ZKIZ Archives


遊戲展聚焦VR機迷嫌未成熟唔買住

1 : GS(14)@2016-03-18 23:55:57

全球最大型的遊戲界盛事之一,2016遊戲開發者大會(Game Developers Conference,GDC)周三開幕,今年焦點是多個虛擬實境(VR)遊戲產品商,吸引大批機迷排隊試玩。駐三藩市記者:唐芷瑩
GDC到了第30屆,場內盡是VR裝置的天下,針對這些新裝置而設計的遊戲亦鋪天蓋地。洛杉磯遊戲開發商Survios為新推出的的HTC Vive遊戲機研發了專門的電子遊戲「Raw Data」,遊戲大量採用虛擬實境技術,玩家手持的Vive遊戲機手掣,會在模擬器中化身成各種武器,再透過光感器偵測全身動作,就能置身像真度極高的打惡魔場境。
Survios成立於2013年,屬最早開始研發VR的公司,發言人Hunter Kitagawa表示,有信心在眾多開發商中脫穎而出,「我們屬業內的先行者,已累積很多經驗,我們較着重玩家的整套身體動作」。雖然各大品牌的VR裝置吸引不少機迷排隊試玩,但不少人表示購買意慾不高,機迷阿昌與朋友試玩全新的Oculus Rift VR頭戴式顯示器,其間表現興奮,他大讚裝置視角非常廣、實體感強,「找回小時候坐礦車(過山車)的感覺」,雖然試玩感覺良好,但阿昌暫時不會購入,「戴得耐都會頭痛,加上一定要脫眼鏡才戴到(VR裝置),看得不太清楚」。阿昌認為VR裝置目前平均售價約600美元(約4,680港元),仍屬昂貴,加上產品還有缺點,想等產品設計成熟才買。雖然VR是遊戲展主力,會場內亦有其他種類的遊戲,有機迷則為獨立遊戲(Indie Game)而來,機迷馬先生說,「VR裝置較適合到朋友家開派對等場合玩,但個人在家還是追求電玩的內容,多於觀感刺激」。





來源: http://hk.apple.nextmedia.com/international/art/20160318/19535066
PermaLink: https://articles.zkiz.com/?id=298373

劇迷嫌《鬼怪》冇肌睇翻loop孔劉李棟旭爆肌片

1 : GS(14)@2016-12-21 23:42:01

近日唔少煲劇迷陷入咗選擇困難症,事關喺Viu熱播中嘅韓國新劇《鬼怪》中,兩位男主角孔劉同李棟旭各有專長及特色,孔劉扮演長生不死嘅鬼怪,為咗了結生命,幾百年嚟都尋覓佢嘅鬼怪新娘,點知當鬼怪新娘金高恩出現時,活喺世上900幾年嘅孔劉初嚐戀愛嘅滋味,佢為自己是否結束生命而不斷爭執。至於飾演地獄使者嘅李棟旭,失去記憶嘅李棟旭連自己名字都唔知道,佢為咗工作一直都冷漠無情,直到劉仁娜嘅出現,佢終於開始一步一步對劉仁娜產生感情。劇迷對於兩個男角同樣鍾愛,特別係二人喺劇中成日鬥氣鬥嘴鬥法力,真係十足十睇緊情侶耍花槍一樣。不過呢有追開韓劇嘅觀眾可能會奇怪,劇集播出已經六集,點解仲未有韓劇男星指定動作「騷肌」場面?事實上韓國男星拍韓劇一向都好大方,赤裸上身騷肌肉係指定動作,而孔劉同李棟旭亦唔係吝惜嘅人,二人之前拍劇都有騷肌場面,當中孔劉由早年未算好大隻時都有騷過肌,而李棟旭之前拍《鋼鐵人》時仲苦練過一身肌肉。雖然唔少劇迷都話即使孔劉唔除衫,但係佢哋都可以看穿佢件衫,睇到衫下面嘅一身肌肉,不過呢想睇孔劉同李棟旭肌肉好簡單,睇返佢哋舊作就大把有得你睇,當中孔劉身形操到最高峰境界就應該係2013年上映嘅韓片《嫌疑犯》,當時佢因為扮演曾經係朝鮮特殊部隊中嘅成員而操到一身爆肌,喺片中孔劉仲要應付大量動作戲。但係對於女粉絲來講,今年2月喺韓國上映嘅《男與女》就令粉絲睇到「心心眼」,片中孔劉同全度妍有火辣床戲,兩人大演不倫之戀,此片係孔劉首部情慾戲,佢都算好大方,全裸上陣肉搏全度妍,激情場面真係滿足晒女粉絲想睇孔劉Body嘅心意。至於李棟旭身形予人感覺偏瘦,不過其實佢係禾稈冚珍珠,本身成日操弗自己嘅李棟旭,曾喺多齣劇集都有露肉場面,好似《Hotel King》、《鋼鐵人》等都有多次騷肌。兩個都咁正,真係叫人點揀喎。




來源: http://hk.apple.nextmedia.com/entertainment/art/20161221/19872033
PermaLink: https://articles.zkiz.com/?id=319682

Next Page

ZKIZ Archives @ 2019