ZKIZ Archives


四叔飛起名醫謝德富

2012-8-2  NM




醞釀多年的私家醫院地皮上週五截標,原本戰情最激烈的黃竹坑地皮,只有三個財團入標,當中兩個更是來自新加坡及印度的過江龍,本地幫只有香港大學獨力支撐,反應極之冷淡。

原本一直高調表示會競投的仁安醫院,臨時縮沙,負責向該院獻計及撰寫建議書的富豪名醫謝德富,在截標前一日還信心十足向本刊表明會「去馬」,可惜最後仁安陣前脫腳,當時身在南寧的謝德富也是在本刊通知下才知悉被玩了一鋪,酸溜溜地說:「喺大鱷魚潭裡面,我哋只係o靚,今次只係可以當學嘢!」

一個星期前,六十八歲的心臟科名醫謝德富,在他創辦的中建大廈八一三醫務中心接受本刊訪問,當時他信心十足,表明已經與仁安醫院取得共識,夾份競投黃竹坑醫院地皮,而且有關計劃書亦已交給仁安的董事,亦即恆地主席李兆基過目。

他自言與李兆基相識多年,「當年佢會親自上嚟診所睇病,唔使帶保鑣,不過佢做咗千億富豪之後,就好少上嚟,但身體有咩唔舒服,或者頭痛傷風等,都會打電話俾我問嚇意見。」他還說︰「我哋呢啲係personal service,診金唔會收得特別貴,一般人診金五百至一千,富豪收二千。」

私人御醫俾意見

除了他之外,八一三醫務中心的家庭專科醫生許君恕,亦是李兆基的私人醫生。謝說:「許醫生識咗李先生仲耐,佢爸爸許達三都係做地產,係本港早期地產商,今次投地,李先生都有問嚇許醫生意見,搵埋我哋八一三成班醫生一齊做。」及至上週四,亦即投標截止前一日,他進一步向本刊透露投標大計,具體提到新醫院的股份分佈,指四叔個人會佔大股,約佔七成,其他則由他們八一三醫務中心的醫生分攤,整個項目投資金額達三十億。「有人話塊地對面個斜坡影響發展,又話將來港鐵南港島線喺地底行過時,會影響醫院的儀器運作,我哋搵人睇過曬,都發覺冇問題。」他說。當時雖然已有消息指新加坡及印度財團會入標,但他仍信心十足:「咁就要睇嚇振英哥(即特首梁振英)點決定啦,睇嚇佢鍾意港人港地,定係要有多啲競爭,係咪想引入海外投資者健康啲……」

管理醫院好容易

一心以為若果投地成功便能成為院長的他,還一副志在必得的口脗說:「我覺得管理一間醫院根本好容易,好多人話香港唔夠醫生,點會唔夠呀?唔夠係個班cheap labour醫生,有經驗嘅點會冇呀,香港醫生夠,仲有一萬個中醫睇傷風咳啦,我哋就算做到退休,都可以再幫手繼續做,你睇范上達(港大前外科部主管,本港換肝之父)同黎嘉能(港大前內科主管,腎科醫生,孫明揚主診醫生),退休後都繼續做啦。」不過,謝氏這番豪情壯志,都因為仁安的退出而徹底粉碎。上週五,醫院地皮截止投標,據瞭解,李兆基是在該天早上最後拍板,決定不以仁安名義投標。仁安醫院亦在該天傍晚發出聲明,指由於建築成本太高,而黃竹坑用地又偏遠兼有斜坡問題,所以沒有參與投標。當時身在廣西南寧的謝德富原來一點也不知情,直到記者致電給他,他顯得十分愕然。記:你知唔知仁安冇投標呀?謝:嚇?最後冇落標咩……仁安唔投,咁即係無我哋份!記:係呀,點解你最初同我講,話一定會落標,仲話會一定去投?謝:我上星期一交曬功課俾仁安,finalize曬所有嘢,我同四叔佢哋開過一次會,做完份報告就交俾四叔。記:四叔佢哋冇話你知最後唔投標咩?謝:佢哋好高層次,冇就真係冇o架啦,我哋係minority,佢哋係一切……謝其後還拋下一句︰「喺大鱷魚潭裡面,我哋只係o靚;,就算俾人玩,今次只可以當學嘢,可以點介意?!」滿是酸溜溜。事實上,除了仁安外,不少本來高調表明會競投黃竹坑地皮的醫療集團都紛紛縮沙,目前已知入標的財團只有三個,包括印度富斯集團(Fortis Healthcare)、新加坡萊佛士集團(Raffles Medical Group)以及香港大學。

傳李兆基另起爐灶

香港大學直言是夥拍財團一起競投,但卻拒絕透露其背後財團身份,坊間甚至有傳言指,背後支持港大入標的財團,正是李兆基,消息人士說:「四叔其實對發展醫院好有興趣,想喺港島有多間醫院,問題係如果以仁安支旗入標,用番仁安原班人馬,未必夠班打入港島去同港安或者養和嘅醫生競爭,所以支持港大其實好正常。」仁安醫院於九四年落成,初期一直蝕本,後來仁安向政府申請將醫院停車場改變用途發展住宅補貼醫院,興建豪宅名家匯,套現約三十億。本週一,記者向港大查詢李兆基是否就是幕後財團,發言人以保密協議為由拒絕回覆,「現在不能comment,到適當時候,如果大家有共識先可以公佈。」記者再向食物及衞生局局長高永文查詢,他說:「我唔知道,答唔到你。」恆地公關部則在截稿前未有回應。對於坊間的傳聞,謝德富知悉後十分勞氣:「如果佢(李兆基)撇甩咗我哋去投標,我覺得唔應該!」

零雙非嚇窒財團

早在兩年前,政府落實推出黃竹坑地皮招標,當時本港醫院擠滿雙非嬰,內地人蜂擁到本港求診治病,不少財團以為醫院是門必賺生意;不過,梁振英政府上場,各財團擔心政策朝令夕改,紛紛縮沙。新世界集團便是因為零雙非理由縮沙,非執行董事鄭家成近日更曾私下向人說這個項目「五年內都好難賺到錢」。本來有意支持中文大學的查濟民家族旗下的香港興業集團,一直想發展私家醫院,更希望藉此大賺雙非錢,不過自從梁振英宣佈零雙非後,查家對興建私院的慾望即時冷卻,而缺乏大水喉的中大,唯有退出投地。另外,曾表示會投資三十億投地的亞洲金融集團總裁陳智思說:「政府今次招標條件實在幾辣,要有三成病床要套餐收費,條數計不出來。」最後決定退出。無獨有偶,查家的查史美倫和陳智思都是行政會議成員。

入標三大財團

業界預計,印度的富斯醫療是唯一可與港大拗手瓜的對手。私家醫院聯會主席劉國霖表示,醫療保險是其殺食招,「佢哋收購咗卓健醫療集團,而卓健本身有好多醫保套餐,同好多保險公司都有合作,可以一條龍做埋保險,就算未來新醫院唔能夠即時賺到錢,保險都可以cover,就好似英國Bupa咁,搞醫院又搞保險。香港成日話搞醫保,呢方面富斯會有較多經驗。」

PermaLink: https://articles.zkiz.com/?id=35635

Next Page

ZKIZ Archives @ 2019