特區政府為阻止泛民在立法會成功提出引用「權力及特權法」嚟調查免費電視發牌，在十一月五日發表五頁紙（中文版，英文版有六頁）資料，解釋發牌準則，好明顯係為建制派議員提供彈藥，等佢哋容易啲說服自己，向泛民動議投反對票。呢招係有效嘅，譬如田北辰曾經講過：「想唔到乜嘢理由反對」，但蒙梁振英召見及得到五張紙說明之後，立即好輕鬆咁轉軚，指王維基嘅香港電視財力不及獲牌兩財團。田二少在康奈爾大學讀工程，在哈佛讀MBA，讀書醒目過大佬好多，但在政治上咁鬼滑頭，與大佬北俊投票動向剛剛相反，唔通係特登嘅？做政治對沖（political hedging）呀。
姑勿論如何，泛民動議受否決，乃意料中事，因為鐵底保皇黨民建聯加工聯會永遠係對梁振英小罵大幫忙，西環一吹雞，陳婉嫻譚耀宗一定乖乖地歸隊，其他功能組別議員表面上嘈一輪，到咗關鍵時刻等聽電話指示嘅箒。立法會辯論之日，左丁山在中環行街碰到一位議員，同佢講起政府嗰五頁紙，佢大罵政府官員不濟，梁振英不濟，連笑死中環人嘅理由（即財政能力：包括三個申請者或其相關控股公司的市值及盈利收入、現金流、資產負債比率及申請者將會得到的財政支持）都夠膽拋出嚟，辦事能力之低，令人難以置信。於是左丁山問佢是否會支持泛民動議？佢望咗丁山一眼，然後話：「你都唔細嘅啦？人在江湖，身不由己，我一定要顧及政治現實、投反對票。不如你同我諗一個好理由出嚟。」多謝嘞，議員甚有鬼才，去完廁所坐一坐，已經會諗到一篇演講詞，左丁山有佢咁醒，頭腦敏捷，走位靈活嘅話就競選做議員啦，唔使做爬格子動物。
獅子山學會皮蛋王對左丁山講，佢啲平時出入香港會嘅中環朋友睇完嗰五頁紙，嬲到彈起，覺得現時特區政府踐踏香港市場核心價值（自由競爭，着重白手興家及創業冒險精神），放工後都趕返半山區住所換番件T恤，走落去立法會靜坐。可見得在免費電視發牌事件上，香港人不分財富階級，都一致覺得一男子實在難頂。 