ZKIZ Archives


林卓廷入議會 誓查廉政風暴

1 : GS(14)@2016-09-09 05:20:07

■林卓廷接受本報專訪時表示,必追究梁振英收UGL巨款事件。黎樹雄攝



【立會選戰2016】【本報訊】提起新當選的民主黨立法會議員林卓廷,不少人會聯想反圍標、廉政風暴,這名曾任廉署調查主任的立法會新丁希望,將執法盤問技巧及熟悉政府及紀律部隊運作的優勢,在議會內發揮力量,追究特首梁振英收取UGL5,000萬元及廉政風暴,捍衞香港廉潔,「香港已經冇民主,如果連廉潔都冇埋,香港就玩完」。記者:謝明明



林卓廷接受本報訪問時稱,相信他是立法會首位具執法經驗的議員,直言廉署擔任調查主任3年的經驗及訓練,有助其鑑貌辨色、聆聽及分析力,令他熟悉政府文化及程序,尤其是紀律部隊,希望有助在議會上發揮力量,「可以利用我嘅盤問技巧追問政府官員」。提及加入立法會首要工作,林不假思索地說:「當然係追究梁振英收UGL5,000萬同廉政風暴。」他指出,作為特首竟可以「秘撈」,收私人公司利益提供顧問意見,「你唔可以話收咗錢但冇畀意見就冇問題,人哋私人公司點解要畀咁多錢你?係因為你係特首身份,咁點會冇問題?」另一工作重點是追查廉政風暴,阻止梁振英及廉政專員白韞六「黑手」繼續侵蝕廉署,「我會要求立法會成立專責小組追查廉署事件,香港已經冇民主,如果連廉潔都冇埋,香港就玩完」。他透露,白韞六剛邀請新一屆立法會議員會面,他會答應出席,趁機要求白交代廉政風暴。



舊同袍支持揭真相


被追問會否擔心成為廉署剋星,遭舊同袍埋怨,廉署出身的林斷言不會,「好多廉署舊同袍反而鼓勵我要講多啲同問多啲,因為廉署內部唔能夠發聲,以維護部門聲譽,但時代唔同,而家要立刻清理污點,如果清理唔到,就要爆佢出嚟,阻止污點擴散侵蝕」。他又承認,2014年成立全港業主反貪腐反圍標大聯盟,建立反惡勢力形象,於今屆立法會選舉得近4萬票的他稱,在多個曾獲其協助過的屋邨及屋苑,他獲得高票,「呢幾日謝票,唔少街坊同我講要喺立法會內繼續打擊貪污、大廈圍標同水貨問題」。至於港獨問題,林卓廷坦言不支持港獨,「現實(港獨)亦不可行」,但他會關注本土問題,「本土係以同生同長嘅香港人利益福祉行先,並非排外,同港獨唔同」。但他相信與有港獨背景的其他立法會議員在共同議題上仍有合作空間。




來源: http://hk.apple.nextmedia.com/news/art/20160909/19765155
PermaLink: https://articles.zkiz.com/?id=308275

Next Page

ZKIZ Archives @ 2019