📖 ZKIZ Archives

留美攞博士兼綠咭 左丁山

2011-11-06 AD

喬布斯自傳火速出版，銷路應該暢旺。喬布斯在 2005年在史丹福大學演講，引用前人一句 Stay Hungry, Stay Foolish，家人人講。一位年青朋友上星期六要搵臨時工到新界工業區貨倉開工，先搵自己啲九十後親戚，點知個個話一早有約，唔肯做，再搵同學朋友啲 細佬妹，一樣碰釘，好彩有一位見習生來自職訓局學校，話識得好幾位住在天水圍公屋青年男女，打電話去問吓，話明時薪五十元，只係負責開箱，將箱內貨物拎出 嚟，分批放落另一啲送貨盒內。八位男女準時報到，午飯後，男青話下午有事，率先告退，剩下四位女青話啲錢唔難賺，願意做埋下午。好彩啫，卒之可以搞掂，任 務完成，朋友即時以現金支薪，人人歡喜。朋友嘆曰：「喬布斯冇錯， Stay Hungry係最大工作動力，不過死啦，香港男仔讀書上大學唔夠女仔砌，我睇到嘅係，男仔連做工拼勁都輸埋俾女仔！」
喬布斯其實仲有一樣未講，就 係 Stay Smart。據華爾街日報講喬布斯自傳，奧巴馬向喬布斯請教如何發展創新工業，喬布斯講乜，奧巴馬都話好好好，但政治上難以做得到，搞到喬布斯把鬼火，當 面話佢係「一任總統」；喬布斯又話「蘋果」在中國裝配產品，有七十萬工人，皆因佢在美國搵唔到三萬名電子工程師做監工，如果美國有足夠工程師，「蘋果」願 意在美國裝配，創造就業。
奧巴馬聽喬布斯話，請咗幾位矽谷名人吃飯，包括喬布斯、塞格保（ FB）、谷歌、思科、甲骨文嘅要員與創投基金主理人，其中一位基金名人 John Doerr話：「一張綠咭釘在每一位理科及工科外國畢業生嘅畢業證書上！」奧巴馬話要修改移民法例，做唔到。原來美國大學嘅七成工程博士生，三成工程碩士 生係外國人（情況與香港幾乎一樣），呢啲畢業生一攞到學位就要鬆人，否則移民局會嚟拉人！每年美國發出十四萬份綠咭，但規定每個國家有限配額，不得超過總 數七巴仙，但中國、印度與列支敦士敦點比較呀！共和黨熱門總統候選人 Romney贊成綠咭釘學位證書之議，一位阿里桑拿州議員預備提出一條 Staple Act（ Stopping Trained in America Ph.D.s from Leaving the Economy Act），睇法案之名稱，相當搞笑，可說挖空心思，各位要讀工科理科博士嘅朋友，去美國可能有綠咭呀！

PermaLink: https://articles.zkiz.com/?id=29151
Next Page
ZKIZ Archives @ 2019