| ||||||
「淘寶網」去年與幾間大型的速遞公司，如順豐合作，推出平價集運服務。一向獨立於淘寶的「民間」集運公司，嚇到腳軟，決定減價迎戰。 曾做I.T.業的香港人葉甫超（加菲），一二年開設「民間」集運公司「多寶網」，在內地租倉庫，收集客人從淘寶淘回來的貨物，再將貨件運回港。他說去年淘寶加入搶食，由唇齒相依，變成競爭對手，本來十分擔心，但定過神來，發現生意不跌反升，月入七萬。加菲總括這個市場生態：「諗諗嚇，又使乜驚呢？個餅真係好大！佢哋做埋超市，我哋仲係士多。我哋賣嘅係人情味、同客人嘅關係，總有生存空間！」他自白在這行高低起跌的心路歷程。 我啲朋友話我個樣似加菲貓，個人又funny，所以叫我做加菲。我呢盤生意，可說是「成也淘寶、敗也淘寶」。只要淘寶生意好，我就賺得愈多。剛剛開業時，淘寶喺香港未普及，為咗吸客，向客人每公斤貨收取五蚊集運費，但外判車隊成本都兩、三蚊，計埋交租、電費、貨倉，每月蝕萬幾蚊。惟有樣樣慳啲，好多文具、條碼槍、貨架全都購自淘寶o架，哈哈。捱咗半年，愈來愈多香港人愛上淘寶，連垃圾袋都喺淘寶買！就算我哋加價，生意額繼續上升，註冊會員有兩萬幾人，每個月發貨量更達九萬公斤。貨量愈多，我哋就可以向運輸公司拎到個好offer，賺取差價愈高。 淘寶搶食割價迎戰 正當我以為可以放鬆之際，去年中，順豐等大型物流公司竟聯同淘寶加入搶食，推出官方集運，用平價同我哋搶生意。唉，呢行毛利唔高，只有二至四成，我哋一向都係靠密食當三番。以前佢哋大雞唔食細米，我先有生存空間，而家見個餅愈來愈大，就加入搶生意。我聽到呢個消息，梗係擔心啦。人哋大公司，財雄勢大，我呢啲小商戶，可以做乜啫？三個月後，被迫推出「週年優惠」。自取首一公斤重量本來十二蚊，而家減到十蚊；續重係七個半，而家減到六蚊！減價後，生意額竟又再度增加，我先發現平價招有效，佢哋都獨食唔曬，大家各有各做！ 其實諗真啲，又使乜驚。佢哋就好似超市，我哋就係士多，總有市場價值，彈性仲比佢哋大好多添。我哋可以三幾個客人，大家用唔同戶口買嘢，最後集合埋俾錢、送貨、收貨。而大型嘅速遞公司，唔容許客人咁做。客人鍾意我哋可以用現金俾錢，而淘寶嘅官方集運只可以用支付寶及八達通。好多客鍾意用自取服務，去我哋位於觀塘、旺角等五個地方取貨，同我哋嘅同事亦有傾有講。我哋七點半收工，有時客人打電話嚟，話要遲十分鐘先到，叫我哋等埋，同事得閒嘅話，都會等o架！聖誕節、新年呢啲日子，啲客趕住攞貨，我哋開到夜晚九點幾等大家。客人成日唔得閒嚟，我哋話就話貨件三十日後當廢件處理，其實我哋會放到六十日先掉，呢啲大公司又點會同你諗？最近聽番好多客人意見，話大公司僵化，好多熟客決定繼續幫襯我哋，令我哋好感動。 我的生存空間 現時仲有好多淘寶商戶，講明唔支持淘寶官方集運到外地。點解？佢哋話件貨去到香港、台灣等地，如貨件有損毀、貨不對辦等問題而退貨，商戶要負責部分或全部由外地運回國內的運費，令成本大增。我哋呢啲獨立於淘寶運作的集運公司，只係借個大陸地址出嚟。客人如要退貨，要自行想辦法送件返大陸，淘寶商戶就唔需要承受咁大運輸開支，所以「民間」集運就仍然有生存空間！當初做呢盤生意，都係因為我太太Agnes，佢係淘寶粉絲，佢話喺淘寶買嘢送嚟香港，運費隨時貴過件貨。如果呢間商舖買一件、嗰間買一件，運費就相當「揦脷」。那時她透過QQ、MSN與內地集運公司聯絡，把買好的貨件，送到他們的國內地址，收集好後再一次過運去香港，不但只須交一次跨境運費，愈多嘢一齊寄，運費就相對平。但人家小本經營，問佢件貨到咗未？幾時送？對方幾日先覆你，又要幾日先送到貨，效率低。我見香港無乜人做喎，決定開設「多寶網」，搵人寫programme，由入貨、存貨到出貨都完整記錄，客人可以喺網站自行查詢自己件貨去到邊，方便好多。 與太太打天下 我哋當時為咗喺國內搵倉，四圍撲！人生路不熟，喺經紀介紹下，在廣州天河以呎租四元租了八百呎的地方，生意開始兩個月，貨量愈來愈多，已經唔夠用。我唔想捱貴租，搵同事小威幫手搵倉，佢教我轉移陣地至東莞常平。佢幫我搵到呢個三萬呎貨倉，呎租都係個半港紙！相比天河，呢度鄉下地方，但做物流唔需要市中心，呢度近虎門物流中心，好多淘寶商戶送件嚟呢度仲快過去廣州。為了保持運作順利，每件貨件要即日清！每有貨車卸貨，工人就會即時把貨件條碼，用槍掃一掃，逐件磅重後，再把資料輸入，讓客人亦可即時透過網上查詢系統貨件是否到達。好多客都鍾意今日淘嚇，聽日淘嚇，要買齊嘢可能要一個星期，我哋設三十日免倉租期，等大家有足夠時間買嘢！客人一句「confirm」出貨，我哋就會將佢哋所有貨執好入箱，找外判的速遞公司，送貨去香港。喺好多人眼中，做集運好辛苦，工作苦悶，成日對住啲一箱箱貨，又唔可以拆開嚟睇嚇，八卦嚇。間中又會俾客人投訴，話外判車隊司機送貨態度唔好，早咗遲咗送貨去客人屋企，個客都會入我哋數，我哋又鬧邊個呢？不過相比以前做I.T.，開公司幫人寫網頁，不但生意難做，project又加唔起價，客人醃醃尖尖，而家可以同太太一齊開工打天下，感覺開心好多呢。 開業資料（10/12）租金$70,000#裝修$40,000集運電腦系統$150,000 雜費$50,000 總投資$310,000#二按一上營業資料（02/14）營業額$500,000租金$90,000#人工$80,000*運輸$250,000 雜費$10,000 盈利$70,000#香港五個自取點及大陸倉租*六名香港員工及十二名內地員工 一點意見 淘寶忠實粉絲Nicole其實作為客人，唔介意呢間平一蚊定兩蚊！反而係信心，呢樣嘢官方集運梗係俾到我哋。我哋喺淘寶買咗嘢，都想佢安安全全嚟到香港，如果民間集運公司俾我哋知道佢嘅倉都係咁乾淨企理，計埋人情味嘅因素，我係會考慮幫襯佢哋o架。 香港速遞協會會長吳江多寶網已經有咁多熟客，可發展增值服務，如網購、在自取點兼賣其他物品。因為開自取點要成本，而多數人拎貨都係某啲時段，如果人手、資源因增值服務而可靈活調動，有助節省成本。 | ||||||