📖 ZKIZ Archives

大學生「老馮」向政府取着數

1 : GS(14)@2010-11-06 15:34:24

http://www.eastweek.com.hk/index.php?aid=9135
早前運輸及房屋局局長鄭汝樺喺青協個講座跟學生真情對話，席間談到樓市問題，有個大學生振振有詞話：「我女友同我講，話我冇樓唔嫁畀我呀！」弦外之音係樓價咁高，我娶唔到老婆，政府要負責呀。講完呢番話，一眾學生擊節鼓掌。一言睇咗呢個報道，對香港經濟前景擔憂，事關社會未來主人翁嘅質素竟然係如此低。
廿幾年前香港只有兩家大學，培養嘅可以講係精英，畢業後都好努力奮鬥，鮮有聽佢哋向政府要求呢樣又要求嗰樣。相反今天大學生，唔知係咪學位過多，質素良莠不齊，畢業後總是攤大手板向政府攞着數；唔係話要工作、就話要津貼，依家仲要求幫佢買樓，總之覺得政府幫佢好理所當然。
大學畢業只係啱啱踏入社會，工資一般來講會偏低，手上又未有儲蓄，何來資金買樓？除非你有個有錢老竇又另計。講真，任何一個年代大學生剛畢業都買唔起樓，要經過多年奮鬥，儲蓄一筆財富先開始置業，首次通常買一啲較細同偏遠單位，並非一步登天。
再講，今天大學生更加唔能夠跟廿年前畢業生比較，依家大學生數目係嗰個年代十倍以上，即使當年社會最高水平的尖子，都要做若干年工作先有機會置業，今日大學生竟想不勞而獲？
嗰位學生哥幾乎講到出口要政府幫佢娶老婆，其他在座學生仲大拍手掌，認為政府幫學生置業係責無旁貸。計一言話，呢位學生應該檢討吓，真係要咁急結婚，就考慮租樓，再唔係跟父母住，若果都係行不通，怕且都要考慮吓飛起條女，否則到你買樓時，佢隨時又會話：「冇層山頂樓我唔嫁你o架。」
學生哥（左）娶老婆都要政府幫手，難怪鄭汝樺（右）O晒嘴。
2 : GS(14)@2010-11-07 13:41:03

2樓提及
呢句arm 架!"怕且都要考慮吓飛起條女"


一早應該啦
PermaLink: https://articles.zkiz.com/?id=271449

趣BLOGBLOG：「老馮」的購買力

1 : GS(14)@2016-05-24 10:41:38

近月新盤市場回暖，其中一種購買力，叫「成功須父幹」。將軍澳新盤Savannah第三輪賣樓，謝生斥400萬元買了一房給20餘歲讀緊書的兒子，「首期兩成80萬元代俾，如果加息呀仔供唔掂，全家都會幫佢手供。」父母協助囝女上車，資助首期，甚至供埋樓。但大前題是，有否考慮到子女的成熟程度及負擔能力。畢業後或結婚前，子女上唔到車，是父母的負責嗎？在這個世代，似乎父母有能力，俾首期是固之然，畢業後繼續由父母代供，恐怕亦相當普遍。這種思維，演變成「take it for granted」，中文譯做「老馮」最貼切，背後的意義已經變質了。買樓從來不是件容易的事，是經過長時間的深思熟慮，以及準買家經以年計的儲錢準備。父母憂心子女永遠上不了車，為他們籌謀協力，這份溺愛只會令一切來得太輕易、太理所當然。在子女心目中，代支首期恐怕被貶至一件瑣事，往往因為這種心態而忘記多謝。經濟轉差、人工花在旅行購物致供不起樓，順理成章將問題交回父母身上，歸根究底，這個「老馮」購買力，會是樓市一個炸彈。金管局每月會公佈住宅按揭數據。2014年，轉按總額431億元，佔當年整體新批出按揭貸款的15.5%，轉按宗數則佔21%。到了去年，轉按總額增至567億元，佔比達19.9%，宗數佔比更達26%。今年首季一、二手市場沉靜，但轉按市場維持熱鬧，首季涉及金額佔比攀升至27.3%，宗數更達33.4%。轉按金額及宗數上升，或是市民將早年低息按揭，轉按至更低息計劃，更可能是由父母供斷或接近供完的單位，轉按新增一筆額外資金，以協助子女上車。以過去九個季度數據，轉按宗數合共4.5萬宗，因為「上車須父幹」的原因而轉按，隨時超過萬宗。逾萬宗「老馮」的購買力，是一、二手市場的新力軍，令樓價難以大跌的理由。但這其實是雙面刃，當原先供完或接近供完的單位，要加按重新供款，連同為幫助子女上車，父母負擔多一個物業按揭。一個轉按，好方面諗是變成兩個物業，但只要經濟樓市急轉直下，就變成兩個計時炸彈。父母為女子籌謀協力無可厚非，但此時此刻，愛你可能害你。股榮
http://www.facebook.com/stockwing1





來源: http://hk.apple.nextmedia.com/financeestate/art/20160523/19623250
PermaLink: https://articles.zkiz.com/?id=301337
Next Page
ZKIZ Archives @ 2019