ZKIZ Archives


【葉鴻輝教守龍】遇着鄭智點算好?英雄輝教守住香港個龍

1 : GS(14)@2017-04-22 10:43:42

■一班流浪隊友都對家榮好好,大家相處融洽



上集講到被譽為「葉鴻輝接班人」嘅謝家榮英甲夢碎,不過足球夢並冇被打碎!回港之後,家榮展開職業足球員之路,加盟理文流浪。家榮大讚流浪隊友好friendly:「好容易就融入到佢哋,流浪啲人都好鼓勵我,對我好好。我有犯錯嘅話,練波時都係鼓勵多。」成熟咗唔少嘅家榮明白到等待係新丁嘅必經階段,「想嘅話當然係場場都想踢,場場都想表現自己,不過冇可能要個教練咁快去信任我囉,始終我係半季插入嚟,只係一個17歲嘅o靚仔,又冇港超經驗,所以目標都係出一場就ok喇。」



■阿輝貴為本地球星,一啲架子都冇,仲同家榮猜番幾腳

■唔知講起咩搞到阿輝笑成咁呢?

對於被封為「葉鴻輝接班人」,家榮開心之餘,都覺得有啲壓力:「一嚟開心先,香港講到龍門嘅話,第一個都會講起葉鴻輝,至於話我係佢嘅接班人,係大家對我嘅實力有一定嘅肯定,但都有壓力,因為唔想畀人覺得係浪得虛名。」家榮能否喺港超闖出一片天仲係未知數,不過大師兄葉鴻輝同佢初次見面就大讚佢夠高大,仲袋錢入佢袋。葉鴻輝話:「做球員最緊要個人謙厚,每個年青球員最開頭一定係後備先,要一步一步嚟,唔好諗住一步登天,慢慢由細球會去到中型班,再去到班霸,唔可以太急。」



■英國番嚟之後,家榮對待足球,比以前更加認真

■家榮希望憑實力去證明自己嘅價值

球場上出名火爆,為人直接唔造作嘅阿輝,仲教家榮點做好關公:「忍一忍,有時無論幾難忍都盡量忍,我唔希望佢會發生鄭智事件,有啲特別嘅嘢就算係事實,一時之間你唔會諗得咁清楚。我作為過來人,覺得凡事無論係事實或者點都好,都要諗清楚,因為未必個個承受到嗰個迴響。」阿輝更寄語家榮要專注喺足球:「我覺得最忌太過高調,因為我哋唔係娛樂圈,唔需要太過靠暴光去?食,?食嗰樣嘢係喺球場表現出嚟。」最後阿輝更希望家榮能夠用表現去證明自己嘅價值,令大家都知道佢就係謝家榮,而非「葉鴻輝接班人」。文、採:植詠珊(Cathy)攝影:Teddy﹑Kaman剪、編、導:Roy



緊貼「蘋果VR」熱潮,打開雙眼隨意門,讓「蘋果VR」陪您探索新世界:https://goo.gl/b5RQAB「蘋果VR」App
App store下載:https://goo.gl/0kW2cK
Google Play下載:https://goo.gl/4K7EHw




來源: http://hk.apple.nextmedia.com/entertainment/art/20170421/19996467
PermaLink: https://articles.zkiz.com/?id=331215

Next Page

ZKIZ Archives @ 2019