維基幫泛民助選超區鄺神係首選
1 :
GS(14)@2016-09-03 23:23:39港台舉行港島區競選論壇，首度出戰嘅王維基有反常表現，喺自由搏擊時間一直寡言，就連對手挑機，佢都簡短回應甚至打叉手勢唔答，唔通係怕講多錯多？原來佢留前鬥後有個目的，專登留低分幾鐘，一輪嘴讀出五區加超區嘅心水推薦名單，當中除黃毓民外無其他熱普城同青政候選人，而清一色泛民同佢自己之外，新東自由黨李梓敬成唯一獲薦建制派。點解咁慷慨用自己發言時間hardsell其他候選人？王維基話喎，真係唔想選民嘥票，如果議會唔夠反梁力量，香港好大鑊，所以推薦名單上係有勝算嘅候選人，希望一齊入議會開展反689大戰！佢甚至之前問過律師意見，會唔會被質疑無獲相關候選人確認支持及招致選舉開支？律師話係選舉論壇，無任何開支，所以無事。原來佢近日搭的士，有司機問佢：超級區議會投邊個好？佢叫司機撐民主黨鄺俊宇，因為佢係有可能砌低民建聯周浩鼎嘅候選人，相信係民主黨涂謹申同街工梁耀忠外最有機會嘅超區第三席。至於點解熱普城中只有毓民獲薦？王維基話睇落毓民都係較有勝算；而其他撐港獨人士，一律非佢心目中嗰杯茶喎。王維基推薦名單超區：涂謹申、梁耀忠、鄺俊宇港島：王維基、許智峯、陳淑莊、何秀蘭九東：譚文豪、胡志偉、譚得志九西：毛孟靜、黃碧雲、黃毓民、劉小麗新東：楊岳橋、梁國雄、陳志全、張超雄、林卓廷、范國威、李梓敬新西：郭家麒、李卓人、尹兆堅、黃潤達、朱凱迪各區其餘參選名單詳見此網站：
http://hk.apple.nextmedia.com/legco2016/region#info-all
來源:
http://hk.apple.nextmedia.com/news/art/20160903/19758852