ZKIZ Archives


直腸直肚易惹是非?劉曉彤宣萱好姊妹斷聯絡

1 : GS(14)@2017-04-04 08:59:25

劉曉彤於澳洲長大,為人直腸直肚,心直口快,唔知係咪因為咁,所以平日唔多花邊新聞嘅佢,都會惹「禍」上身。先係袁詠儀(靚靚),劉曉彤同靚靚一度甚為老友,但到99年靚靚指自己曾被一位好友出賣,更力數與對方交惡經過,雖然佢冇開名,但有傳媒「推斷」到係劉曉彤,其後靚靚受訪時就話自己識對方5個月就便跣一鑊。同年,林家棟喺大台綜藝節目中將呢單是否擺上枱,但劉曉彤否認爆大鑊,仲話自己毫無頭緒,佢講到如果自己真係得罪靚靚的話,願意講對唔住。不過,劉曉彤同另一好姊妹宣萱嗰單就大鑊得多,兩人同樣係「讀番書」、「鬼妹仔」性格,所以初頭好friend吓,又經常孖住出席首映禮,甚至接受訪問。不過,宣萱喺99年接受周刊訪問時,直斥劉曉彤將是非當人情,出賣朋友,三番四次想害自己但唔成功。宣萱仲講到嗰個是非精會被天收,劉曉彤被記者問回應時,話唔知發生乜事,但對於對方話「天收佢」耿耿於懷,亦為5年友情就咁告終感到可惜。另有周刊指宣萱同劉曉彤之間早有心病,消息指大台喺97年想簽當時主力攻電影嘅劉曉彤,身為好友嘅宣萱不單止唔幫手扯線,仲向大台高層力數對方不是,仲叫高層要再三考慮簽約事宜,最後劉曉彤要靠另一朋友搭路先入到大台,當時亦有指宣萱怕劉曉彤同自己走同一路線,會受到威脅。而劉曉彤喺02年上大台遊戲節目《吾係獎門人》時,喺「吾係落大閘」環節中,直爆自己最憎嗰個係宣萱,其後宣萱被問及此事,佢直指自己已經幾年冇同劉曉彤聯絡,加上玩緊遊戲,所以佢唔係太介懷,仲話自己同對方係普通同事,見到面會點頭打招呼。




來源: http://hk.apple.nextmedia.com/entertainment/art/20170403/19978781
PermaLink: https://articles.zkiz.com/?id=329155

Next Page

ZKIZ Archives @ 2019