ZKIZ Archives


中環在線:韓國股神靠李寧翻身 李華華

2008-11-10  AppleDaily

被稱為韓國股神的朴炫柱,旗下基金Mirae Asset投資港股,之前買入蒙牛(2319),點知毒奶事件令蒙牛股價一沉百踩。不過,韓國股神冇有怕,繼續喺港股尋寶,今次押注前體操王子李寧。

港交所(388)資料顯示,Mirae Asset喺上個禮拜二,以每股11.28蚊,增持117萬股李寧(2331),涉及金額1320萬銀,以李寧上個禮拜五收報12.14蚊計,暫時賬面微賺百零萬。

蒙牛累損手

韓 國股神今年7月掃咗110.8萬股蒙牛,每股23蚊。到9月蒙牛得番8.36蚊時,佢賣咗1852.8萬股止蝕,單睇7月時入嗰110.8萬股,朴炫柱就 唔見咗1622萬銀。除咗俾蒙牛累,韓國股神亦陸續沽咗啲中國南車(1766)、招行(3968)同招金礦業(1818)。至於李寧係咪可以幫佢翻身,就 唔知咯。
PermaLink: https://articles.zkiz.com/?id=3149

主席男神靠90後上市秘笈

2015-06-25  NM


葉碩麟(Alan),外表唔講得上靚仔,帶一點點老成,身高五呎四吋,點睇都唔似男神。「喂,男人睇樣o架咩?」記者的中女WhatsApp group傳來這句回應。「最緊要有錢又夠上進。」朋友,你太直接了吧。 屯門居屋仔,中大畢業,二十六歲創業,今年三十三歲,已做埋上市公司主席。他的超凡網絡(8121),主力幫其他公司在網絡上營銷。新經濟創造新財富,上月尾公司於創業板配售上市,股價單日升十倍,Alan身家一夜過億。嫌這樣的情節「堅離地」,九十後自問做不到他的一半,不妨考慮當他的員工:生日有假放、三個月出一次花紅、半年加一次人工……而以下這件事最「現實」:他正打算幫員工上樓。

十個老細九個話:「請九十後流失率高,麻煩!」無他的,據統計,九十後平均月入一萬,就算月儲三千,也要十幾年才夠錢買樓俾首期;既然如此,不如及時行樂。Alan,是那第十個老細。他的超凡網絡,主要做互聯網營銷,即透過facebook、apps及微博等互聯網渠道,為品牌度橋宣傳。他公司百幾個員工,八成是九十後,貪他們夠快夠創意。Alan認為他們有供樓壓力,便不會隨便辭職,他說:「樓價平貴,我控制唔到,但我希望幫到佢哋上車。」年初他借錢予一位同事買入沙田上車盤,零息,日後分期還款,「都係借月薪幾倍啫。」見同事上車後,更緊張工作,他考慮研究把計劃擴至全公司,但要求員工任職至一定年資,「你寫出嚟,我怕聽日返工,嚟見工嘅人排到出門口。」

三個月一次花紅

在互聯網的世界,最緊要夠快,「九十後速度快,你見佢哋個個打《Winning》打得咁勁就知。」考慮到這種特性,花紅,三個月出一次,由直屬上司評核,分A到C-來釐定花紅金額,最好到最差,相差幾千元,「好似打機咁,三個月後reset,即係輸咗再嚟過。」加薪,半年一次,「我哋有work and development plan,睇得出佢哋對於自己嘅學習好着緊。」記者跟着Alan在辦公室巡了一個圈,幾乎無員工會叫他一聲「葉生」,「佢哋就係唔鍾意hierarchy(階層),鍾意自己話吓事。」公司年初搬到北角友邦廣場這過萬呎的辦公室,六間會議室全由低層同事設計,布置WhatsApp對話、Lego房等。能給他們話事,成本又不高。在那裡還可以打乒乓波、打機,有休息室也有免費零食,連微波爐都有八部!「以前得一部微波爐,員工叮飯要排二十分鐘,好浪費時間。」這些「員工福利」,在外國Google、facebook等辦公室運行已久,但香港少見。「佢哋人工只係market price,九十後唔一定要好多錢,佢哋要嘅係自由。」採訪在早上十一時,記者見還有很多同事未上班,Alan指公司實行「彈性上班時間」,「以前要同事準時返工,但個人返咗嚟,做嘢無passion。」Alan希望員工有歸屬感,上月公司掛牌翌日,宣布全公司放假一天(平時還有生日假,問你死未!),「有的同事放假當日上晝行街,下晝自動波返公司做嘢。」例如九一年出世的Nic,香港大學新聞系畢業,在超凡打工兩年已升仙(senior),他說:「我之前喺台做,同事年紀差距好大,唔好玩。呢度個個九十後,放咗工一齊留喺度打機。」他指每天上班奉旨玩facebook,又可以寫作,是他夢寐以求的工作,「我鍾意寫嘢,我指嘅係篇文好短嘅嘢。」

