📖 ZKIZ Archives

李澤楷踩界巧取SUNDAY

2006-10-12  NM

全城競猜誰是電盈買家的連續劇剛告一段落，財技高手李澤楷又有新招。上週二，SUNDAY（866）發出通告，謂大股東電訊盈科（8）有意以逾十九億元，收購SUNDAY旗下2G及3G等所有資產，更建議自願除牌。 表面看，小小超出手慷慨，向小股東派發每股六毫半現金，較SUNDAY停牌前的股價高出兩成三。但實情是，如此變奏的私有化，SUNDAY小股東只能任人宰割。 上週三，電盈收購SUNDAY所有家當的消息傳出，SUNDAY復牌後，股價單日急升一成九，收報六角三仙。 從事出入口生意的林小姐，當年在科網熱時，趁墟認購了一手SUNDAY。對於電盈主席李澤楷今次出招，她大嘆無選擇餘地：「都無得揀啦！」 小股東聲聲無奈，皆因根據公告，今次電盈會以總代價逾十九億四千萬元，收購SUNDAY旗下所有資產。之後SUNDAY會變成上市空殼，明眼人一看便知，此舉根本就是變相私有化SUNDAY。 如 此刁鑽地私有化，皆因正常做法須獲九成小股東支持，但去年底電盈第一次提出私有化SUNDAY時，曾因小股東反對而遭遇滑鐵盧。今次以資產交易為幌子，只 需過半數小股東支持便成事。如今第二大股東華為（中國電訊設備巨頭）已表態贊成，小股東通過的票數接近一半，散戶根本難以左右大局。 「我未見過有人咁搞法。」一中資證券分析員坦言看不過眼，他舉恒地（12）私有化恒發（97）為例，人家多次失敗，都未嘗走捷徑；電盈捲土重來，卻硬上弓。他說：「咁做同逼啲小股東贊成無分別。」 鑽上市規則漏洞 根據《收購守則》，上市公司若私有化失敗，一年內不得重提有關方案。中大工商管理學院副院長蘇偉文解釋：「此舉原意係防止大股東專登整殘間公司，例如短時間內賣走賺錢嘅嘢，或者荒廢業務，逼小股東就範。」 惟電盈懶理期限，只相隔十個月便變相再提私有化，而且是次承諾派發的現金，與上次遭拒的開價根本無分別，但今回小股東已再無扭轉局勢的希望。 港交所董事David Webb遂於上週三撰文，直斥電盈做法「低手」，兼「無恥地」利用上市條例的漏洞，避開正常的私有化程序。 私有化意在3G 電盈去年中收購SUNDAY時，已表明欲全資擁有該公司，其實就是看中其持有的3G牌照。 尤其電盈年初試推3G服務時，被迫公布向SUNDAY租用網絡的價錢等資料，令它更急於要吞掉SUNDAY。有電訊股分析員表示：「之前有任何關連交易都要通報，浪費好多行政費， 最大問題係比競爭對手知道底細。」 而且將SUNDAY據為己有，電盈的賣點亦即時加強。新世界電訊託管應用發展及銷售總經理袁念祖分析道：「依家固網同IDD嘅生意增長好緩慢，競爭又大，電盈今次合併肯定有好處。起碼固網、流動電話、寬頻同收費電視可以夾埋SUNDAY一齊sell，人手都可以慳多啲。」 事實上，兩公司早已開始一條龍的捆綁式銷售。本週一，記者以電盈固網長期用戶身份，查詢續約固網事宜，職員即謂：「依家續約十八個月，會送埋SUNDAY電話服務，每個月有四百五十分鐘。」如果二百多萬名固網客戶中，有一半肯附加幫襯其他服務，收入已相當和味。 如此銷售，似乎只養肥了電盈。一電訊分析員稱：「電盈係大股東，向SUNDAY租網，你話個價係唔係fair呢？好難講囉！但小股東又冇聲出。」 小小超 金蟬脫殼 由於電盈持有SUNDAY股權近八成，故逾十九億元的交易代價，儼如左袋交右袋，實際動用現金不過四億元。若小股東接納建議，每人派發六毫半；惟瑞信證券認為，若SUNDAY能繼續獨立營運，長遠目標價可達一元一角。 巧取SUNDAY後，電盈將成為全港唯一集合2G、3G、固網、寬頻及數碼電視的巨無霸。有分析員估計，「一心諗住甩身」的李澤楷，加了SUNDAY作嫁妝後，現在只等電盈出閣的時辰到。 新加坡上市的電盈母公司盈拓已擇日，決定下月底召開特別股東大會，投票是否通過將集團手上的兩成三電盈股權，賣予被市場形容為「代客泊車」的梁伯韜。嫁妝加碼後，梁伯韜應有更多本錢，游說投資者入股其財團，為電盈尋找真正的主人。 小小超屢闖灰色地帶

