| ||||||
CEC國際（759）主席林偉駿上週向本刊自爆，旗下零食店阿信屋遭百佳減價狙擊。原來，上月底，百佳已在部分分店內，設置一個名為「人氣味力」的零食專區，不但售賣的貨品與阿信屋九成相似，價錢更便宜一成。初時聲稱「未驚過」的林偉駿，不足一星期後，已轉軚面對現實，劈價迎戰。這場零食大戰，已由搶供應商演變成價格戰，其他街頭零食店亦被迫加入戰團。汰弱留強下，零食市場已進入新一輪洗牌。 擺明挑機的百佳，以將軍澳新都城、青衣長發邨及大埔超級廣場三間分店打頭陣，開設日式零食專區「人氣味力」。以新都城百佳為例，為狙擊阿信屋在寶琳區內的三間分店，新設的零食專區面積甚大，又附設專門的收銀機，猶如店中店。不過，專區明顯「人氣」不足，由於缺乏宣傳，不少顧客仍未留意店中店的存在。其中，顧客詹先生指一向幫襯阿信屋，但表明﹕「百佳如果咁平，都會幫襯，主要睇嚇邊間鋪頭方便！」 內外包抄大石責死蟹 面對百佳的新一輪攻擊，上月底已收到風的阿信屋老闆林偉駿，初時表現淡定﹕「未驚過，唔擔心！唔會減價同佢鬥賤賣！」不過，是次百佳針對阿信屋較受歡迎的產品來狙擊，例如大包裝百力滋，阿信屋賣十八元，百佳減價至十六元二角，平一成。韓國農心辛辣麵，阿信屋賣二十五元，百佳減至二十一元五角，其他貨品的售價亦貼近或低於阿信屋。有指三間分店試業成功後，百佳有意將專區擴展至一百六十多間分店，實行大規模圍剿有一百八十間分店的阿信屋。上週四，林偉駿再度回應，神情變得緊張﹕「今次百佳來勢洶洶，好有計劃。以前我唔俾手下去其他對手鋪頭格價，覺得計好自己條數就夠。但今次好多手下日日都去百佳影相俾我睇！」林偉駿的助手壹哥打開匿名郵件，對著郵件內百佳通訊的署名指出﹕「格價通常係銷售團隊嘅工作，但你睇，百佳今次出動到COO（首席營運總裁）嚟指揮呢場大龍鳳，真係好大件事。」林偉駿隨即下令加入減價戰，並作針對性部署，先於將軍澳區內八間分店做八折減價，連過往不減價的公價貨品亦有九折，如辛辣麵減至二十元，較百佳再便宜一元五角，百力滋則減至十六元二角，與百佳睇齊。林偉駿表示﹕「呢場減價戰唔知打到幾時，得益嘅係市民，好彩百佳只係揀五十樣貨同我鬥，如果揀得多，我就麻煩啦！而家減到咁平，真係冇乜錢賺，唯有節省成本，例如睇嚇物流方面，而家每日上廿籠貨，咪睇嚇可唔可以上多兩、三籠。」 汰弱留強小店難生存 兩大零食巨頭帶頭減價，另一連鎖超市惠康暫時未有動作，但一眾零食小商戶已被迫加入減價戰。其中分店較多的零食最強及食神傳說等，與阿信屋相同的貨品，已減價至阿信屋的九折「會員價」。在慈雲山開零食店的「金田井」老闆Chris，對前景甚為悲觀﹕「減一啲係有，但個餅係得咁大，再減邊有錢賺？再係咁落去，咪執鬼咗佢囉，都冇錢賺嘅！」至於已被打到落花流水的零食物語，近年由地鋪退至商場鋪，有行家透露﹕「佢母公司四洲靠批發零食賺錢，零食物語係冇乜錢賺，但唔會執，因為要托住個零售價，批發價先夠高，係商業策略。」另一家曾風靡一時的優の良品，早已轉攻強國客，避開主攻OL、師奶的零食戰場。 阿信屋的成功例子，吸引各路投資者加入零食市場。其中，由黑龍江市政府出資，引入該市六十四間綠色食品公司作分銷專賣的龍港匯，上週在北角開設首間分店，專賣有機小食，被內地傳媒稱作「綠色版阿信屋」，揚言要開三百間分店。另外，商舖炒家林子峰有份出資的優品360，亦擁有十一間分店。不過有行家踢爆﹕「好多鋪係林子峰租番俾優品360，想靠間鋪托住個租務市場，生意未必賺到錢。」事實上，零食利潤微薄，毛利潤只有個位數，減價隨時觸發倒閉潮。在旺角花園街的「1027」，由貨品到價格都抄足阿信屋，但開業兩個月即執笠，有業內人士分析﹕「嗰度月租成廿萬，賣零食點做得住啊，阿信屋一間店每月都係做廿零萬生意咋！」不過，阿信屋今次減價戰情況亦不樂觀，有中資基金經理指，百佳今次減價，就像當年劈價賣豬肉狙擊街市檔一樣﹕「今次百佳應該壓咗供應商個價，但照收『上架費』，就算用來貨價去賣，都有錢賺，又唔使責貨，但阿信屋要用真金白銀去外國攞貨，打持久戰嘅話，阿信屋實輸！」 | ||||||