| ||||||
有錢有面，究竟有無樣睇？幾位富豪李嘉誠、李兆基、鄭裕彤及大劉等，都有一個共通點，就是面有大粒癦，只是位置不同。小宗找來麥玲玲師傅細心睇癦，搵出四款類型。 嗱，四叔粒癦喺眉頭，原來叫「禾稈冚珍珠」，算是正癦，為人聰明，仔女運亦唔錯。港交所行政總裁李小加嗰粒都生正眉毛位。不過兩位小心，隻手會較易整親。而誠哥嘴下面呢一粒，同前國家領導人毛澤東嗰粒屬「同系」，名堂叫「海底尋珠」，晚年運唔錯。玲玲師傅又說：「彤叔喺右邊面呢粒，叫『桃花癦』，女人就風騷，男人就風流！算唔算好癦見仁見智。」大劉面上嘅癦有四、五粒，最突出係兩條眉中間嘅「御龍珍珠」；無論錢銀、女人，都容易你爭我奪，易惹官非。大劉想甩身？可能要脫咗呢粒招牌癦噃！玲玲師傅話，除了睇癦，仲要睇命格、祖墳同面相。幾位富豪，外貌屬厚重，並不單薄，容易獲生意夥伴信任。咁邊個單薄？師傅即刻話CY，「佢叫做青雞面，講過嘅話唔算數。唔係話佢一定唔成功，但呢類相，佢得就全香港人唔得囉！」 職場秘笈找個好班底 港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。我最近看了一本書叫《曹操的啟示》，說出班子和班底的分別，作為管理層一定要識分。有班子，不等於有班底。如團隊內，大部分人只會做崗位以內的事，其餘的事一概不負責，這只能說是「班子」。「班底」中人，則熱愛他的工作，崗位以內的事，固然做得好，崗位以外的事，亦會上心。看到其他人有不足，會主動出手，這就是班底的人才。若有項目做得不好，一般下屬的想法是：阿頭做得不好，與我無關。班子的想法是：自己有責任，但只限於自己負責的範圍。班底的想法：無論如何，責有難辭。班子的特點是：有限的職務，有限的擔當；班底的特點：有限的職務，無限的擔當。班底還特別有責任心，態度忠誠，經得起考驗，什麼事都放上心，會以大局著想，為團隊分憂。在職場上，找到班子容易，找到班底很難。如果有了班底，整個人會踏實起來，亦容易做到一個好的項目。我工作這麼多年，不敢說自己有個好的班底，最多只是有個好的班子。在往後的職場生涯，我仍要繼續尋找好的班底！ 署長雙日軟？ 七一授勳，新懲教署長單日堅榜上有名。七一係單日，而佢堅到得獎，足見其名應驗；但署長唔係日日都堅嘅咩？單日至堅，咁雙日又如何？ 馮景禧個孫小登科 加拿大僑領譚馬士‧馮永發升呢為新老爺，佢個獨仔馮尚賢拉埋天窗。斯日也，成個溫哥華為之哄動，婚宴設喺會展中心，放埋煙花，確是全城盛事。譚馬士乃新鴻基馮景禧、郭得勝、李兆基三劍俠之後；三劍中兩劍已矣，故人之子辦大喜事，尚餘一劍四叔李兆基特登開私人飛機過去道賀，更加主持切燒豬儀式，足見兩家情誼深厚。郭氏兄弟本來亦打算去，但以佢哋現今之境況，點行得開吖。不過，除咗李、郭兩家人，香港唔少大孖沙都有道賀，當中梗係唔少得好似著‧蘇澤光、肥馬時亨等譚馬士伯爺一眾舊伙記；而黎姿同佢郎君馬先生則更加係稀客中嘅稀客。席間新老爺致辭，話個仔雖然含住銀匙出世，但絕非二世祖，佢三十二歲人，至今未坐過頭等機艙云云。心滿意足，溢於言表。恭喜曬！ 銅鐵大王玩賽車 富利堡舊年搞咗個蓮花盃，搵潘炳烈重出江湖，對方意外爆紅（好大可能同佢老婆黃夏蕙有關）。 今年又搵來同樣鍾意賽車嘅郭富城……嘅前女友熊黛林落場，綽頭就十足，但小宗對另一參賽者更感興趣，佢就係開銅鐵廠嘅仇偉冠，聽聞間廠好多大客。仇偉冠愛賽車，當年同潘炳烈齊名o架。除了自己落場，亦籌備不少本地賽事。 頭髮斑白嘅佢，好耐無落場，舊年開始參加第60屆澳門大賽車大師挑戰賽，排第十六，今年要捲土重來咁話！ | ||||||