ZKIZ Archives


智取大市:負唔負利率得起

1 : GS(14)@2016-09-13 00:17:36

上周五日頭港股急升,夜晚美股急插,恒指黑期跌538點,突然由極度亢奮去到恐慌,星期一大幅裂口低開之後,唔排除人踩人。恒指周線圖RSI嚴重超買,上周五9周RSI升到81,同舊年4月12日、即係大時代最juicy升勢過後嘅嚴重超買狀況差唔多,呢種超買水平反映最強升勢已過。至於係玩完?定只係超買調整,仲有下一轉急升?個人感覺偏向會再升,不過,唔使太快下定論,至少睇吓星期一裂口低開後收陽燭定陰燭,同埋留意吓跌市期間嘅重點消息。坊間分析今次跌市因美國聯儲局官員齊呼加息,同樣值得留意債息抽升,當然兩者有直接關係。10年期美債孳息率創3個月高,德國10年期國債孳息率亦重返正數,債息長期負數預期一旦被打破,股市跌到反艇都正常。之前市場覺得歐洲負利率能夠持續,又睇死美國唔加息,但聯儲局官員對於息口睇法急轉,似乎打擊通脹同時,想設法防止負利率預期蔓延。你睇尚譽劏房賣二萬幾蚊一呎就知,只要勉強計到年回報3厘,都俾投資者搶到飛起。如果負利率預期發酵?會唔會兩厘回報都當係寶?係就可以非常可怕,咁嘅情況下港股會點?未必冇份癲。晉佳
http://www.fb.com/advanceguy1本欄逢周一、三、五刊出




來源: http://hk.apple.nextmedia.com/financeestate/art/20160912/19767823
PermaLink: https://articles.zkiz.com/?id=308725

Next Page

ZKIZ Archives @ 2019