中環在線：澳門UA銀河影院 幫客搵番舊片
1 :
GS(14)@2014-09-08 23:27:42澳門賭場吸金力強，估唔到喺賭場渡假村裏面嘅戲院一樣咁財源滾滾來。銀娛（027）旗下澳門銀河間UA銀河影院，舊年喺中港澳嘅戲院收入排名第三，營業額已有成億元，料今年可再賺多三成。UA銀河營運行政經理翁棟良（Perry）話佢哋能夠喺咁多間戲院中跑出，主要贏在定位夠豪。
UA銀河有10個影院，合共大約有833個座位，其中有5個喺貴賓影院，專攻鍾意睇戲嘅豪客。Perry話佢哋嘅貴賓影院好受歡迎，由於使用率接近飽和，今年年初已經喇喇聲再開多間應市，包場最低收貴4,800元，可以招呼16位朋友一齊睇戲。不過Perry話其實有唔少喺二人世界拍住拖咁包場，唔想畀其他人騷擾。貴賓影院唔單止包場睇戲咁簡單，仲有唔少星級服務，好似可以幫客人搵舊片返嚟播，嚟緊亦會有毛毯同拖鞋供應，等客人可以好似喺屋企睇戲咁悠閒。睇戲有時口痕想食嘢，貴賓影院除咗有無限量嘅爆谷汽水供應，客人仲可以「柯打」黑魚子、鵝肝醬及燕窩蛋撻等豪食。
■UA銀河營運行政經理翁棟良話，佢哋嘅貴賓影院好受歡迎。
■戲院出面展示咗好多本港著名歌影星嘅手印及簽名。
來源:
http://hk.apple.nextmedia.com/financeestate/art/20140908/18859373