上個星期三跑夜馬，第二場認真邪門。呢場跑第四班馬跑千二米，左丁山早先刨馬，再參考不同評馬專家貼士，加上跑馬前一日在太子大廈近文華酒店撞到「好香港」馬主袁仕傑，同佢握個手，呢場「好香港」成為頂頭大熱門，只得2.2倍，於是搵呢隻馬做膽買三重彩，拖「樂融融」、「萬事盛」、「喜發龍」與「海之宏」，曾經考慮過「中國天使」嘅，老婆話中國有太空船上天，太空人有位王小姐，仲唔係「中國天使」，應該拖埋，甚至做馬膽，左丁山話邊度拖得咁多隻吖，此馬第一次在快活谷出賽雖則試閘跑第一，冇咁快贏得啩？老婆反駁：「近來跑馬好講巧合，譬如林鄭月娥頒獎嘅『家在香港盃』，就俾第一個走頭遷冊，不以香港為家嘅怡和集團馬『怡勝』贏咗，諷刺到極。十八區盃由十八區主席陳振彬頒獎，就由陳振彬隻『傳奇快車』爆冷贏咗，自己頒獎俾自己，父親節跑馬就有田北俊父女捧盃（盈威勇士），又有凌釗城、凌基偉父子捧盃（綽力之城），我話中國天使贏得，你唔好唔信呀！」
偏偏就係唔信，女人賭馬喜歡意頭、巧合，何來專業刨馬精神呀。點知第二場開跑冇幾耐，鄭雨滇騎樂融融一路領前，中段去到觀眾席對面直路，突然馬失前蹄，鄭雨滇撻落馬，其後嘅「海之宏」（賴維銘）、「喜發龍」（安國倫）、「萬事盛」（何澤堯）及「好香港」猝不及防，連環碰撞墮馬，「中國天使」跟上來輕易取勝，左丁山頭馬唔見中，落注五匹馬居然就係五匹發生意外嘅馬，賭馬黑運黑成咁，今季大概要戒一戒咯，買五匹中五匹，全部墮馬，你話幾難中呢！
左丁山目瞪口呆，無話可說之餘，旁邊有位馬迷講：「閉，七一將至，意頭唔好，『樂融融』變咗攬住死，『好香港』變成癱香港，『萬事盛』就係諸事不順，『喜發龍』就係淺水龍啦。香港人冇快樂，事事碰著黑，發唔到圍，香港邊度會好呀！」好，好呀，有「中國天使」吖嘛，即刻俾馬迷Ｈ女士鬧：「因住俾人鬧你係中國膠！」乜嘢係中國膠，唔係幾識，好似謝志峰俾人罵過係大中華膠，究竟膠從何來，吾所不知也。膠咪膠囉，只有目光如豆之人先至願意攬住一世香港膠嘅啫！ 