ZKIZ Archives


「一蟹論」係冇Q用的 人在中環

http://manincentral.blogspot.hk/2013/05/q.html
今朝在免費報既文章出街後,有朋友問我:「CK,你以前係咪受過好多老鬼嘅氣,所以寫埋啲咁嘅嘢呀?」

受前輩老鬼既氣, 每個出嚟社會做嘢嘅年輕人,或多或少都總會曾經試過。呢亭經驗,你我他其實都有,我大概都唔算係特別多掛。然而我寫呢篇文章既時候,我剛剛為公司既其中一位做咗近兩年既同事,簽咗一份入息證明。呢份證明,同事係準備用嚟申請公屋的。

同我一齊工作既同事們,絕大部份都係後生仔女。八十後、九十後,我幾乎每日都同佢地近距離相處。佢地係咪真係坊間所批評得咁冇用?我只能咁講,響呢班年輕人裡面,偶然的確會俾你撞到一個半個來自火星既騎呢怪,不過平心而論,佢地絕大部份,其實還是很正常,工作亦唔見得有咩大問題的。八、九十後響我公司所佔既「人口」比例高達八成以上,假如佢地真係好似外邊啲人講到唔掂成咁,我間公司仔怕且早就關門大吉了,豈還可以捱到今時今日?

好些像我呢亭多口嘅老鬼,有時也搞不清係真心自大,還是係內心其實係冇乜自信,然後透過踩班後生既幾腳,去獲取那份卑微既自尊心。當面對班後生仔既時候,總係喜歡擺出一副「我比你優秀」既姿態,向住後輩指指點點。我初出道既時候,有些口臭既前輩望住我地,也總喜歡拋出一句「一蟹不如一蟹」去為我們贈慶,說話總喜歡單單打打,然之後,話自己當年幾咁肯捱肯學,唔似我呢亭後生仔咁身驕肉貴,俾阿爸阿媽自細縱壞。

今日既我只係一個公司仔既老闆,公司絕大部份既日常運作,我都唔係自己落手落腳做,而係依靠我既一班八、九十後同事。然而以前那些前輩時常會向我講既「一蟹論」,是否真實,是否有其道理,對我嚟講,其實都已經係冇意義了。生意人所重視既係「結果」,而我需要既結果係,我班同事可以認認真真,落力地去為我公司工作。因為我有自身既經驗同感受可以借鏡,那些跟「一蟹論」類似既說話,我百份之二百可以肯定,對於激勵一班年輕既同事,係絕對冇Q用的。唔好講話後生仔女,即使係一個老鬼如我,你對上一次覺得自己被人motivated到,覺得需要的起心肝做人,係因為啲乜嘢?怕且都唔係因為,有個前輩單打你,話你呢個後生仔,有幾唔及佢自己當年有幾勁掛?

有關motivation既方法,有好多既。唔同既人有唔同既方法,不過being motivated係一種發自內心既感受,要touch到人既心,大部份既時間,軟工都比硬工來得有效千百倍。老鬼們如果真係有心幫下班後生,學佢地話齋,真係想「塞錢入佢地個袋」咁偉大既話,也許真係要重新思考一下,你用開個方法,其實係咪已經過時。你不斷將「一蟹論」既重點,重覆又重覆去同班後生仔女講,除咗你自己feel good,等你自己可以飄飄然之外,查實,係真係完全冇Q用的。

時代唔同了。今日既後生仔,所遇到既困局,大概係我地呢亭老鬼,從來都未感受過的。我地當年既起點,也許比佢地低一點,但係我地所身處既年代,還能夠睇得見多一點曙光,多一點希望。政府也沒有現在般讓人沮喪。然而今日既後生仔,起點也許比我地當年好一點點吧,但卻要面對一個少一點曙光,少一點希望既生存環境;講真,其實也唔容易捱吧。我當然仍然會勸佢地要自強起來,否則自暴自棄老是埋怨既話也只會係死路一條,但我地呢班so called叫做「上咗位」既老鬼,也係時候要學識,乜嘢叫做「體諒」吧。
PermaLink: https://articles.zkiz.com/?id=56203

Next Page

ZKIZ Archives @ 2019