炮製黃腳鱲夠親切洪卓立自嘲鹹魚博翻身
1 :
GS(14)@2017-07-29 03:23:56■洪卓立製成品由主持「表妹」幫手試味。
【我一個人煮】多次被網民惡搞誤傳死訊的洪卓立，今年三十而立身壯力健，日前為《蘋果》新欄目《我一個人煮》學整吊命菜式「法式紙包黃腳鱲」，他鬼馬說：「阿鱲爺，如果你今年冇死嘅話，你幾多歲？今日我哋煮法式紙包洪卓立。」廚藝一般的立立，面對這味紙包魚都算應付自如，身旁主持提他幫魚搽鹽調味，要像對女友湯怡般溫柔，立立卻得戚說：「我對佢（女友）唔溫柔喎！」雖然切洋葱和薑時都忘記去皮，但立立仍嘴硬說：「冇所謂㗎，煮嘢食邊有啱同錯，等於煮意粉係咪要過冷河，你覺得好食咪得囉。」
■洪卓立廚藝一般，但總算應付自如。
■洪卓立和湯怡拍拖多年感情穩定。互聯網圖片
薛家燕都叫錯
提到他曾被薛家燕叫錯「黃腳鱲」，立立自言不介意：「其實都覺得幾好笑，中學花名都係叫黃腳鱲，幾親切。」對於屢被誤傳死訊，更被稱為「洪卓立之亂」，他說：「幾有創意，呢啲惡搞要好幽默先諗到，開頭梗係唔太開心，生勾勾好人好姐，大吉利是咩，最大影響係阿媽，佢到?家都接受唔到，覺得係個仔得罪人！」無限復活的洪卓立，09年患肺積水真的死過翻生，他說：「留院個幾月，嗰時係絕望，打定輸數唔會做番呢行，就算自己想繼續唱歌，公司未必會擺資源喺我度。當我鼓起勇氣出番嚟唱歌，就有人話我死咗，落井下石，嗰下真係好唔開心，係咪乞人憎到咁呢！」今年是立立出道10周年，他表示雖沒具體成就，但來多次也會選擇相同的路，能做自己喜歡的工作，認識到現任女友，從沒想過要來當歌神：「我係一條鹹魚，?家時勢唔係個個歌手都可以出碟，如果可以希望做到40歲。」採訪：皓騫攝影：仇志德場地提供：Kohler Kitchens鳴謝：H&M Home
法式紙包黃腳鱲製作步驟
1.切後調味
於魚身斜切後調味，並將檸檬片、薑片、蒜片放入魚肚。
2.放檸薑蒜
每個斜切口放入檸檬、薑和蒜，灑上牛油粒，再把番茄、紅椒放旁邊。
3.焗後成品
用牛油紙包實，放入預熱190℃的焗爐，焗17至23分鐘。
來源:
http://hk.apple.nextmedia.com/entertainment/art/20170727/20102415