我主場：莊澄為港片把脈
1 :
GS(14)@2013-05-11 15:22:55http://hk.apple.nextmedia.com/entertainment/art/20130511/18255884
無間道》、《轟天炮》、《未來戰士》三套中文戲名，禪意、火爆、科幻俱全，皆出自莊澄手筆。觀眾未必曉得他何許人，但他發行的電影《頭文字D》、《志明與春嬌》、《無間道II》你肯定有份付鈔入場。他以三十年電影人經驗，從林建岳的寰亞電影到黃百鳴的天馬電影行政總裁，在新書《光影道》為華語電影把脈，定性電影人的取向、決定華語片生死。
撰文：何永寧
早前莊澄接受訪問，談到他的新書《光影道》，電影人講的自然是跟戲有關，當中有章節談到港片存亡之際，他認為香港電影商早年優勢在於集資拍戲及海外發行，但今日已變得風光不再，莊澄說：「情形喺08年開始改變，內地電影市場已經『錢不缺』，內地電影公司又可以搵外國公司做發行，情況越嚟越明顯，所以唔一定要同你合作。」
小品崛起
另一方面，內地市場亦不是一面倒的好，以內地去年總票房達177億人民幣為例，當中有五成半屬於荷李活片，莊澄說：「內地的情形好簡單，啲人點解鍾意睇外國片，因為民智已開。我老竇嗰代人唔鍾意睇字幕，到我哋只要有字幕就乜片都睇。內地o依家都一樣，只要有好製作就得，仲要係想睇多啲不同種類，所以點解《泰囧》、《非誠勿擾》系列成功，種類新之餘又有外國風情味。」
莊澄認為華語電影因為錢不缺，只注重萬馬奔騰大製作，但是賣座保證的日子已不復再，代之而起是貼近社會民生的小品，他解釋說：「除咗《泰囧》，《失戀33天》、《將愛進行到底》之外，彭浩翔嘅《春嬌與志明》呢類合拍片，因為題材夠新都有好成績，亦帶出另一個話題，既然合拍片已經成為趨勢，就唔應該將佢睇成洪水猛獸。」
要識變通
對於有人擔心依照合拍片的框架，港片特色會蕩然無存，換來不倫不類的三不像電影，莊澄認為有點多餘：「失敗嘅例子當然有，不過你睇《門徒》、《傷城》同《保持通話》都冇問題。事實在於喺框架內你點搞，香港電影優勢一向係變通，要接受電影工業係市場主導，內地就係最大市場。」
從新藝城年代從事廣告撰稿員，到開始寫劇本，之後加入小小超李澤楷的衛視，之後跟一班同事自組寰亞公司，當中最令莊澄印象深刻的，要數發行《我和春天有個約會》這套電影，他說：「當年寰亞成立冇耐，膽粗粗發行套戲，點知第一個星期套戲唔掂，心諗夾嗰十萬實血本無歸喇！唔心息星期六去巡戲院，見到有對金毛青年喺度搵戲睇，就介紹佢哋睇《春天》仲話：『呢張我卡片，你睇完覺得唔好，我畀番戲飛錢你。』散場後金毛男女讚不絕口，《春天》最後票房達2,000萬，賺錢之餘滿足感亦很大。」