ZKIZ Archives


中環在線:恒生用34萬包起胡祖六 李華華


2011-5-31  AD




 

恒生銀行(011)噚日宣佈,委任高盛前大中華地區主席胡祖六做獨立非執行董事,即日生效,董事袍金每年34萬,任期3年。

胡 祖六係湖南人,17歲考上清華大學,但唔係讀經濟,而係讀工程學,其後公費負笈美國,成為哈佛大學經濟學博士。當時同胡祖六一齊公費派去哈佛嘅,仲有樊鋼 同李稻葵呢啲中國經濟界炙手可熱嘅人物。2000年被任命做高盛董事總經理,08年做埋高盛大中華地區主席,舊年3月份一次過辭晒呢兩個位,當時引發市場 唔少傳言。

其實,胡祖六喺商界政界都好吃得開,舊年4月博鰲亞洲論壇,佢就全程陪住前美國財長、高盛前首席執行官保爾森。恒生點解會請胡祖六做董事?華華估計,恒生如果想攻中國市場,多咗胡祖六呢個中國通,相信會如虎添翼。


PermaLink: https://articles.zkiz.com/?id=25459

大劉千五萬包大國手

2017-02-16  NM

包一位名醫到底要花多少錢?中環醫生界傳聞頂級富豪有次心臟有事,幸得富豪御醫廿四小時standby,名醫獲呢位富豪送上一張blank cheque,銀碼幾多任寫,其富貴友人問:「醫生貴還是明星貴呢?」御醫話:「係咁意,一刀斬落去真係想退休咩?」聽後搞到班有錢佬都好迷惘,冇個bench mark,日後搵名醫救命點計數呢?

不過大劉為名醫mark咗第一口價!換腎後的大劉不時要往養和覆診,大劉繼老來包廚(從福臨門包起廚師作家廚)後,連醫生都要包,聽聞大劉以每位千五萬一年,包起兩位駐院醫生,隨時on call候命招呼佢。醫生界估計大劉應該聘請了泌尿科或腎科醫生,養和主理呢兩科的大國手呼之欲出,不外乎教授級的Dr. Wong及換腎專家Dr. Lai,千五萬包一年,班上咗年紀有錢佬非常關心,起碼心中有數。

情人節「大酒店」歎燭光晚餐

昔日陸羽茶室三樓,有十二壯士經常在此打躉,但此情將不復見,因為連最後一名壯士M.B. Lee李文彬會計師也在年三十晚,以高齡八十八歲仙遊,呢位老牌會計師是諾貝爾物理學獎得主高錕,在聖約瑟書院孖住櫈仔坐的同窗,亦係全港第十二位註冊會計師,冧把為F012;六、七十年代接香港唔少地產佬生意做核數,幾十年以來一早在陸羽飲早茶,交流市場訊息以及八卦富豪之間秘聞,呢位精靈會計師亦有兩位太太,和平共處相安無事,M.B. Lee喪禮選正情人節在「香港大酒店」守夜,咁都係點蠟燭嘅燭光晚餐啫!在此祝M.B. Lee在天之靈也感受到情人節sweet!M.B. Lee生前好肯提攜後輩,現財爺陳茂波當年剛上任香港會計師公會主席時未有「朵」,M.B. Lee遂叫記者多多訪問陳茂波,未知呢位世姪情人節晚上會否向前輩送上最後一程?

中環寸嘴:一落機就同sales開年

喺溫哥華過完年返到香港,有啲jet-lag,個人呆呆哋,諗住去美容院做個facial輕鬆吓,哈,點知要我同個sales「開年」,我仲有大把program都未用完,就喺度sell我再買,我即刻「×」佢,呢啲sales係侮辱個客智慧,嚟一次facial就簽一個program?咁咪有排都用唔完?個客嚟到係想輕鬆吓,唔係嚟受壓俾你做壓力測試o架?阿叔我大學畢業都係做行街sales,幾十年來都同唔少做大deal地產sales周旋,你估我唔知sales啲衰格嘢,呢個sales唔用腦,只係識用女賓角度出發,以為好似啲「阿太」隔日嚟,密密做facial,我日理萬機,最多咪一個月嚟一次清吓黑頭,你sell我貴一貴一次facial可以last for好耐,我仲慳番啲時間,呢個sales完全都唔係sell開男賓嘅底,仲搏個客唔敢鬧佢!唉,我見得sales多,來來去去都係嗰幾道板斧,一係搏同情,又唔知呢個世界長貧難顧,有個老友仲話我:「啲sales諗住你大把錢唔志在,漏啲出嚟俾佢嘛!」唓,我有錢捐咗佢唔好,都叫做積吓陰德!不過咁,我XYZ完個sales,佢都可以同上面老細講交咗功課,「嗱,我已搏到盡捽個客。」

楊國佳工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

鋤D會群龍無首

新世界主席鄭家純(純官)從彤叔手上接棒,任鋤D會第二代吹雞人,賭術精湛的純官贏過唔少內房股老細錢,自年三十晚中風後,年初四生日的純官都要在養和度過七十一歲生辰,而鋤D會「台柱」大劉亦要出入養和,活躍成員恒大主席許家印近日更被「明鏡新聞」指繼肖建華後被內地調查,一時之間鋤D會群龍無首;其實何不諗諗在養和包房開局,鋤D贏輸有時都會興奮過度,起碼有醫生護士廿四小時standby,不過鋤D會成員可能要問過正印鄭太葉美卿先,因為自純官中風後,現時任何人接觸純官都先要經過鄭太。
PermaLink: https://articles.zkiz.com/?id=235866

Next Page

ZKIZ Archives @ 2019