阿澤有心踩界挑電檢

1 : GS(14)@2016-03-17 14:52:53

杜汶澤主演、邱禮濤執導的電影《選老頂》（前名《選老坐》）又再有宣傳片，阿澤在片中解釋為何鍾意拍社團電影：「黑社會電影向來都係我哋香港電影嘅翹楚，黃、賭、毒邊啲題材邊啲過唔到審批，我哋拍邊啲啦。」明顯與內地電檢制度對着幹。的確《選》片內有很多血腥場口，王宗堯更要戴着假陽具招搖地跳下跳下。王宗堯表示戲內洪卓立飾演男同志，有一場浴池戲為方便洪卓立有嘢揸手，所以要戴住這支道具。講到粗口，阿澤就反問：「你要睇番本身個合理性，有乜可能你拍一個黑社會戲係冇粗口？」他還表示黑幫電影好睇的地方，就是睇到人對於權力和慾望的爭鬥，與現今香港政治生態不謀而合。撰文：李森





來源: http://hk.apple.nextmedia.com/entertainment/art/20160317/19532392

---

誰敢來踩界 伍詠薇

1 : GS(14)@2016-06-12 02:55:22

2016-06-01 EW
自從今年亞視執笠，四月新電視台ViuTV加入戰團，香港電視史上起了一場革命。

同樣起革命的，還有現年四十七歲的伍詠薇，去年她與無綫結束二十年的賓主關係，回復自由身，今年不但過檔有線拍攝綜藝節目《伍姑娘真識食》，又到內地拍攝清裝宮廷劇《美人香》賺人仔，脫離無綫，前路反而更廣。

「我好有觀眾緣，我呢一類型都好渴市㗎，無人夠膽做嘅嘢我都敢做，好似吸氧氣嗰幕（○七年香港先生選舉中，戴氧氣罩扮暈），呢一行真係好少我呢啲怪女人，只要邊度畀到創意我，我就去邊度！」

敢怒敢言，勇於起「革命」，這就是伍詠薇。

與山聰破冰

沒有合約束縛，沒有立場顧慮，回復自由身的伍姑娘一身輕，不怕得罪「方丈」，更女俠上身，說訪問可無所不談：「講！乜嘢都講！無事不可對人言，我都無秘密嘅！」

她離開無綫，有指是因為無綫某高層惡言相向，令她反面離場，主動與無綫提前解約。「當時我係去傾一套電視劇，傾得好唔愉快，全世界估係咪有邊個高層得罪咗我，其實估錯晒！我無資格畀人哋得罪我，只係有一個同事，我同佢傾得唔愉快，得到好無禮貌嘅對待，我就決定唔接套劇！」

雖然已離開娘家，但關係依然，近年無綫劇種被網友指毫無新意，但伍姑娘卻大讚《殭》好睇，更提到已「割席」的契細佬陳山聰。

「《殭》我有睇晒，我覺得演員無問題，個組合幾新，片頭陳山聰（做殭屍）抹嘴嗰吓，我買山聰會跑出嚟㗎，之後先到鄭嘉穎。第一眼我已經覺得山聰一定會爆，因為有新鮮感，但睇睇吓發覺個劇本唔係咁連貫，陳山聰咁重要嘅一個反派，應該要同鄭嘉穎有好多打鬥場面。」

以我認識伍姑娘的個性，還以為在戲中看到陳山聰的身影，會馬上熄機，皆因一一年與何超雲拍拖的山聰「玩出禍」，於生日當天致電給她玩絕交，令伍姑娘大感憤怒，隨即取消他的微博關注，並公開與他「割席」，暗指他見利忘義。如今卻對陳山聰演技有讚無彈，難道兩人已經破冰？

「我同佢根本就無嘢，只係一直唔見之嘛，哈哈！講真，我係睇戲（心態）嘅，總之見到山聰出番嚟（拍戲），就知佢發生咩事啦！佢同我就好似殭屍同不死人（指專門殲滅殭屍的不死身）咁，但佢喺《殭》真係做得唔錯，我好公平嘅，一路講山聰我都無口窒窒呀，哈哈！呢個世界係圓嘅，電視台都係得嗰幾個，你一定會遇番嗰啲人，呢啲仇又有乜好記？」

