【馮仁昭四圍超】完婚返娘家南京定居71歲向華波再娶
1 :
GS(14)@2017-07-07 02:42:19■向華波話大病期間，李莉付出咗好多，所以向佢求婚。
中國星公司老闆向華強、向華勝嘅阿哥向華波喺上月30日已喺香港入紙申請結婚，準新娘叫李莉，南京人，今年49歲，之前結過一次婚，有一個女，9年前喺深圳邂逅咗向華波，兩個人一見鍾情，好快兩個人就共同生活。兩個人已經拍咗拖9年，今年71歲嘅向華波話想畀番個名份女友，一直有向女朋友求婚，但冇一次成功，直至上月初先求婚成功，所以就即刻通知家人要再婚。噚日打畀華波，恭喜佢再婚，佢大笑話：「原先我揀咗想7月17日註冊結婚，但呢日好似爆晒，所以要再擇過一日，不過都係註冊算啦！真係冇精力大事鋪張，肯定唔會大搞啦！可能屋企人坐埋食餐飯就算。」
■向華波最近喺香港入紙申請結婚。
■龔柯允下月底就會成為人妻。
龔柯允封盤
向華波之前結過一次婚，有兩個囝囝，後來離婚後識過幾個女朋友，點解李莉會令佢有再婚衝動呢？佢話：「佢對我好好，上年我大病一場，佢一直喺醫院照顧我，真係付出好大，令我好感動，死過翻生後，人生好多諗法唔同咗，既然搵到個啱嘅老伴，應該要好好珍惜。結完婚，老婆想返南京定居，我話好只要佢喺我身邊就冇所謂。」此外，有「翻版謝安琪」之稱嘅33歲馬來西亞歌手龔柯允（Karen），噚日入紙同29歲髮型師許銘豪登記結婚，Karen喺電話表示：「8月28日喺尖沙嘴簽紙，未決定幾時擺酒。」問到係咪奉子成婚？Karen大叫：「我係基督徒，唔可以奉子成婚。」撰文：馮仁昭
來源:
http://hk.apple.nextmedia.com/entertainment/art/20170705/20079046