ZKIZ Archives


湯文亮﹕落標要避免被人「食叉燒」

1 : GS(14)@2016-09-09 04:39:27

【明報專訊】有老友想落標買地,到最後階段,已經大致訂出了什麼價,口多問我出價是否正確?我見到標價之後,問老友是否真的有心買地,還是炫耀一下?

老友話真心有意買地,我話他的出價有問題,很容易畀人食叉燒,老友話唔明白,我問佢識唔識得賭百家樂,知道百家樂有一個情况莊是可以即贏閒,做莊的人當然很開心,做閒唔使講,連博都冇得博,當然唔開心。

老友打算出價10億投地,佢老婆話唔使咁多,減1000萬畀佢買首飾,於是落標價是9.9億元,我同老友講,這個是畀人食叉燒價,有人出10億就會食叉燒,應該出10億多少少,如果有人出10億,就可以食別人叉燒,相當好味。

落錯標價或買貴地

老友同意,不過,在落標時佢老婆唔准,於是又改回9.9億元,最後老友奪標,老友老婆設宴招待,第一味就是西班牙黑毛豬叉燒,對我來說,是帶有耀武揚威味道,本來我還有嘢想講,但見到老友兩公婆咁開心,無謂潑冷水,費事他們買得唔開心,瞓都瞓唔着。

本來我想話畀他們知道有很大機會買貴貨,第二標可能只得9億多些少,不過,我知道這樣說,一定不但要費一番工夫解釋,而且還令老友唔開心,不如在文章中表達,有緣人可以以此作為參考。

落標價整數多些少 是有心奪標

如果大家有留意奪標價,大多數是整數多些少,那些是有心奪標的價錢,甚至準備食其他人的叉燒,如果奪標價是整數中間價,那些人其實並不準備奪標,那些價很多時是會低於市場下限,奪標的人都不會太開心。

至於奪標價是差整數些少,落標的人是沒有心理準備奪標,因為,只要有人出整數,便會將他的落標價壓下去,即是畀人食叉燒。所以,我實在不知道老友是否有意投地,不過無論如何,能夠奪標始終是好事,值得恭喜。

紀惠集團行政總裁

[湯文亮 敢說亮話]


來源: http://www.mpfinance.com/fin/dai ... 6751&issue=20160908
PermaLink: https://articles.zkiz.com/?id=308093

Next Page

ZKIZ Archives @ 2019