ZKIZ Archives


【科技籽】貼地劇情+離地愛情 美漫達人:蜘蛛俠紅過Iron Man

1 : GS(14)@2017-06-22 07:43:11

【科技籽:玩物達人】蜘蛛俠電影又來了,劇情boot完又boot,Uncle Ben死完又死,今次還有新意?我不想寫「10個睇蜘蛛俠前必讀要點」,卻想找專家給我們一個「蜘蛛俠幾時畢業懶人包。」Marvel Cinematic Universe電影世界中,Robert Downey Jr.演的Iron Man紅爆,為保票房套套都要客串,但在漫畫世界,蜘蛛俠其實更紅,甚至是Marvel英雄中最紅一位,全因他有貼地背景,又有離地感情線,無樣無錢無時間但多女朋友,實屬人們理想生活,男性最強FF。


黃獎一個月睇超過100本美漫,「因為好多唔同故事,所以差唔多個個星期都有蜘蛛俠新漫畫睇。」

雖然據知今次電影終於沒有Uncle Ben被槍擊死去的情節,但Peter Parker又回到學生時代了,我們看了電影15年,太舊的不說,2002年開始Tobey Maguire的《Spider-Man》到2007年完成三部曲,2012年開始又有Andrew Garfield演的《The Amazing Spider-Man》拍了兩部,Peter仔仲讀緊書,今次手握蜘蛛俠電影版權的Sony終於和Marvel合作拍攝《Spider-Man:Homecoming》(蜘蛛俠:強勢回歸),Tom Holland演的蜘蛛仔又要過中學校園生活。想知電影再怎樣玩之餘,其實沒有看美國漫畫原著的我,更加想知Peter仔現在生活如何?過得好嗎?於是又去找美漫專家黃獎講故事,雖然他說自己只是愛看美漫,不算專家,但一個月看超過100本美國漫畫,看了二十多年,還是由他來說吧。


Peter發了達 上海公幹實情偷食

這個小題夠貼地吧?以下沒有電影劇透,卻有原著漫畫的最新劇情發展,如果不想知道的,請跳過這一段。首先要說的是蜘蛛俠在Marvel漫畫世界中其實差不多最紅,「如果要攞一部出嚟做代表作,一定係蜘蛛俠,雖然近年狼人、Deadpool都忽然紅咗好多,但蜘蛛俠嘅歷史夠長,有感情,求其一個配角都陪咗大家50年,未必好打,但有性格,好似Sinister Six咁,大家好有感情。」黃獎說劇情亦比較貼地,「蜘蛛俠就好似我哋身邊嘅人咁,佢捉嘅罪犯可能只係銀行劫匪等壞人,唔會年年都要拯救地球一次,邊有咁多人想漽滅地球呀?」是的,還有他夠窮,「呢段之前電影都拍過,就係佢出嚟做記者兼職影相,影自己蜘蛛俠嘅相賣畀報館,明知報館鍾意抹黑蜘蛛俠,但為生活都冇計。」嘩,好多打工仔也是這樣過生活呀!「之後講佢去教書,但教書之前好長時間係好窮,窮到冇錢交租,但又要追有錢女朋友Mary Jane。」說到和Mary Jane結婚這裏,開始離地,但又滿足到男性的幻想世界,所以蜘蛛迷仍然看得開心。「感情生活係有啲離地嘅,Peter感情生活好多,係女都鍾意佢,但實際上漫畫設定佢唔係好靚仔又唔係好有型,嘩,冇錢冇樣,最重要係冇時間,仲要有時呃住女朋友唔俾佢知蜘蛛俠身份,現實中邊有咁嘅事?」至於之前提到的「蜘蛛俠幾時畢業懶人包」,黃獎說現在最新連載故事說到蜘蛛俠做過教師之後,已經轉做生意,「?家係有錢佬嚟,搞咗間企業,發明咗類似iPhone嘅手錶,全世界都用,所以佢發咗達,係Parker Industries跨國公司老闆。都係繼續大量女朋友,話就話去上海做生意,實際係想追個女科學家。」返大陸做生意實際為追女?這個劇情又再次貼地,貼到實一實,對香港人來說,身邊絕對有一個Peter仔。說多一點漫畫中Peter的最新感情生活劇情,說到他去上海追女科學家,他不是和Mary Jane結婚了?雖然我明白大陸尤其多二奶和情婦,但事實不是這樣,「有一段故事,係講到蜘蛛俠為咗Iron Man除咗面罩,身份曝光,亦都因為咁,Aunt May(梅嬸)被人襲擊,中槍死咗,於是Peter就同魔鬼做交易,開頭話畀個靈魂魔鬼嘅,但魔鬼話要佢個靈魂冇用,於是要攞走佢同Mary Jane嘅愛情,所以?家佢哋兩個互相忘記咗對方,而且全世界都冇咗佢哋結婚呢段歷史,佢同Mary Jane只係有啲特別感覺,冇發展到拍拖階段。」 



