鍾慧冰患脈管炎險癱 哭訴：以為會死
1 :
GS(14)@2017-05-21 00:59:11■去年患上脈管炎的鍾慧冰，昨日重提逃出鬼門關，激動落淚。
現年60歲的79年港姐季軍鍾慧冰，去年底原來因身體免疫系統出問題，患上脈管炎，全身血管發炎，她低調養病半年，近日康復出關，昨午與陳志雲、王喜及葉童在荃灣為奇妙電視錄影節目《娛樂巴巴閉》。鍾慧冰昨日精神不錯，但仍要用柺杖行路，頸項和手都仍腫脹，當講到對抗病魔苦況，不禁哽咽落淚。
半身麻痹郁唔到
鍾慧冰表示去年發現患上脈管炎，被細菌侵襲神經線，嚴重時卧床半身麻痹不能動彈，幸最終逃出鬼門關，她激動到邊喊邊說：「?家回復番八成，腳郁得，但驚跌要揸枴杖，手指拉唔到拉鏈，攞唔到筷子，簽唔到名，要做物理治療。出事到?家食咗四個月類固醇，發炎指數低咗，初時右手右腳郁唔到，以為中風，原來係血管炎，同魯芬嗰種一樣，嚴重可致死，我擔心食類固醇會有副作用骨枯，醫生問我係唔係想癱，血管炎會令免疫力低，引致併發症。」鍾慧冰透露過去數月看過數十位醫生，她被指年輕時積下太多壓力，所以風邪入侵便容易發病。卧病在床的鍾慧冰多得好友悉心照顧，林建明（大姐明）曾更到醫院為她剪手甲腳甲，鍾慧冰再度抽泣說：「我全身冇力，手指都黑晒，以為自己會死，佢幫我剪手甲腳甲，自己乜都做唔到，做人仲有乜意思，遲啲去廁所都去唔到，我就唔想做人，朋友真係好緊要。我個女驚到不得了，佢20歲溫室長大，突然見阿媽入院幾次，樓梯都行唔到，囡囡好震驚，我反過來安慰佢。」
■陳志雲（右）和王喜昨接受鍾慧冰主持的奇妙電視節目訪問。
■葉童和陳志雲現身宣傳舞台劇《雷雨對日出》。
「覺得累人累物」
不堪病魔折騰的鍾慧冰，更自爆曾萌輕生念頭：「覺得自己累人累物，個女要照顧我，唔想阻佢發達，我一個廢人瞓喺度好冇尊嚴，自己爬到起身仲可以自殺，遲啲唔通碌落樓梯咩。」康復中的鍾慧冰開始趕走負面情緒，她建議患者多添正能量：「要珍惜身體，懂得安慰同鼓勵，好似重新做人咁。」採訪：張俊銘攝影：陳順禎
來源:
http://hk.apple.nextmedia.com/entertainment/art/20170520/20026914