馨馨細語：準確、直接、傳神
1 :
GS(14)@2012-01-13 23:46:28http://m.sharpdaily.hk/detail.ph ... 8065&category=daily
陳黃穗問我﹕「點解用廣東話寫稿﹖」
我答﹕「準確、直接、傳神！」
無綫電視開台之初，劇本全用白話文，藝員要自由發揮，「翻譯」成廣東話對白，好嘅藝員通常都冇問題；唔夠功力嘅藝員就似唸書咁，又或者「錯譯」嗰句對白嘅意思。
就以一個「是」字嚟講，用廣東話講出嚟，可以有好多意思──「係」、「係咩」、「係嘛」、「係噃」、「係籮」、「係囉」、「係嘅」、「係啫」、「係啦」、「係喎」……如果清楚寫出嚟，啲藝員就會拿揑準確對白嘅意思嘞。
於是有一日，周梁淑怡下令改用廣東話寫劇本，第一個試用嘅節目就係「雙星報喜」。當時編劇度咗一個gag，其中嗰句對白用白話文寫出嚟會係咁﹕「有誰像我這樣威風？」，藝員可以演譯為「有邊個似我咁威風？」、「邊個有我咁威風？」等等。周梁淑怡話做gag唔可以俾藝員自由發揮，藝員要跟足每一個字嚟講，要準確、直接、傳神先至惹笑，於是呢句對白改成「邊個夠我威？」，後成為坊間傳誦一時嘅俚語。
廣東話只要換一兩個字，整個意思就唔同晒。報社社長初學廣東話時就鬧咗個笑話，佢想多謝個仔嘅補習老師教導有方，佢話﹕「多得你唔少！」
馨馨細語：一個傳奇
1 :
GS(14)@2012-01-19 22:39:47http://m.sharpdaily.hk/detail.ph ... 8065&category=daily
人與人之間嘅緣，有時好難解釋，有些人相識半生，但唔會深交；有些人又會一見如故；又有啲朋友冇機會常見面，但一重聚，又好開心，有講唔完嘅話題。
認識高文安於我們的青葱歲月，嗰時我喺無綫電視工作，他剛從外國讀書回來，接受電視訪問。其後間中喺一啲飯局見面，或者從朋友口中知道佢嘅近況，有次仲借咗佢間屋拍戲，然後冇見好多年，有時去沙田馬會會所，見到兩三張佢設計嘅椅，總會想起佢，但俗務纏身，唔會攞起電話講句哈囉問候。
有晚朋友請食飯，佢赫然在座，真高興，全晚傾個不停。問佢呢幾年可好，佢話非常好。佢十年前喺朋友慫恿之下，將公司搬去深圳，佢本住姑且一試嘅心情，誰料生意好到不得了，短短十年間，佢喺中國三十幾個城市開咗分公司，喺六十幾個城市都有設計項目，而每個項目都係佢親手畫圖，不假手於人。
此外，中國其中五個著名山峯──山東泰山、安徽九華山、湖北武當山、四川峨眉山同麗江玉龍雪山，亦都有佢設計嘅酒店或者度假村。「Kitty，你話係唔係奇蹟呢！我竟然有緣接到呢啲項目！所以我非常感恩！」高文安話。我覺得奇蹟多數發生喺有天份和肯努力嘅人身上。
電郵：
[email protected]
葉潔馨
馨馨細語：唔鬧得
1 :
GS(14)@2012-03-31 00:00:40http://www.sharpdaily.hk/article/index/38065/20120330/73709
上星期勞工處舉行招聘會。有記者訪問咖啡店負責人，佢話：「對比五、六年前，依家十七到廿五歲嘅求職者不但怕辛苦，而且唔鬧得，不論男女，均會一鬧即喊。」
佢講得啱，我都見過—有個朋友開咗間小酒家，為表支持，專登訂咗間房，請咗幾個朋友去食飯試菜。個部長知我哋係老闆嘅朋友，已經打醒精神，但人手唔夠，搵咗個後生女侍應嚟招呼。
