ZKIZ Archives


笑到最後:第一份工應做跟班

1 : GS(14)@2016-08-16 04:53:33

人生其中最大嘅投資,就係工作,或者概括啲講,叫事業。對於九成以上嘅人嚟講,唔返工,就冇收入;冇收入,就冇錢炒股票。所以喺投資版講搵咩工,其實都係一件好合理嘅事。而家大學畢業後嘅暑假,勉強仲算搵工期,都仲會收到一啲畢業生嘅CV。如果未搵到工,其實可以考慮搵一份傍友、跟班(文雅啲叫助理)嘅工,跟老細跟出跟入,對以後做人處世會有好大影響。好多人,特別係求職者嘅父母,都會建議畢業生做大公司。大公司有個特點,就係將工作斬件到每人做一小份,原理同工廠式生產冇分別。喺你嗰個範圍做得幾叻都好,都只係生產線嘅其中一員。公司在商言商,只會諗點樣較易管理員工,就係令員工冇咁多技能,專門做一小部份,即使有日劈炮唔撈,搵人取代都冇咁難。但社會變得太快,工廠式流程喺今日呢一刻仍然有用,過多一排唔知會唔會有新科技取代晒成個流程。如果你入大公司,只係被訓練做工廠女工嘅一部份,到有一日成個流程被淘汰,到時好難追得番個社會。第一份工揀嘅公司,公司越細,一個人要處理嘅事越多,會越學得多嘢。如果細到你只係要服侍一個老細,服務範圍除咗營運嘅工作以外,仲要睇老細眉頭眼額、跟出跟入、斟茶遞水,雖然睇落冇尊嚴,但對待人接物同解決問題嘅能力會大幅提升。最近高明與同事傾起,發覺有做過跟班嘅行家,一般做嘢會比較細心,因為做跟班時同老細一對一,稍有不妥,自然有人嘈到拆天。畢業做跟班嘅另一優勢係,自我、自尊都唔係咁重要,對事物未有概念,俾人「糟質」都冇咁大屈辱。當然,壞處係,一打工就做跟班,沾上擦鞋惡習,不務正業,第日如果成為管理層,就會成為一個擦掂一對鞋就出嚟蝦蝦霸霸嘅人。打工有糧出,因為你幫人解決咗問題。而老細係最麻煩嘅生物,跟住佢就會解決最麻煩嘅問題,同時亦都提供學最多嘢嘅機會。高明
http://fb.com/bigricetea本欄逢周一刊出




來源: http://hk.apple.nextmedia.com/financeestate/art/20160815/19736105
PermaLink: https://articles.zkiz.com/?id=305898

Next Page

ZKIZ Archives @ 2019