ZKIZ Archives


【賺錢養興趣】哮喘女搞花藝 為的是一塊似紙嘅布

1 : GS(14)@2017-04-12 22:43:11

工作室簡直是花海,但她最愛創作的是手中摺摺摺、俗稱「洗水牛皮紙」的袋及卡片套。



夢想喺香港地屬奢侈品,但唔知點解一有人講追夢,硬係好廉價,可能因為太多人齋講,沉醉懷才不遇之中。真正追夢的人都要取捨,賺錢養夢。



位於旺角的一壹工作室,啲花多到人眼花,上到去以為店主阿慧係個花癡,但其實佢唔特別鍾意花,佢反高潮地說:「因為我有哮喘。」吓?好彩佢個工作室夠多窗,否則真係攞條命來紮花。



紮花不是最愛,但她對美感的觸感一樣發揮得很好。

盡量環保是她創作宗旨,她會花功夫用花餘來染絲帶,實行「自己廢物自己回收」。

油畫卡片套$160

原來阿慧墮入花花世界,紮鮮花製乾花,仲開班教插花,係助養自己喜歡的創作。讀紡織嘅佢心底最鍾意做嘅係橫睇掂睇都似紙、實質係布嘅卡片套同埋袋。「呢隻布可水洗,點撕都唔爛, Levi's牛仔褲後面個tag就係呢個質地。我依家揀呢隻喺德國入口,埋喺泥土下可以28日分解。」大學論文寫如何將紙張融入時裝,從此對紙有情意結,對呢方面創作仲有團火,可惜知音太少。「會買或者覺得值呢個價嘅人真係唔多,有客人話鍾意我做嘅嘢,但唔鍾意佢質感似紙,對唔住呀,我就係鍾意佢似紙。冇人欣賞就放喺度,唔緊要,我自己開心就好。」講嘅時候似有兩分無奈,但我見到八分豁達,十分甘心。



一手一腳自己裝修,慳唔少錢。

開工作室要慳錢,她到西九文化區撿了些活動完結就被棄置的卡板凳回來。凳跟一室佈置很和諧。

興趣當工作好幸福?阿慧就唔係咁睇。「我畫畫老師同我講過好多次,千祈唔好用最鍾意嘅嘢來賺錢,如果你靠佢維生,你會將原則降低。花我唔係最鍾意,但老實講都要食飯,我唔係有錢人。」聽落似向現實低頭,但有啲嘢還是企硬堅持,即使可能要同大客講拜拜。「有啲客會攞其他花店的花束參考圖片畀我,話老闆要一模一樣,sorry,我真係做唔到,真係要尊重創作。就算你要我用一樣花材,我都堅持插法唔同。如果你要確保取悅到你老闆,可以搵傳統花店,你搵得小店應該係要啲獨一無二嘅嘢。」低唔低頭,有啲位真係睇個人。做壞規矩嘅人好多,守原則嘅極罕。



開班教插花總有吃茶點環節,喜歡煮嘢食的她總會預備食物給大家享用。(花藝班$500起)

故事之夜參加者年齡層由18到39歲,氣氛相當好,她計劃月尾再搞。

去年開始佢全職自由身工作,好聽啲叫slash,唔好聽叫唔知做乜。你話,阿爸阿媽點同親朋解釋?「以前我曾經做大公司,買嘢有七折,爸爸媽媽好開心,個女做緊乜都易啲同人講。講做手作,佢哋完全唔理解,會係咁話我,但以上一輩來講,佢哋已經用咗最大容忍度。」家人依家算係半支持,佢就感激三個細佬喺工作室開業時變身裝修師傅。「因為窮冇錢,成個地方都係自己裝修,自己鏟牆、倒地油、髹牆、拆假天花、重裝所有燈。」阿慧畀我睇裝修前的殘舊模樣相,對照依家是旦企邊度影張相都呃到like嘅格局,真係腐朽vs神奇。「我好proud of身邊有朋友同家人幫我實現夢想,真係⋯⋯好難得。」講到咁好難唔喊,係,佢真係喊咗,個心一定係笑住嘅,甜嘅。



工作室唔大,但可能性好大,佢曾經搞過story night,畀人交換故事,交出好多驚喜。「每個人都有啲奇怪故事,可能你帶朋友來,佢講嘅故事,你從來都冇聽過。好驚訝好多人講屋企,甚至講同父母之間嘅裂縫,有人講完甚至話會打電話畀爸爸傾偈。」佢遲啲都會再搞,唔收錢,只要自備酒水上來吃吃喝喝就可。「唔係每一件事都為咗賺錢。」好似係呢個訪問聽得最多嘅一句。香港地有夢想奢侈,有夢想但唔係吓吓諗住點賺錢助養夢想嘅,係奢侈中嘅奢侈。喂,慧,請繼續揮霍。一壹工作室地址:旺角亞皆老街2C啟如商業大廈1903室記者:葉青霞攝影:張志孟、王國輝2017果籽繼續認真知味。識買惜用。行以求知。好事多為。重修舊好。緊貼果籽報道,即like:http://fb.me/AS.AppleDaily




來源: http://hk.apple.nextmedia.com/su ... t/20170411/19986357
PermaLink: https://articles.zkiz.com/?id=330176

Next Page

ZKIZ Archives @ 2019