財經評論：人幣入籃純粹貼金
1 :
GS(14)@2016-08-09 07:07:30自去年8月11日起，人行放棄行政手段干預人幣，滙率遂邁向自由浮動，貶值咗差唔多成4%，目的是要符合加入國際貨幣基金組織（IMF）特別提款權（SDR）組成貨幣之要求，其實，SDR是否值得人行如此冒險？
SDR並非貨幣，而是一種「潛在提款權」，就好似信用卡的credit limit，你有權喺爆額之前使錢及提錢（不過之後當然要還）；而擁有SDR嘅IMF成員國，你就有權向其他Buddy國借錢。而SDR籃子加咗人幣之後，對於SDR兌美元嘅價格有影響。不過唔代表啲國家會將手上嘅SDR換成為人幣，而即使人幣權重由0%到今年10月開始升至11%，實際上唔代表國家會爭相買入人幣資產。以英鎊及歐元為例，2010年12月IMF提升兩種貨幣的SDR權重，當時兩隻貨幣分別佔全球官方外滙儲備3.9%及26%。一年過後，即係2011年12月，外滙儲備比例都有所縮減，收縮至分別佔3.8%及24.7%，可以證明入SDR唔一定喜氣洋洋。
IMF亦無規定話所有成員國嘅儲備比例要同SDR一致，同埋如果人幣國際間使用率低，例如SWIFT公佈利用人幣作為支付貨幣嘅比例不足2%，可投資嘅人幣資產不多，資本賬開放政策又舉旗不定，有沒有國家會忽然將儲備10%買入人幣資產？無乜可能。咁點解人行仍然會甘願放棄行政手段干預人幣，而加入短期效益唔多嘅SDR？查實因為加入SDR無乜短期效益啫，長期都有啲用處。同樣以歐元為例，由2005年開始，歐元喺SDR嘅權重增加近8個百分點，佔全球儲備就增加咗4個百分點，都叫好過無。正如聯儲局前主席伯南克所講，IMF而家貼咗個星星貼紙喺人幣。呢個貼紙，好多國家唔會care，但習主席一直希望國際認同中國，想「中國崛起」，又想發「中國夢」，SDR呢啲洋氣十足嘅標記，絕對係多多益善。記者：周家誠
來源:
http://hk.apple.nextmedia.com/financeestate/art/20160808/19726791