其中兩個朋友各自帶咗來自唔同酒莊嘅紅酒嚟，我叫個後生女先倒一支紅酒落decanter度透吓氣，到上菜便斟酒。佢照辦，斟了一巡，decanter仲有一小半酒，個女侍應一聲不響，手快快就將另一支酒倒入個decanter度，嚇得我成個彈起，但要阻止已經來不及，兩支唔同酒莊嘅紅酒混在一起，眾人看到目瞪口呆，幾千蚊一支紅酒，報銷了！
見個侍應係後生女，可能未受過訓練，便平心靜氣對佢講：「你睇兩支紅酒個招紙唔同，唔可以倒埋一齊，好似你飲可口可樂，都唔可以飲飲吓倒支百事落去，雖然大家都係可樂！」你一定以為佢會講句「sorry」，或者「唔好意思」又或者見我袋錢落佢袋會講「多謝你教我」，唔係呀！佢望我一眼，嘩一聲喊咗出嚟，掉頭走，從此全晚不復見。
電郵：
[email protected]
葉潔馨
馨馨細語：廿八蚊後遺症
1 :
GS(14)@2012-05-11 00:06:12http://www.sharpdaily.hk/article/sup/20120510/88248
有線電視報道，深水埗的舊樓，最近治安變差，多了爆竊案，究其原因，係因為最低工資實行之後，保安員薪水大大提升，每月過萬蚊，舊樓業主難以負擔，唯有兩更變一更，夜晚不設防，賊人如入無人之境，好容易做世界。
我有個朋友，開了間麪店，生意本來做得不錯，點知廿八蚊出現之後，班夥計走了一大半，個個走咗去做看更，我朋友呻到樹葉落，跟住請嚟嘅人，唔係捧住碗麪儍笑，就係用粗口鬧客，有個仲話佢：「點解唔畀我飲水吧啲嘢呀？」一言蔽之，新嚟嘅人本來係水準之下嘅，廿八蚊一出現，就出嚟博博。我朋友間麪店o依家已經執咗嘞，佢話咁激氣不如不做。我話佢連累其他夥計失業噃，佢話叫佢哋去問李卓人啦！
咁我就唔知李卓人當日大力促成最低工資時，有冇諗到會發生以上嘅情況。
最近仲話要加到三十三蚊㖭！話香港實施咗最低工資都成年咯，冇乜事發生呀！但據做飲食業嘅朋友講，其實暗湧係有嘅，舊年三一一日本海嘯後，日本食肆間間喊救命，食客去晒其他食肆，酒樓快餐店西餐廳大旺，做成個假象啫。一句講晒，經濟好時可以消化，經濟差時廿八蚊都啃唔落，何況三十三蚊？
尊貴嘅議員們，唔該諗清楚呀！
葉潔馨
2 :
ngsw(26385)@2012-05-11 01:02:1028蚊你請到伙記嗎？請到嘅都只是老弱殘兵有心無力，或偷呃拐騙蹾波鐘。
今年請暑期工都要33蚊啦！
到33蚊立法時，無38蚊你都唔使指意請到人，除非阿CY出招極速隊倒冧個樓市和經濟，咁就可以條理一下。
3 :
kwuntl(19490)@2012-05-11 01:32:2128蚊係不歸路~~ 但係李卓人都會好快失勢玩完~~
4 :
Ar Yan(11362)@2012-05-11 06:53:163樓提及
28蚊係不歸路~~ 但係李卓人都會好快失勢玩完~~
我反而從上次區議會睇到市民點表態
李卓人去天水圍，我猜佢諗住佢搞左最低工資，天水圍班人會選佢，結果當然係输
陳淑莊在富豪區搞連任，結果俾個連咩水都自未知架搞店左（唔好同我講個區會有種票）
兩個階別，對佢地大義架政策，都唔領情
5 :
GS(14)@2012-05-11 22:54:29其實人工加D野照樣加...無甚麼幫忙..
