ZKIZ Archives


籲選委勿再受騙 胡國興懶理狙擊「梁粉好膚淺」

1 : GS(14)@2016-11-08 05:37:07

■宣佈參選特首的胡國興籲選委要憑候選人往績投票。江俊豪攝



【特首跑馬仔】【本報訊】特首選委今天起接受提名至下周一,為明年3月26日舉行的新一屆特首選戰揭開戰幔。搶閘宣佈參選特首、反梁振英連任的退休法官胡國興呼籲成功當選的選委,提名及投票候選人時吸取教訓,不要被蒙騙,「要睇佢歷來嘅行徑,一定要睇歷史」;疑因ABC而遭梁粉張志剛撰文狙擊,胡國興直指梁的智囊「好膚淺」。記者:林俊謙 許偉賢



打着反梁連任旗號進軍特首戰的胡國興接受訪問時強調,參選是因為香港在梁振英治下陷入撕裂,「現時係最唔和諧、最撕裂、最分化嘅社會」,指近年有人討論港獨,「係梁振英迫到啲人冇晒希望,尤其香港嘅年輕人,本應好有希望同理想,但現時冇晒,所以出來嘈」。


「我知乜嘢人講大話」


胡國興相信最深層次的分化,源於很多人認為政治制度不公,例如代表多數民意的政黨,在立法會只佔少數議席,政府亦無視青年意見,認為下屆特首若不能在建制和非建制陣營取得共識,盡快重啟政改,香港只會原地踏步,「乜都做唔到,分化撕裂繼續」。回帶至2012年,參選特首的梁振英確實給予不少人希望,胡國興坦承當年不少選委欣賞梁,因梁稱上任後會落區聽意見、建造和諧社會等,他當時已不太相信,4年下來:「選委都可能發現佢(梁)嘅政綱,或者佢做啲嘢,係可以假嘅」。他指在法律界工作46年,「我知乜嘢人係講大話、乜嘢人唔係」,認為講大話者最常見情況是「前言不對後語、閃閃縮縮」,例如聲稱不見了重要文件,重申至今不能接受政府指橫洲事件中,最重要摸底會面沒有文字紀錄,認為「佢(梁)唔走得甩嘅,因為講大話嘅人,一定走唔甩」。
ABC旗幟令胡國興近日受梁粉攻擊,行會成員張志剛日前撰文批評胡參選缺乏準備,「連中學學生會競選也不如」。胡對此不以為意,反駁「佢啲智囊都好膚淺」,「乜叫中學雞參選?而家我參選咗嘞咩?而家我係表達參選意欲之嘛」。問及梁的班底屢受批評,胡直指:「我估如果叻嘅人都走咗啦」,但亦指部份人或因工作問題而留任,當中個別官員是「好人」。


否認李嘉誠游說參選


政圈盛傳香港首富李嘉誠游說他參選,胡強調「嗰啲唔係傳聞,係測度、係猜測,根本唔啱」,堅稱背後無任何勢力支持。胡國興反覆重申非意在「陪跑」,有信心獲150個選委提名入閘,希望選委擦亮眼睛,吸取上屆教訓,「唔好只係睇紙上談兵、只睇政綱……而家(講到)天花龍鳳,唔知真定假,要睇(候選人的)歷史,要考慮佢哋行徑」。他認同梁振英近年跌至負值的民望淨值,是選委提名和投票時的重要參考。問及如何取得中央祝福,他指中央會相信他的為人,「我有誠信、公平公正、直話直說,不會矯揉造作或欺瞞,處事又公道,所以得人信心,呢樣好重要,中央都會考慮呢幾方面嘅嘢,先諗是否接受到」。




來源: http://hk.apple.nextmedia.com/news/art/20161108/19826413
PermaLink: https://articles.zkiz.com/?id=314381

Next Page

ZKIZ Archives @ 2019