ZKIZ Archives


土炮賀歲 阿倫 卿卿雙箭頭 曾志偉鎮壓黃百鳴

2013-01-31  NM
 
 

 

09年,黃百鳴以大堆頭開拍賀歲片《家有囍事2009》,票房理想,翌年邵氏電影加入農曆年檔戰線,由曾志偉領軍,動用旗下TVB友,以人海堆砌出《72家租客》,創出3,440萬的票房成績,拋離對家黃百鳴《花田囍事2010》一條街。鬥足三年,雙方在本地的票房距離逐漸拉近,今年志偉遠道搵來息影多年的葉玉卿出山,拍住譚詠麟擔正《我愛HK恭囍發財2013》,火併年度華語片票房第二位的《低俗喜劇》班底,由杜汶澤、鄭中基、薛凱琪、吳君如等孭飛的《百星酒店》。蛇年的賀歲檔,曾志偉繼續鎮壓黃百鳴!黃宗澤捱剪

邵氏的賀歲片,一向善用旗下資源,千軍萬馬!三年來沿用同一條橋,兩pair演員同一個角色,後生到中坑。今次扮演主角譚詠麟和葉玉卿年輕版的,是膽拖拍足四年的黃宗澤和徐子珊;戲中黃宗澤有一場為飾演茶客的高海寧頂包扮女人,低胸晚裝加上冬菇頭,呃人兼嚇人,原本是綽頭賣點之一,但礙於片長有限,最終難逃一剪的命運。「吓,真o架?電影公司嘅決定都無辦法,難得高Ling嗰條晚裝裙我都著得落,仲諗住可以俾觀眾對比吓邊個著得好睇啲添!」黃宗澤說。

志偉落嘴頭

移居美國全職相夫教子的葉玉卿,回歸復出,開工兩日,與譚校長和喬寶寶拍攝大型歌舞場面,表現絕無生疏。同譚校長的一場,導演兩take已經收貨;至於同喬寶寶合作的一場印度熱舞,人妻卿卿晒廿三吋腰,冇失禮街坊。據了解,曾志偉趁卿卿將回港為電影做宣傳,已打算再落嘴頭,游說對方多拍一部電影和電視劇。

鄭中基笠戲服

至於埋位幫過邵氏拍《我愛HK開心萬歲》的毛舜筠,今年掉轉槍頭,泊黃百鳴《百星酒店》碼頭,無古天樂無甄子丹,搵來創下三千萬《低俗喜劇》功臣,金馬男配角鄭中基同薛凱琪搭檔,演員片酬慳唔少,但鄭中基仍要用上三小時黐毛扮人狼,再打出一雙零毛腿,出齊法寶。鄭中基對狼人戲服一見鍾情,更將之據為己有。「Ronald話想睇吓囡囡見到自己呢個毛毛look有咩反應,所以拍完就問工作人員攞咗套衫,話留番十月Halloween用!」一名工作人員說。

愈拉愈近

曾志偉、黃百鳴在賀歲片戰場鬥足三年,在香港的票房,曾志偉一面倒全勝,但距離一年比一年收窄,去年輸個馬鼻的黃百鳴,今年能否扭轉劣勢,拭目以待。

曾志偉2010年《72家租客》主要演員:曾志偉、張學友、袁詠儀、黃宗澤、鄧麗欣、鍾嘉欣、王祖藍票房:3440萬

黃百鳴2010年《花田囍事2010》主要演員:吳君如、黃百鳴、鄭中基、楊穎票房:1554萬

2011年《我愛HK開心萬歲》主要演員:曾志偉、梁家輝、吳君如、袁詠儀、黃宗澤、王祖藍、陳法拉票房:2669萬

2011年《最強囍事》主要演員:甄子丹、古天樂、劉嘉玲、張栢芝、黃百鳴、杜汶澤、熊黛林票房:2032萬

2012年《2012我愛HK喜上加囍》主要演員:馮淬帆、曾志偉、毛舜筠、黃宗澤、何韻詩票房:1412萬

2012年《八星抱喜》主要演員:甄子丹、古天樂、陳慧琳、吳君如、杜汶澤、黃百鳴、熊黛林票房:1210萬

PermaLink: https://articles.zkiz.com/?id=43537

Next Page

ZKIZ Archives @ 2019