6 :
barryruger(14987)@2012-05-11 23:27:49我覺得純粹係人口質素下降...番工D人真係一個廢過一個, 咁公司點都要有人用, 明知低能都要請住先
以前洗碗3/4K, 而家講緊8/9/10k, 原本洗緊碗果D去左邊?
7 :
GS(14)@2012-05-11 23:30:416樓提及
我覺得純粹係人口質素下降...番工D人真係一個廢過一個, 咁公司點都要有人用, 明知低能都要請住先
以前洗碗3/4K, 而家講緊8/9/10k, 原本洗緊碗果D去左邊?
你是老細?>
8 :
barryruger(14987)@2012-05-11 23:36:547樓提及
6樓提及
我覺得純粹係人口質素下降...番工D人真係一個廢過一個, 咁公司點都要有人用, 明知低能都要請住先
以前洗碗3/4K, 而家講緊8/9/10k, 原本洗緊碗果D去左邊?
你是老細?>
細公司管理層姐...
洗碗保安侍仔呢D工種人工一向唔高但係又差不多, 咁大家都食28蚊, 點解個個而家先轉保安唔洗碗唔係一早就轉??
9 :
tyan(27180)@2012-05-11 23:44:28我話佢連累其他夥計失業噃，佢話叫佢哋去問李卓人啦！
1. <=到時係要求加綜援............
2. 綜援加完......33元都係唔足夠..........
3. 回到1.
10 :
barryruger(14987)@2012-05-11 23:46:50又或者咁睇, 筆者講既"新嚟嘅人本來係水準之下嘅，廿八蚊一出現，就出嚟博博。"我就唔同意, 博就個個都博, 唔博就一係食政府一係食屎...而家又唔係政府派個人要你請左佢, 自己IN自己請既, 請到廢人係HR方面有錯, 唔關28蚊事...用28蚊留唔低好人手, 就真係應該諗下邊度可以有效率D搾多DD比員工...咩價就請咩人, 遇到好人係好運, 當然要留低人幫自己手搵錢.
11 :
tyan(27180)@2012-05-11 23:50:34我係指李卓人動機........佢份工係有野要去做先掂..............
12 :
GS(14)@2012-05-11 23:54:1310樓提及
又或者咁睇, 筆者講既"新嚟嘅人本來係水準之下嘅，廿八蚊一出現，就出嚟博博。"我就唔同意, 博就個個都博, 唔博就一係食政府一係食屎...而家又唔係政府派個人要你請左佢, 自己IN自己請既, 請到廢人係HR方面有錯, 唔關28蚊事...用28蚊留唔低好人手, 就真係應該諗下邊度可以有效率D搾多DD比員工...咩價就請咩人, 遇到好人係好運, 當然要留低人幫自己手搵錢.
即是大家都睇價錢做野
13 :
barryruger(14987)@2012-05-11 23:55:1411樓提及
我係指李卓人動機........佢份工係有野要去做先掂..............
我講緊28蚊本身, 李卓人動機並不考慮, 萬勿誤會, 我打字慢post唔切姐
14 :
barryruger(14987)@2012-05-12 00:03:3912樓提及
10樓提及
又或者咁睇, 筆者講既"新嚟嘅人本來係水準之下嘅，廿八蚊一出現，就出嚟博博。"我就唔同意, 博就個個都博, 唔博就一係食政府一係食屎...而家又唔係政府派個人要你請左佢, 自己IN自己請既, 請到廢人係HR方面有錯, 唔關28蚊事...用28蚊留唔低好人手, 就真係應該諗下邊度可以有效率D搾多DD比員工...咩價就請咩人, 遇到好人係好運, 當然要留低人幫自己手搵錢.
