大台女藝員，演藝生命短暫，不少人轉型從商希望殺出血路。不過，又有多少人會是修身堂（8200）張玉珊？曾於90年代主演《阿sir早晨》、《95神鵰俠侶》的前藝人簡珮筠（June），就因為做生意遭受打擊！曾是添哥（李添勝）愛將的June，息影後從事美容行業，在瑞士搞護膚品牌，近年更準備上市。但好景不常，上年初她指被兩位多年「好」拍檔蹺起，公司部分權益亦賣給上市公司銳康藥業（8037）。June向記者透露，她與丈夫近月不斷被滋擾及誣衊，其間June不幸小產，她哭着向本刊痛斥：「佢哋就好似丁蟹（《大時代》角色）同陸國榮（《誓不低頭》角色）！原來人為咗錢咩都做得出，依家成間公司咁就冇晒喇！」 商界不像娛樂界般簡單，June現在終於領教得到。June曾任廣告模特兒，九十年代在無綫做藝人，但星運平平，後來淡出從事美容業。當時她二十多歲，偶然間認識了從事美容界的拍檔葉希德，她指出：「佢話我哋咁夾，不如一齊做啦，我當時見佢喺呢行咁耐，就應承咗。」兩人搞起瑞士化妝品牌Bellefontaine，經十多年經營，銷售予三十多個國家，每年盈利過千萬元。由她負責亞洲區，葉及後期加入、於金融界打滾的梁享英，就負責歐洲區營運。而公司在全世界的商標，都是由June申請及持有。 傾上市出事 二○一二年，June指公司規模已達至可以上市，她與拍檔開始傾談此事：「人生第一次做到可以上市，見到有少少成果都好開心。當時同拍檔嘅合作性質，係亞洲區同歐洲區係獨立公司賬目。當時葉希德同我講，如果要上市及收購法國公司，就一定要合併賬目。我覺得合理，就應承咗俾亞洲公司賬目、商標等佢合併處理，如果唔成功佢應承會歸還。」「合併」賬目後數個月，June見上市進度毫無消息，開始覺得有問題，決定向葉希德要求還原：「佢哋話好多嘢都唔成功，我就話如果真係唔得就算。」 最後葉終於有回覆：「經兩個律師見證，佢俾番商標我，我覺得可以繼續喺亞洲做生意就OK，無追究佢。」她指出。 股份賣予上市公司 不過兩年後葉希德又要求再上市，June拒絕後，歐洲區股東梁享英突然將槍頭指向June。她指：「梁享英突然出咗好多封信俾我，要求我無條件俾番晒所有商標出嚟，佢話我哋係夾埋律師偷咗呢啲商標，我哋係唔合法。」她想溝通但不果。她說：「去到今年一月，我收到朋友通知，話我間公司商標已經賣咗俾上市公司！」June當時頓感晴天霹靂，翻查港交所資料，根據披露文件顯示，銳康藥業（8037）以2,795萬元現金，向葉希德收購Bellefontaine品牌百分之二十七點八股權，並寫明有品牌商標，並在亞洲等多個地區註冊。June稱自己亦有亞洲區商標，對此費解。本刊曾查詢銳康，對方負責人回覆：「我哋出嘅通告內容係啱嘅，至於係亞洲嘅邊個地方有商標，就無需交代。」 連番騷擾 近年已移民瑞士的June，在上年年尾回港探親時，發現瑞士住宅被人搗亂：「間屋係公司物業，喺葉希德間屋隔籬，佢隨時喺公司拎到後備匙。」她就立即打給葉希德查詢：「佢話：『我唔知呀，可能係我同事啦！』我就好奇怪點解有人入我間屋。」本刊未能聯絡到梁享英。翻查資料，梁享英在金融界來頭不小，十年前曾在廉署「響箭行動」中被捕，後獲釋並被金利豐復職。現時未見有任何上市公司董事職位。而身在瑞士的葉希德就回應稱：「十幾年前商標係June註冊，但佢出名我出錢的。後來佢做唔住都係我幫佢！佢話可以搵人搞上市先合併賬目。」他承認June有攞番亞洲區商標，但未有解釋與上市公司銳康的交易詳情。本刊翻查香港的商標註冊，發現現時Bellefontaine的商標，主要由簡珮筠持有，未見有葉希德的名字。雖然June已報警及將所有文件交給律師處理，但她已「打定輸數」：「佢哋唔通知我就搞埋亞洲市場，變咗同我鬧雙胞。我就算有錢打官司，都要打好多年。」而最傷莫過於感情，人到中年的June曾因困擾而小產。她哭訴：「我當葉希德係我恩師，佢破產都係我幫佢，真係傷得我好緊要！」 好友洪欣：唔好夾份做生意 藝人洪欣與簡珮筠相識多年，不時會出席好友護膚品的活動，她得悉June的遭遇後，大嘆可惜：「我知佢好努力咁做，我聽到都好心噏。」曾經歷生意失敗的洪欣，坦言幾次經歷都是與拍檔決裂：「我自己拍劇好忙，好多時拍檔話點就點，得個信字，最後條數出到嚟先知。如果做得唔好，第日見番面個心都會唔舒服，經過幾次我都好抗拒再夾。」她坦言：「幾好朋友都好，都唔好做partner，唔係話對方好唔好或者要幾小心，有時未必係對方問題，但一有分歧就好麻煩，可以嘅話一定係自己獨資做。」 上市未必好 本身是律師的民主黨立法會議員涂謹申，聽完記者覆述簡珮筠的情況後，指她第一次與拍檔傾談上市時，最大問題是沒有尋求獨立法律意見：「雖然我無深入去了解，但係如果單一公司現金流夠嘅話，未必要合埋一齊處理。不過好多老闆見搵律師查詢，可能要使十萬八萬，未必捨得，結果信晒拍檔。」他亦指很多老闆考慮上市時，未必有理過當中的風險。「好似係公司上市後，就要有公共責任，遵守的規則有很多。」他就見過不少有關新股的訴訟，是一直經營私人公司的老闆未必能應付。 撰文：梁延宇攝影、攝錄：關永浩[email protected] | ||||