ZKIZ Archives


大佬要做好份工自己跟做打工妹煲呔妹想渣打入籍中國 李華華


2010-03-09  AD





 

渣打上個禮拜公佈亮麗嘅業績,股價連升四日重上二百蚊。佢哋大中華區主席曾璟璇接受內地報章專訪時話:「其實我依然是一個打工者,只是運氣比較好一點罷了。」曾璟璇話自己係「打工妹」,跟佢哥哥煲呔曾嗰句「我會做好呢份工」同出一轍。兩個果然係一家人!

「女性感性 更能體會客戶感受」

渣打舊年純利創新高,當中90%嚟自中國、印度等亞洲國家,身為大中華區主席的煲呔妹功不可沒,煲呔妹好謙虛話自己冇乜管理秘訣,可能係關佢做事方式事。

佢話,「女性比較感性,能夠更好地體會同事和客戶感受。我非常佩服惠普的前任CEO卡莉.菲奧裏納,她的身上有一種堅毅的精神,這種堅毅很多男性都做不到!如果你要做大事,則很需要這點」。

2005年曾璟璇接任渣打中國一姐嘅高職。佢話07年嗰陣,輿論對外資銀行搶佔市場的擔心不絕於耳,「那時大家不停地說外資銀行進來了,就是披着羊皮的狼來了。」但佢認為,中資銀行有外資銀行不能比擬嘅競爭優勢。

佢仲話,自己o依家最希望就係渣打銀行將外資標籤拎開,變身成為中國嘅銀行一分子,跟住努力扮好小銀行嘅小角色,做好本職工作。

但問題係,渣打堂堂正正外資行,大股東仲係新加坡政府控制嘅淡馬錫,要成為中國嘅銀行一分子,煲呔妹係唔係要問過李光耀先呢?

馬仔亨第二份兼職做藍籌董事

因為健康理由退出官場嘅馬時亨,除咗由「肥馬」成功瘦身做「健康馬」之外,仲繼續活躍於金融市場。噚日正式榮升為恒指成份股嘅華潤置地(1109),趁住大市上升,股價都飆高咗超過1個巴仙,潤地噚晚仲公佈,公司羅致咗馬仔亨,做佢哋嘅非執行董事。

華華記得,自從電盈年代擔任過藍籌股董事後,呢次睇怕都係健康馬第二次再做blue blood企業嘅董事啦。公佈指,舊年度佢老哥嘅董事袍金係12萬銀。

潤地呢份工已經喺馬仔亨年前,以患病為由,辭去商務及經濟發展局局長後,第二份金融界非執董工作,最轟動嗰鋪當然係舊年底宣佈加盟中策(235),出任非執董兼主席一役,拍住恒生銀行(011)前大班柯清輝收購南山人壽。不過,單刁仲等緊台灣監管機構審批。

瑞士名錶香江大陸豪客

內 地豪客炒起香港豪宅,連名錶市場都多得佢地唔少!賣成五萬至過百萬銀嘅貴價名錶,亦一早將目標由原本嘅美國客轉向內地客埋手。名錶代理商冠亞商業 (104)執行董事區肇良話,金融海嘯之後,全球貴錶生產基地瑞士嘅最大出口市場,已經由美國改咗做香港,舊年香港出口市場就佔24%;美國得8%;中國 都有7%。香港入口嘅名錶,最終消費者都係內地客,但點解唔直接入口中國?香港咪就係贏在關稅低囉!

李華華

[email protected]



PermaLink: https://articles.zkiz.com/?id=14627

Next Page

ZKIZ Archives @ 2019