即是大家都睇價錢做野
當然, 所以話僱主比28蚊之後單方面小D工人好跳槽係非常唔公平, 倒不如諗下點保持商業競爭力/對僱員既吸引力...當大家都比咁多, 好人好姐當然做哂D舒服D前途好D既位, 果D死位打靶位一定係重賞先有勇夫, 否則請極都係白痴(唔白痴都唔揀你啦)...做生意都係啦, 好油水既都比最有能力既食哂, 唔通見你個樣可憐, 開條坑比你透氣咩...
馨馨細語：與CEO對話
1 :
GS(14)@2012-05-12 15:17:56http://www.sharpdaily.hk/article/sup/20120511/88733
去潮江春食晚飯，見到領匯嘅CEO王國龍，劈頭第一句就跟他說：「你哋領匯搞嗰個尋味時光意念非常好，點解後來變成咁？」佢話本小冊子一出，幾日內二十萬份畀人攞晒，啲商戶生意多咗，大家都滿心歡喜，點知一個月後，網上有惡搞，跟住就排山倒海，一發不可收拾，結果要提早取消呢個活動。佢仲話本來佢哋計劃一連串嘅活動，分階段為各種不同種類嘅商戶進行宣傳，吸引顧客，提高生意額，而家只好暫時擱置。
唉！啲網民以為搞領匯就可以同啲小商戶出口氣，點知適得其反，如果商場唔做宣傳，吸引顧客，提升人流，到頭來吃虧嘅都係啲商戶啫。
輿論成日話領匯貴租趕客，趁機又問王國龍究竟事實如何，佢話商戶滿約後續租率幾高，有成八成。
佢哋嘅租金係以純內部實用面積計算，即係carpet area，啲柱位、公用地方等等全部唔計。咁又好少有噃，一般商場係用建築面積計租嘅，柱位、'車立'位、樓梯位、走廊等全部計入租內。照咁講，領匯都好公道啫。
同CEO傾完就食飯，呢晚潮江春一如既往，食物可口服務佳，單尾嘅煎伊麵還搞搞新意思，來了個心形，好玩！
葉潔馨
馨馨細語：大元街市
1 :
GS(14)@2012-07-27 11:23:14http://www.sharpdaily.hk/article ... 3%E8%A1%97%E5%B8%82
大埔大元街巿，清爽整潔，光猛衞生，堪稱模範街巿，原來領匯未優化之前，空置率達一半，提升後，原有嘅商戶全部留低，其他不同種類嘅零售店舖亦相繼開設，雜貨、熟食、鮮花等俱全，本來喺對面街行醫嘅中醫師亦將藥店搬來，方便顧客買餸時可順便買藥材湯料，藥店生意亦好起來。
又因為街巿環境改善咗，第二代都肯接手經營，嗰日就見到一個八十後美少女企喺牛肉檔前，手起刀落非常熟練咁切牛肉賣牛肉，一個喺街巿好少見到嘅畫面。本來只做水族生意嘅金魚檔，又因為下一代接手，肯搞搞新意思，連現時很受歡迎嘅寵物例如蜥蜴等爬蟲都有引入，吸引了很多年輕人到此購買心頭好。
做生意不論大小，有人傳承，總係好事。
大元街巿嘅天台有幾間食肆，仲有一個小型有機種植農圃，領匯將街巿剩餘未售嘅蔬菜肉類同廚餘，經機器化解成肥田料，聘專業農夫種植蔬果，所以，喺茶餐廳嘆杯奶茶時，可欣賞窗外一片綠油油，又環保又美化環境，一舉兩得。
領匯肯花心思，將商場街巿搞好，與昔日房署那種「國營」手法，真有天淵之別。
葉潔馨
逢周四、五
2 :
terryyim(13133)@2012-07-27 14:32:47去過，幾欣賞
舖頭唔多，但係勝在夠光猛，夠乾淨
整左條連去商場既樓梯，可以唔駛淋雨買餸
停車場夠闊(除左出入口，依個係死症)
領匯真係識搞起個場
3 :
GS(14)@2012-07-27 14:33:19整左條連去商場既樓梯，可以唔駛淋雨買餸
呢樣領匯入主後慢慢搞緊