快餐定茶餐? Money Cafe
http://moneycafe-icable.blogspot.hk/2014/06/blog-post_26.html莎莎，翠華、大快活同日業績，毛利最強翠華，大為走樣是大快活，但形同預警，則為莎莎。
莎莎盈利全年升幅一成三，半年比半年的話更升六成一，但如果睇中港銷售額的話，由一二年增長三成、到去年升幅兩成，剛剛一個年度只有近一成八，以增長計其實四年最低。
更弊，截至六月廿一日的第一季，莎莎中港零售增長進一步放緩到半成左右，同店銷售更得番........1.5%咁大把，大跌17個百分點。
零售未致於寒冬，但零售跟激門股一樣，通通背負高基數問題，兼自由行因素，唉，有排捱!!
炒零售股有三步曲，先有量增長、繼而毛利，之後純利率，三關之中，第一關易過，第二第三最難搞。
以翠華為例，比併家樂及快活，翠華毛利百分之六十九點三，贏九十九條街，但半年比半年其實微跌，而以純利率計，其實跌更多!!
十蚊本，賺成七蚊利錢，翠華與快活及家樂之分，在於平、靚、正，抑或靚、正但貴，擺明翠華屬於後者。
正、靚之間、可能正或者早已絕跡人間!!
大家樂及大快活其實屬於好好商管MODEL，幾年前活仔先砌贏過樂仔，但以最新全年度計，家樂及快活毛利分別有百分之十四點六及十二點五，樂仔贏近一個百點。
當中半年計更由，百分之十二點六，抽升至百分之十六點四，幾年來未曾試過咁高!!
大快活業績走樣，主要是內地業務由盈轉虧，更為華北地區店舖大幅減值撥備。
論派息，今年可能要叫收息客失望，大快活5年黎首次冇特息派、大家樂都無，末期息亦只係多6%，令派息率由95%大降至近68%。
要一讚黃師傅，雖然仲食緊大快活，但投資眼光早於一年前已改觀，並斷言家樂贏快活，皆因品牌多元化，中、低端客通吃!! 結果ANOTHER BINGO!!
分析快餐股太易，先睇餐牌，再睇人流，然後定位，似乎大快活學翠華餐牌一成不變，學出禍來!!
租金升，食材貴，過去幾年飲食業想盡辦法，如果綜合荼餐廳及快餐店造法，不外乎幾招：
一，輕微加價、
二，減份量，碟頭飯有如兒童餐、燒肉薄如火腿、
三，附加費，包括凍飲由加二，變加三蚊、多士加兩蚊；
仲有仲有，某快餐集團額外攞牛油再加一蚊！
【又到三點三】三大連鎖快餐店比拼 邊間茶餐最抵最好味？
1 :
GS(14)@2016-09-17 16:16:53記者到大快活（左起）、大家樂、美心MX，購入兩款共六個茶餐作比較，包括西多士拼雞翼，以及迷你叉燒飯餐。
不少人為了慳錢，都會特意等到下午茶時間才醫肚，而連鎖快餐店提供的選擇多、速度快，加上總有一間喺左近，是不少人的下午茶之選。為找出最抵食、最好味的連鎖快餐店下午茶，記者到大快活、大家樂及美心MX，買了下午茶代表－－雞翼拼西多，以及較飽肚的迷你叉燒飯餐，比較他們的賣相、味道。
雞翼西多餐
大快活：
即煎西多士＋蜜味燒雞翼，配低糖凍綠茶/熱飲/汽水$29。西多約厚2cm，沒有餡料，三間入面唯一一份完整西多士。雞全翼以竹籤串起，方便客人拿着竹籤進食，感覺較整潔。記者評語（西多士）阿聰：「外貌冇問題，放入口就好大問題。唔脆之餘仲好厚實，好似食緊普通麵包咁，唔得。」
Daisy：「點解無花生醬嘅？有啲奇怪。好似單純將一塊麵包蘸蛋漿再拎去煎，同埋蛋漿好薄，唔係好覺自己食緊西多。」
Amy：「太淋，同埋有少少油膉味，入面係純粹白色嘅麵包，要浸好多糖漿先有味。個樣還好，唔係太燶，都係金黃色。」
大家樂：
特色雞翼．西多士（半份），配茶/咖啡/汽水$24，配至COOL冰冰$29.5。西多約厚2.5cm，為三款入面最厚，亦是唯一一款有花生醬作餡料。雞全翼長度與另外兩款相約，沒有以竹籤串起，較不方便，但亦避免了竹籤插口的可能性。記者評語（西多士）阿聰：「有啲花生醬喺中間。鬆化，花生醬惹味，係稍稍唔夠味。三個入面最合理嘅西多士。」
Daisy：「呢件終於有花生醬，似返平日喺茶記食到嘅西多。不過蛋漿好似唔夠，塊皮食落唔香口，無乜味。花生醬救咗佢。」
