| ||||||
開股東會又唔想見傳媒,有上市公司喺冇雷公咁遠搞,有啲就落閘閂門謝絕記者,不過,搞到好似中信泰富(267)咁嚟一招「軟禁」,認真誇張。 話 說噚日中信泰富喺港島香格里拉酒店舉行股東周年大會,唔少記者行家好似華華咁,諗住會後睇吓有冇機會同管理層對話,問吓公司有咩大計,但就俾有關方面請去 另一間房度坐。以前咁嘅情況都出現過,但記者唔想坐可以自我罰企喺出面等,噚日就唔同,記者有入冇出,「軟禁」喺一間連水都冇杯嘅房個幾鐘。 公關:係酒店安排 最後仲上演《羅生門》,記者問酒店方面點解有咁嘅安排,酒店方面話係應中信泰富要求。到中信泰富公關解釋時就話,係酒店安排,同公司無關。 華華記得,前日騰訊(700)喺同一個場地搞股東會,記者可以喺門外等候管理層,唔知點解到咗中信泰富,門外就成為禁區。如果管理層真係唔想見記者,咪預早通知囉。 李華華 |
| ||||||
利豐(494)主席馮國經低調就人人都知,但估唔到為咗避開記者追訪,噚日喺利邦(891)股東會後,使出一招「密室」軟禁,唔畀記者離開股東會會場。 雖然華華同一眾行家衝破障礙,追住馮國經,但說時遲那時快,睇落好大份嘅馮國經,十足魔術師大衛高柏飛一樣,一兩個身影,就喺大庭廣眾下「消失」。 同瑞銀開火 成追問焦點 其實,大家都明白政經界大紅人馮國經貴人事忙,以往都唔會就公司業務呢啲小事回應。不過,上個禮拜因一份報告,佢罕有同瑞銀開拖,咁華華點都要請佢親口講番一兩句,點知結果佢都係唔講,仲連環使出兩項特技。 真係唔只記者對開拖單嘢有興趣,噚日喺股東會上,就有一名股東舉手話,佢有揸利邦,又有揸利豐,好想知瑞銀單嘢會有乜影響。 身兼兩間公司主席嘅馮國經,只係叫股東唔使擔心,因為單嘢對利邦冇影響,但就話唔方便喺利邦個場講利豐嘅嘢。 馮國經「突然消失」,華華交唔到差,好在最後搵到佢千金、利邦執行董事馮詠儀講咗幾句,佢話暫時都會留喺利邦,唔會過去利豐度。咁又啱嘅,利邦手上咁多名牌,當然好玩過利豐啦。 李華華 |