創意玩到上太空

對七十後老闆來說,Alan對員工似乎過於寬鬆。但就是九十後的創意,令Alan有得發圍。前年青年亞運會,Alan的公司負責幫主辦機構,推廣往四十多個亞洲城市。他們想到在facebook招攬一百個有關體育的感人故事,再翻譯成多種語言,每個故事最後有十幾萬人瀏覽。去年的青年奧運會,Alan更玩到上太空,「同事整咗個app,用手機shake一shake就可以傳火炬,大家話不如傳到上太空。」於是他們向南京主辦單位提出,對方找來國家航天局合作,最終真的由「嫦娥三號」把電子火炬傳上太空。○七年,當大家還在玩Friendster、My Space,他和幾個柏檔已經覺得facebook將勢不可擋,故每人夾數萬元,在旺角百寶利大廈租了個不足二百呎的寫字樓,發展「facebook事業」。試過為女性用品Lactacyd度橋,透過facebook設計心理測驗,軟銷產品,一次製作可賺十幾萬。不過當年並非一開始就賺錢,「大品牌淨係會落傳統廣告,佢哋仲講緊MSN同search engine呢類字眼,咩係facebook呀?當初接埋好多都係小生意。」到金融海嘯,甚至有三個月時間一毫子生意都無,「所有公司hold起廣告開支,我哋惟有樣樣慳,影印紙都要慳住用。」三個月後,大公司重新檢討廣告費,他們的機會來了:「佢哋覺得網上賣廣告,成本低成效大,嗰年開始生意就直線上升。」

華誼二千萬入股

現時其公司除了有facebook部、還有微博部、微信部。「客仔」如九巴,想到高登搵「負評」,都找Alan幫手。他們替品牌一次過在不同網站落廣告,每個小時更新成效,「喂呢個網站無點擊率喎,即刻改喺高點擊率嘅網站落廣告。」近來流行拍片,他們也開始有自己的拍片部。記者問他發展是否太順利?「其實有好多橋唔work,不過互聯網嘅世界行得好快,好快已經搞其他嘢,唔work嘅嘢大家轉頭已經唔記得。」兩年前私募基金HGI Growth Capital想入股其公司,而該基金老闆熟悉內地廣告業,因而認識華誼兄弟,知道對方正想發展互聯網營銷業務,故拉埋華誼一起入股。「華誼嘅股東係騰訊同阿里巴巴喎!我即叫基金安排,飛上北京見佢哋。」對方決定以小本二千多萬元入股兩成。有華誼兄弟這個大靠山,公司業績突飛猛進,上月更於香港創業板上市。Alan說:「華誼兄弟好鼓勵我哋,話佢哋未上市之前,值幾十億,而家市值都五百幾億。」公司配售上市,不發新股,Alan及華誼等股東持貨近六成,貨源歸邊,上市當日股價一度「chok」升十倍,市值現時一躍至十二億。

年報顯示去年淨賺八百多萬,超凡由二百呎辦公室、搬到過萬呎的乙級寫字樓。Alan亦由屯門居屋,搬到元朗爾巒居住。過去曾有不少公司向他們提出收購,其中一間來自英國,出價億二,「其實算係share swap,佢主席係IBM出嚟嘅,係幾大嘅Synergy。」但埋門一腳告吹。 Alan最終和華誼兄弟合作,發展更好。現時Alan持股百分之十四點九四,華誼持十四點九三。雙方差距甚少,華誼王中軍早前受訪講明入股可學習在港併購融資。華誼亦已派人入了董事局,但Alan不怕被趙起:「假設佢哋日後想買(公司),相信提出嘅方案都係win win嘅!」

像波鞋的Air

Alan推銷自己的能力,在中文大學讀書時已初見。記者認識Alan的同學,讀工商管理的他,當年介紹自己為Air Lun,說像波鞋的air能跳得更高。最初聽完同學們都覺得他「傻傻哋」,「但成個中大咁多Alan,好多教授、同學係記得佢囉。」「主席男神」無first hon畢業,但interview表現好,未畢業已獲P&G羅致,跟的客仔包括Rejoice及Vidal Sassoon。想創業學管理,他辭工轉去中小企,一做兩年,「我最初開細公司,轉工先學到需要嘅管理技巧。」創業不久,本刊已曾訪問他,他憶說:「你哋好認真,影張大相,我條鞋帶個蝴蝶結偏埋一邊,攝影師幫我分番兩邊。」做事認真的人,才覺此舉叫「認真」,而不是「煩」。超凡現時的非執董項明生,幾年前為超凡旗下的Travellife網站合作搞講座而認識Alan,覺得他好勤力,「好多單佢自己劈返嚟,講instagram、微博點玩佢非常熟,你話有幾多老闆係自己玩o架?」記者和他同屆畢業,六年前還是個常發白日夢的打工仔,Alan已諗上市夢。上月夢想成真,身家一夜過億,而記者只是在諗抽新股,搏賺那幾千元。「紙上富貴,我一蚊股份都無賣過,無錢落袋,而家咪又係食茶餐廳。」他說。這個「主席男神」前年已婚,「佢同佢老婆拍拖十一年,難得有錢都咁長情。」記者的中女WhatsApp group老友說。 假如「洗米華」都能在facebook有粉絲專頁,始終如一的Alan女粉絲,理應更多。

 


PermaLink: https://articles.zkiz.com/?id=150554

Next Page

ZKIZ Archives @ 2019