Can Bank：天生我軀必有用
1 :
GS(14)@2017-01-05 07:59:41一年之始，相信唔少人都會訂立新目標，除咗今年搵多啲錢，最緊要就係身體健康。今年炒股心法，相信友欄已有不少建議，所以趁唔少人啱啱放完假，仲有少少holiday mood嘅時候，講吓健身。作為一個經常運動嘅人，好多人問散子，究竟減肥係控制食量重要啲定運動重要啲？只可以講，你對自己情況最清楚，如果成日運動都減唔到肥的話，九成係食方面出現問題；如果根本唔係一個經常運動嘅人，你都知道答案。咁樣剩番一成係啲乜野，可能係身體出現問題，不妨問問醫生。至於做咩運動先可以有效減肥？大家都係都市人，出門有汽車代步，好多時會忘記咗「天生我軀必有用」，其實只要多郁動，咩運動都可以助你達成目標，包括行多啲路。咁樣又引申出要做幾耐運動嘅問題，理論上，頭十至廿分鐘係熱身，20至40分鐘消脂，40分鐘以上係體能鍛練，但你知自己情況，一個唔係成日運動嘅人，突然叫佢做40分鐘運動根本不切實際，只好借用李嘉誠嘅金句，量力而為先係最重要。近期市面吹着一輪健身熱，最多人問嘅問題，搵健身教練究竟有無用？散子只可以好行貨咁講，好視乎個人目標。健身教練會教你健身器材點用，至於用唔用，用到去咩程度完全係個人決定。鄭多燕定鄭秀文，甚至係鄭欣宜都係睇你點用又或者用唔用。至於有無呃人成份，呢個係銷售手法嘅問題，有機會再講。總之有無健身教練都好，最終都係睇個人能否持之以恒，最後，藉着新一年首編稿，祝各位新一年身、心、荷包都健康。散子本欄逢周二刊出
來源:
http://hk.apple.nextmedia.com/financeestate/art/20170103/19884412