脫韁的野馬

伍姑娘能不記仇，老公練海棠功勞不少。她笑指，老公脾氣好、分析能力高，時常為她中和生活上的苦事。「人哋多數話，夫妻要互相包容，但我唔係，一直都係練海棠包容我， 佢錫我錫到有時袁詠儀都鬧佢 ：『你唔好咁縱你老婆得唔得呀！你當佢女咁縱唔得㗎！』呢個咪我嘅福氣囉！」

筍盤難求，更何況一個好老公？當年因黎姿牽紅線，認識從事廣告業的老公練海棠，猴擒的伍姑娘即時兩眼發光，相識一個月，馬上出招逼婚。

「我係烈女嚟，當年係我溝佢嘅，係我逼佢同我結婚！（九八年）十一月八號黎姿介紹我哋識，我第一眼就覺得佢正呀！十二月，我就同練海棠講我想同佢結婚，佢嚇咗一跳，話點會有女人一嚟就要同人結婚，不如訂婚先？我話好！我哋九九年二月一號就訂婚，仲叫埋我以前個男朋友出嚟做見證，之後我再話咁七月一號結婚啦，我哋嗰日就真係去咗加拿大結婚，前前後後只係八個月左右。」

女人年過三十，恨嫁在所難免，伍姑娘早於廿一歲就經歷第一段婚姻，與相差三十歲的前香港會計師公會會長翁江培結婚，但婚後十三日，前夫因心臟病離世，感受過喪夫之痛，仍無懼再婚，真的不怕掀起情傷？

「我係一匹脫韁嘅野馬，雖然我好癲，但我唔係壞。個天畀咗兩段婚姻我，第一段婚姻係翁先生，我細個好希望有個夢幻嘅婚禮，想行麗晶酒店條雲石樓梯，佢畀咗我；我又想要一個成熟穩重嘅男人，我又搵到喇，多謝個天！ 家仲要畀多一段婚姻我，我好多謝佢（練海棠），嚟緊七月我哋就結婚十七周年喇，估唔到我可以維持咁耐，哈哈！ 」

辣招抗小三

經常秤不離砣的二人，經歷過兩次七年之癢，伍姑娘亦高呼amazing，看來野馬都有被馴服的時候。

「（結婚）頭三年梗係好過癮啦，熱戀吖嘛！團火仲喺度！之後到第五年，啲火已經無咁『冚冚聲』；到第十年，所有浪漫嘢已經做晒， 家我哋就好似坐喺老人院咁，哈哈，講笑咋！之後就開始細水長流，會更加關注佢心靈上嘅需求，當然身體上嘅（需求）都好多啦！哈哈哈！」伍姑娘扯高聲線，高八度笑着說。

老公一表人才，又是廣告界才俊，有索女埋身，實屬等閒事，想必伍姑娘定有「辣招」對付外來「小三」，怎料她只拋下一句：「有女埋身咪埋囉！」

她續說：「點都要畀我認叻先！我承認係有好多仔埋我身，我都好有魅力㗎！佢係有好多女埋身，但天蠍座嘅男人係唔會話畀你聽， 所以我咪舒服囉！

「以前我有好多男朋友，細個直情做埋『緝私隊』，攞晒男朋友啲嘢嚟睇，何止睇手機，睇埋佢食飯啲單添呀！張單得嗰幾嚿水，同我講幾個人食飯？ 逼到佢（前男友）講（真相）為止！但 家人大咗，唔逼喇，好煩啫！做人好似塊鏡咁，你只可以影響對方，唔可以改變佢，有女埋身咪埋囉，只要知道屋企個老婆最重要就得！」

結婚多年，我一直知道她恨有兒女，但奈何未有音訊，她直言已過了想要BB的階段。「啱啱同佢結婚時，狂（做愛）呀！有仔趁嫩生嘛，但生唔出，我十二生肖都追過晒，但有時女人就好似恆生指數咁，差唔多去到三十歲尾後，就覺得有無小朋友都無所謂。

