ZKIZ Archives


中環行蠱惑:「街佬」冇得撈 轉型唔易

1 : GS(14)@2011-11-14 23:02:25

http://hk.apple.nextmedia.com/te ... 104&art_id=15798778
區選落幕,成敗得失就留畀啲政治評論員、政黨人士去馬後炮,細莊比較好奇嘅係落選人士、特別係全職從政者,點樣面對加入失業大軍嘅問題。細莊老友 W,現職人力資源公司,以前係區議員,由佢講從政者辛酸,份外到肉。

諗住選立會仲大鑊

W同細莊講,一般較新、較年輕者,思考出路何去何從比較容易,通常都係搵份工再諗是否繼續投資時間做地區工作或者索性唔玩;最麻煩都係做咗幾十年嗰啲「街佬」,轉型唔易,又因為做慣議員,俾人招呼慣而放唔低身段, W面對呢類「求助」個案,都會同佢哋做個幾有趣同徹底嘅「自我認知」分析。
呢個分析主要係要呢班人面對現實,先搞清楚自身經濟實力,例如:有冇物業、要唔要供樓、有冇其他收入或賺錢能力、老婆有冇工作養唔養得起頭家、有冇「課外活動」同停止參加「課外活動」有冇手尾跟等。所以,好似啲本身係專業人士又開餐廳嘅,當然可以繼續發政治夢又照樣參加「課外活動」。又或者好似啲有好多抗爭平台嘅政客,一年到晚都有藉口籌款嘅「富貴草根」,亦當然生活冇問題啦。
W又繼續講,佢話最大鑊係明年仲諗住選立法會嘅朋友。成世人都係想入立法會,但選一次就起碼要成球嘢。朋友係冇乜家底兼要照顧一堆失業黨友,即使有人介紹佢去做雜誌、傳媒亦幫補唔到幾多,人去茶凉又未必再有「一筆過撥款」, W好擔心佢下年參選要按咗層樓,再輸就成為真正嘅無產階級,被迫同地產霸權抗戰到底。
逢周一刊出
PermaLink: https://articles.zkiz.com/?id=276581

Next Page

ZKIZ Archives @ 2019