自爆睇舖直落 蔚雨芯視察樓盤
1 :
GS(14)@2017-08-18 08:00:45■蔚雨芯噚日着牛仔褸又冇化妝，睇樓盤嗰陣仍然被認出。讀者提供圖片
【爆相爆片】擁32D上圍嘅「魔鬼胸」蔚雨芯（Rainky），舊年簽約吳奇隆旗下公司，返咗內地發展咗一段時間，最近轉移陣地返香港，接拍劇集、兩部電影同美容院代言人等，亦加入華星冰室做市場經理，瓣數多多。大前日《蘋果》讀者洪先生透過「爆相爆片」，話見到Rainky去咗睇荃灣新盤荃城匯，佢當日素顏現身，着住一件牛仔褸包到實，pure又清純。洪先生話：「今日大約4點45分左右，見佢同一個男人一齊去睇樓，另外仲有兩名地產男代理，佢去睇完示範單位，再去咗模型區，睇咗足足5分鐘，好似幾有興趣。」其間亦有人認得佢，仲話：「Rainky Wai？正喎！」
■「魔鬼胸」蔚雨芯除咗幕前，仲做埋市場經理。資料圖片
鍾意三房
馮仁昭問Rainky係咪買樓？佢話只係去參考吓，自言未有能力上車：「我陪經理人去睇咋，嗰朝我哋仲去埋睇舖，因為有份投資嘅華星冰室想開分店，我哋去完元朗、大埔，咪順便睇埋荃灣樓囉，經理人同太太都好想買，我去參考吓。」Rainky坦言90後置業好難，自己好鍾意三房間隔：「人人目標都係買樓啦，其實首次置業首期好吸引，但自己未敢供住，仲要搏命啲。」
來源:
http://hk.apple.nextmedia.com/entertainment/art/20170818/20124542