底薪四千元,每月有八天假,連同五百元勤工獎 及放棄四天例假,底薪可增至五千五百元。佣金則以人頭計算,外間髮型屋每個七元,他們為提升髮型師效率,每日平均剪滿五十個客會改計八元,滿六十個是九 元,以結月計算。勤力的髮型師一個月可以賺取近二萬元,比其他髮型屋多三、四千元,留下來的員工,都是希望多勞多得。Isaac負責店鋪營運,包括面試、 管理和入貨等工作,而制定公司政策、行政和會計等,則由經營文具店近二十年的拍檔陳岳英負責,這個佣金制就是由他想出來,陳說:「呢種方法可令髮型師搵多 啲,我哋又賺多咗,係一個雙贏的方法。」

壹點知識速剪文化源自日本

速剪意指不包括洗頭及吹頭的單剪服務,專門店近年在本港愈開愈多。其中在本港擁有最多分店的QB House (Quick Beauty簡寫),於九五年在日本創立,當地擁有分店逾四百間,並擴展至新加坡、馬來西亞及泰國等地。○六年引入本港,至今共有分店二十九間,當中十七 間位於新界,多在地鐵站或商場內。他們的經營理念是客人只須付出五十元,就可在十分鐘內完成快速理髮服務。近年不少人看準這個商機,紛紛在各區開設速剪專 門店。

租商場鋪 劈價三成

陳岳英開設文具店近二十年,目前擁有分店九間,多位於屋邨、屋苑商場,因此他對揀鋪位有一定心得:「最好係商場鋪,仲要係人流多嘅商場,租係貴咗,但如果 個鋪平租但無人流,會守得好辛苦。」選址天水圍銀座店,亦是因為有人流保證,「呢間位置喺超級市場隔籬,我地係sell速剪,啲人行完超級市場一定會經過 我哋鋪頭,停低剪個頭髮都係十幾分鐘,之後就可以返屋企,方便又快捷。」Isaac亦形容,擁有落地玻璃的天水圍鋪,「格局好似做show咁。」有助宣 傳。除了選鋪有技巧,陳岳英稱殺價都有學問:「要揀個又靚又抵租嘅鋪位一定要好似師奶買餸咁,夠膽殺價,一般都講到七、八折。」他表示很多時經紀都會報大 數,有時是以建築面積報大呎數,混淆視聽,令人誤會呎價低,有時又會報大實用面積,所以他們用盡方法了解鋪位呎數:「好似呢間15M(天水圍)咁,佢本來 用板圍住晒睇唔到個鋪,但個鋪係喺超級市場入面間出嚟,我哋咪入超級市場,用手用腳度佢大約有幾多呎囉,咁樣呃唔到我哋,講價都易啲。」不過陳岳英指,很 多發展商都會審核店鋪營運狀況,以及有關行業是否配合商場形象等,為了入商場,他們先在元朗同樂街開地鋪,「要做出一啲成績,發展商才會看到,他們是先看 見後相信。」

靈活盡用鋪位

雖然標榜速剪服務,但元朗店有兩層,為盡用鋪位,陳岳英和Isaac亦加開染髮、電髮、數碼曲髮和負離子等服務,而寬敞的地下鋪位,亦分隔開兩部分,一面 做速剪,另一面則設貨架賣文具精品。陳岳英笑說:「速剪用四個座位已經足夠,剩番啲位唔好嘥,用埋嚟做其他嘢,開拓多咗客源又搵多咗錢囉,哈哈。」 Isaac坦言,元朗鋪人流不及天水圍,幸好有染髮、電髮等其他服務拉上補下,目前電、染髮和剪髮的營業額比例約七比三,加上收費比速剪高,開業三個月, 盈利已達十一萬多。Isaac稱,他們標明不會有任何額外收費,就算是指定髮型師都是一樣,染髮一百,就是一百,「我哋知道好多時髮型屋外面寫住負離子一 百九十八,但客人入到去會變咗四百,因為佢哋會同客講加幾錢效果又會好幾多咁,我唔想客人有種俾人『掠水』嘅感覺。」為減低成本,他們會跳過中間的分銷 商,直接找廠商以批發價入貨。每次入貨量大約用三個月,亦確保新鮮,亦可壓低價錢。

首次創業輸身家

其實今次並非Isaac首次創業,十七歲入行的Isaac,二○○五年加入QB House備受器重,同年底與另一名同事被選中到日本受訓,及後升任營運經理(Operation Manager),管理全港十三間店,薪金大約是一萬七千元。本刊就此向QB House查證,對方不願回應。Isaac認為工字無出頭,又缺乏晉升機會,任職以來,見過有十多二十人抄橋自立門戶,轉眼結業的不少,經營至今的亦大有 人在,自己亦躍躍欲試。○七年八月在港島開設速剪「髮達站」,首三個月一直蝕錢,有股東守不住退股,他要一度離開香港並到積金局宣誓,取出四萬元強積金周 轉。至今「髮達站」已增至三間,累積的經驗亦令他信心大增,決心夥拍陳岳英,向速剪連鎖店之路進發。陳岳英是Isaac女朋友的哥哥,八兄弟姊妹中排第 三,小時候家境清貧讀完小學便出來打工,至三十歲才儲夠錢在澳門大學攻讀工商管理。十九年前在天水圍開設首間文具店千年史,至今分店增至九間。他認為文具 店利潤有限,相信剛起步的速剪服務大有商機。15M兩間分店營運成績理想,Isaac透露,計劃今年分店數目會增至五間,下年會再開五六間,「依家三哥已 經傾緊幾間商場鋪,我哋短期內會一直開鋪,如果QB House係7-11,我希望15M可以成為OK。」

元朗店開業資料(04/11)

租金*:$126,000裝修:$400,000雜費:$40,000總投資:$566,000*兩個月按金,一個月上期

營業資料(06/11)

營業額:$250,000租金:$42,000入貨:#$50,000人工:$40,000雜費:$6,000盈利:$112,000#六月新加其他服務如染髮

天水圍店開業資料(06/11)

租金*:$120,000裝修:$200,000雜費:$2,000總投資:$322,000*兩個月按金,一個月上期

營業資料(06/11)

營業額:$200,000租金:$40,000人工:$40,000雜費:$2,000盈利:$118,000


PermaLink: https://articles.zkiz.com/?id=26604

Next Page

ZKIZ Archives @ 2019