就是這本漫畫,講述蜘蛛俠和魔鬼做交易。

今集電影海報,香港又搶先美國,7月6日有得睇。

其中一個故事,就講到在不同平衡時空都有不同的蜘蛛俠,當中一位是黑人Miles Morales。


由Marisa Tomei飾演的梅嬸,是電影系列中最後生最性感的。

黃獎覺得今集的主角Tom Holland比較貼近漫畫中設定,不會太高大靚仔,因為在漫畫中起初Peter是被同學欺凌的熱門對象。還有旁邊今集登場的肥仔同學,應該係笑料源頭。

今集電影的梅嬸(右)和以前的相比,各有各好,我比較喜歡舊的,很成熟。


新電影下月上畫 混入黑人蜘蛛俠元素

多姿多彩的感情生活,似乎沒有在今集電影《蜘蛛俠:強勢回歸》中出現。「睇咗咁耐預告片,好似都冇乜女主角出場,暫時得個Laura Harrier飾演的Liz Allan,但呢個喺漫畫中只係佢嘅同學,應該冇乜大發展。如果講女主角,預告中出得最多場係Aunt May。」說到梅嬸,Marisa Tomei演嘅呢個,已經係電影系列中最後生最靚最性感,所以黃獎更覺得今集主角Peter其實混入了漫畫中另一時空的黑人蜘蛛俠Miles Morales背景。「漫畫另一個時空(現在又說到兩者已經見面合作)中,有一位黑人蜘蛛俠Miles Morales,佢都係俾蜘蛛咬咗而變成有超能力,又係有個造型好似今集Aunt May嘅阿媽,又係有個肥仔同學係佢嘅roommate,口多多成日爆料畀其他人聽,就好似預告片中着咗蜘蛛俠件衫個肥仔。所以今次電影入面嘅Peter設定,就係混合埋Miles Morales嘅現代元素入去。」奸角方面,今集就係Michael Keaton演的禿鷹Vulture,「喺漫畫入面係一個光頭佬,當然都冇咁機械化,設定低科技好多。」黃獎說他最愛的Marvel角色也是蜘蛛俠,所以對今次電影重啟都有期望。「?家話係會拍三部曲,希望之後Mary Jane會出場啦,不過講到我最想見到嘅,係另一個女主角Black Cat(Felicia Hardy),佢性感又吸引,而且最開心係佢唔使Peter娶佢,得閒又返嚟同Peter拍吓拖,大家望都望有個咁嘅女朋友啦係咪?」黃獎還提到其實Black Cat在之前的《The Amazing Spider-Man2》其實出過場,不過是以真名Felicia Hardy現身,是Oscorp企業的秘書,由Felicity Jones演出,「當時以為呢個角色之後會爆紅,可惜拍唔到第3集。不過,Felicity Jones後來都拍咗《Rogue One:A Star Wars Story》而紅咗。」說了這麼久,就算今次又故事重啟,我都決定要入場睇,有Iron Man參演喎!



活動最強影相位,這個倒轉房間最好玩。

還有大大個蜘蛛網,你可以扮烏蠅。

同場會有1/6 Iron Man Mark XLVII Figure賣,不過限量300個已經售罄。


1:1蜘蛛俠塑像,請勿攀爬。

今集蜘蛛俠的造型,但沒法還原那可放大縮小的眼睛。

自製戰衣版的蜘蛛俠其實造型比較特別,你都可以扮。


蜘蛛俠降臨旺角 三大影位

電影上映多數有活動,不過今次來得早,由即日開始玩到7月13日(電影7月6日上映)。活動在旺角朗豪坊舉行,必定要打卡的有三大影相位,首先是一個倒轉房間的情景,即是你可以好像站在房間的天花板影相,影完將相片倒轉,你就好像蜘蛛俠一樣可以黐在天花板;另一個比較普通,就是有大大個蜘蛛俠和大大個蜘蛛網;最後還有1:1蜘蛛俠塑像陪你影360度全景相,即是你扮被蜘蛛俠打飛,一跳起,360度圍着你的相機便會連拍,變成一條影片給你下載,如果你上載到社交平台再tag主辦單位,還有小禮物收。


《蜘蛛俠:強勢回歸》×朗豪坊powered by Hot Toys

日期:即日至7月13日時間:11am-11pm地點:旺角朗豪坊4樓通天廣場



記者:陳孝義攝影:蕭志南、徐振國編輯:馮秀珍美術:黃創泰




來源: http://hk.apple.nextmedia.com/su ... t/20170621/20062630
PermaLink: https://articles.zkiz.com/?id=336252

Next Page

ZKIZ Archives @ 2019