九年前呢個時候，肥仔Ｋ到倫敦讀碩士學位，因學校窮，宿位不足，叫國際學生自己去搵地方住，一搵就大吃一驚，近大學嘅兩房住宅單位每星期交租四百五十鎊，與三位同學一齊分擔都係好貴，況且一間房容不下兩張床，後來搵吓搵吓，卒之由租務經紀介紹，搵到一間私營外國學生宿舍住宅，一間大套房（可擺兩張床）收月租一千鎊，兩人均分。肥仔Ｋ問租務代理（白人）：「倫敦市區租金咁貴，你住在那裏？」代理話：「我地邊有錢住在市區，我每日坐一個半鐘頭火車返工，住宅離開倫敦幾遠！」
肥仔Ｋ去完倫敦就去咗東京，住在大學國際學生宿舍，距離椿山莊四季酒店不遠，直情係豪宅區，點解學校咁有錢？原來係有一個大富豪捐出土地起學生宿舍嘅，宿舍地皮直情價值連城，宿舍內亦有日本大學本科生，啲本科生話佢地多數來自其他城市，如果係「東京人」，其實全部住在個幾兩個鐘頭火車單程之外嘅地方，離東京市中心甚遠。事實上，大部份在丸之內、有樂町、日本橋返工嘅日本白領，日日係火車常客。
點解講呢啲事實？「蘋果日報」（七月二十五日）報導90後青年怕生活被規劃，講：「係咪有錢就住中環？」答案簡單到極，如果你現在不是住在中環或家在中環數十年，想搬到中環住真係要有錢至得，住中環蘇豪區劏房都零舍貴過人。如果今天之90後想話以後一直在市區居住，除非住在父母屋企，不願離家獨立，否則又係幾艱難，要拼命搵錢，勤力工作先至得。試問一問，倫敦、東京之年青人為甚麼負擔不起住在Russell Square或新宿，而要每日搭90分鐘火車返市區上班，相當於住在常平到中環返工？年青人獨立後，係要住在市區，志氣可嘉，但不可不認清事實與現實，將來大部份年青人都係要住在新界或大嶼山填海區，反對發展新界區，全部人都要擠在中環、油尖旺嘅話，市區樓價一定上升到一般人不可負擔嘅水平，遠超年青人之收入，一如倫敦、東京。 