Amy：「中間有層花生醬，味道Rich好多，唔係死甜，因為西多如果只係靠糖漿就會死甜。花生醬係搽到成件西多都有，唔係得中間有，幾足料。」
美心MX：
蜜糖燒雞翼．西多士（半份），配奶茶/即磨咖啡/汽水$25。西多約厚2cm，雞全翼同樣以竹籤串起。記者評語（西多士）阿聰：「好淋，無乜味。唔好味。個色都好淡，我覺得炸得唔透。」
Daisy：「三個入面，佢個蛋香味最濃、最出。雖然佢無咗我最愛嘅花生醬，但係我覺得西多都應該要有蛋香，另外兩款食唔出蛋香，所以我最鍾意呢款。」
Amy：「呢個好似自己屋企整咁，因為佢本身係好普通嘅麵包，係大家平時買嗰種薄薄一塊嘅方包。」大快活的西多士最大件，但記者試食後覺得味道單調；而大家樂的西多士就有花生醬作餡料，味道較豐富，喜歡花生醬的不可錯過；至於美心MX的西多士就跟大快活差不多，但蛋香味更濃，想飽肚的可以選大快活，想輕嚐西多滋味，可以選美心MX。
迷你叉燒飯餐
由於三間快餐店的迷你叉燒飯套餐食品不盡相同，為公平起見，我們只比較三者的迷你叉燒飯。大快活：迷你叉燒飯配碗仔翅$29。飯盒重約395克，為三間之冠，但叉燒份量卻是最少，只有7件共重約58克。肚餓可以選這一款，夠多飯，但若一心想吃叉燒，可能會失望。記者評語（迷你叉燒飯）阿聰：「叉燒非常瘦，少少肥肉都冇，唔韌。飯望落好似好多，有少少痴埋一嚿，好肚餓就揀佢啦。」
Daisy：「叉燒睇落好乾，食落䊹口，冇乜叉燒味，感覺上係一嚿乾爭爭嘅肉。飯唔係好夠豉油。一個肚餓嘅女仔應該勉強可以食得晒。」
Amy：「因為佢淨係得瘦肉，所以有少少硬，味道OK，幾入味。飯煮得太濕，擺入口好黏。叉燒咁乾，配呢種咁黏嘅飯，其實都啱啱好。」
大家樂：
酸辣湯．細叉燒飯$29，加$3配茶/咖啡/汽水。飯盒重約379克，有6件叉燒，叉燒淨重約67克。記者評語（迷你叉燒飯）阿聰：「叉燒唔係乾爭爭，有些少肥肉，唔會好䊹，有少少肥膏。飯無大快活嗰個咁痴埋一嚿，爽口啲。呢盒係三盒入面最平衡。」
Daisy：「有返少少油脂，但叉燒味唔夠、唔香。三盒飯入面最夠豉油，飯粒粒分明，唔錯。三盒入面會揀呢盒，因為份量適中，豉油夠，叉燒不過不失。」
Amy：「叉燒稍為靚啲，見到有少少肥膏喺肉中間，但味道無大快活咁濃。飯係出色嘅，因為佢係大粒少少，唔會太濕同太硬。」
美心MX：
迷你叉燒飯．蜜糖燒雞翼，配奶茶/即磨咖啡/汽水$30.5。飯盒重約306克，為三間份量最少，但叉燒卻十分足料，有10件大小不一的叉燒，共重約75克。值得一提的，是這碗飯有幾塊青菜，較為清新。記者評語（迷你叉燒飯）阿聰：「三個之中最細盒。詭異之處係有條菜畀你，健康啲，得呢盒有。叉燒都有肥膏，唔係淨瘦。叉燒我覺得呢個係最好食、最鬆化、最淋。個飯好淋身，有少少一嚿嚿既感覺。」
Daisy：「叉燒有啲散，亦係三盒入面最油，好過另外兩間，但都係有少少䊹口。飯都係粒粒分明，但飯香唔夠。」
Amy：「雖然細兜啲，但佢係有菜。呢款叉燒肥瘦適中，而且個色唔會好假，味道亦啱啱好。飯都好食，唔會太乾或者太濕，所以呢碗係最好食嘅。」大快活的飯量最多，但叉燒最瘦、最少；美心MX的飯量雖然不多，但叉燒卻最足料；而大家樂的飯量及叉燒量就中規中矩。肚餓又對叉燒要求不高，可以選大快活；對叉燒有要求又不太肚餓，可以選大家樂；如果是叉燒癡，想在下午茶過口癮，可以選叉燒份量最多的美心MX。記者：李煒汯攝影：林栢鈞
左起：大快活即煎西多士＋蜜味燒雞翼（$29）、大家樂特色雞翼．西多士（半份）（$24）、美心MX蜜糖燒雞翼．西多士（半份）（$25）。大快活的西多為完整一件，其餘均為半份。
左起：大快活迷你叉燒飯配碗仔翅（$29）、大家樂酸辣湯．細叉燒飯（$29）、美心MX迷你叉燒飯．蜜糖燒雞翼（$30.5）。
大快活的叉燒是瘦叉，試食記者認為太乾身。
大家樂（上）、美心MX（下）的叉燒帶脂肪，較為香口。
三款西多中，只有大家樂的有花生醬作餡料，其餘兩款為白麵包。
三間快餐店的雞全翼（左起為大快活、大家樂、美心MX）大小相約。
來源:
http://hk.apple.nextmedia.com/su ... t/20160915/19771060