「因為我都仲係一個細路仔，嗰時我問佢：『你介唔介意湊住我呢個細路仔，而我哋係無小朋友？』佢答我OK，我覺得佢好偉大，所以就決定唔要小朋友喇！」

巨星朋友幫

伍姑娘大情大性，在圈中有不少巨星好友，如草蜢、周汶錡等，但講到頭號老友，一定要數袁詠儀和張智霖。

「當年我啱啱完咗亞視份約，出嚟拍電影，就識咗阿靚（袁詠儀）。嗰時佢拍咗《新不了情》，但仲未攞金像獎（最佳女主角），係佢最招積嘅時候。九四年我再同佢拍《姊妹情深》，已經覺得佢好臭寸，事後我問番佢當時點睇我，佢話覺得我『亞視』囉，所以唔想睬我喎，佢個死八婆吖！其實佢同我性格好似，都係咁大情大性、無機心。

「後來佢介紹咗佢個茂利男朋友（張智霖）畀我識，咁啱嗰時我要同Chilam拍套六十集嘅電視劇（《天地男兒》），佢做我細佬，每次見到佢就好想笑，到 家都係！」

伍姑娘還笑指，張智霖在其朋友圈中最為八卦：「佢口頭禪係：『講啲秘密嚟聽吓，唔講我就爆你嘅壞話出去！』不過佢只係純粹八卦，唔會真係爆人秘密。」

照伍姑娘性格，當年看到Chilam這塊「小鮮肉」，應該嗒晒糖，她即笑說︰「初初打算同阿靚鍊過，但最終鍊咗個『老練』（老公練海棠）返嚟，哈哈！ 我同佢兩夫婦應該係十世前嘅親人嚟，呢一世都唔會分開，佢哋係我No.1最好嘅朋友。

「第二位係黃佩霞，我哋同樣都係拍戲識，但講到真係同佢熟絡，係佢生女嗰年，個女嘅爹哋要同佢分開，但佢好成熟，係我心靈同健康上嘅開導者，我唔可以無咗呢位朋友！」

性格爽快，又是義氣仔女，這天訪問一直在笑聲中度過，伍姑娘名副其實是眾人的開心果。

鄭紹康（Francis） 著名公關公司「天機」ＣＥＯ，每年主理超過二百個中港項

目，有「天下第一關」之稱。在公身兼專欄作家、經理人；在私為不少名人、名二

代閨密。藉本刊專欄「紹看風雲」，揭開名二代、名三代不為人知的一面。

文字整理☆蔡安儀 攝影☆蔡豪 場地☆Greenhouse 髮型☆Coren Cheung@HAiR

化妝☆Din [email protected] Cosmetics 服裝☆ITHK 設計☆黎志堅

---

七級偽術：個個踩界，唔通……

1 : GS(14)@2017-10-29 23:38:07

上次借Dove那個踩界廣告，說明知故犯不可恕。事實上，因疑似種族歧視而被炮轟的品牌，又豈止這一個。先不說黑人牙膏那連品牌本身已帶種族歧視之嫌的個案，坦白講，近年最最離譜的，要數內地品牌「俏比」去年那個洗衣球廣告。是咁的，話說在洗衣房，有個黑皮膚男子向華裔女子擠眉弄眼，女子假意落搭，當菲裔男子趨前有所行動，女子一下把他塞進洗衣機裏，洗衣機轟轟轟運作，然後停下來，爬出來的男子已變了名皮膚偏白的華裔小鮮肉，華裔女當下搭晒糖，大概想藉此顯示，用「俏比」，黑都洗得白。廣告一出街輿論嘩然，抨擊此起彼落，「俏比」在最後不得不向非裔人士道歉。幾年前，朱古力品牌吉百利曾一樣因懶幽默，踩過地雷。廣告是這樣的，在只有一排吉百利朱古力的硬照上，有這句標語：Naomi唔該借借，我們已有新女神！黑人超模Naomi一見廣告，立即炮轟，指對方把她和朱古力類比，是徹頭徹尾對她和廣大黑人的侮辱，是種族歧視，一點也不幽默，她只覺受辱和痛心。其他黑人組織加入聲討，最後品牌當然又是抽廣告兼出聲明道歉，至於有否再以其他方式尋求超模和解，就不得而知。其實今年較早前，德國品牌Nivea亦曾誤墮陷阱。在宣傳其美白止汗劑時，不止有White is purity這標語，FB post更加埋引子：Keep it clean, keep bright. don't let anything ruin it……死亡之吻正是大白人主義者爭相「些牙」，甚至有口痕友封之為「白人的官方止汗劑」，下場如何，不用細表。天大地大，創意可以無限，但務必留意禁區。彭瑪莉




來源: https://hk.finance.appledaily.co ... e/20171024/20192360

---