夾硬搬劇上大銀幕《十月初五》破壞口碑
1 :
GS(14)@2016-08-16 06:11:25如果呢個世界有條成功formula，或者大台就唔使咁頭痕。呢幾年香港有叫座力嘅劇集一年都未必出到一套，有時難得出到套好劇，都鍾意改做電影版再吸多次金。但畫蛇添足往往都冇好結果，就好似下面呢幾套咁，有時落埋畫都唔知佢有拍過：《十月初五的月光》：張智霖同佘詩曼00年嘅神劇，講唔到嘢嘅張智霖用兩短一場嘅哨子聲代替「我愛你」，冧盡萬千少女。事隔十五年，上年翻拍電影版，結果只係收得1,100萬左右。「MK活地亞倫」葉念琛夾硬將初哥哥最後弄成失憶，令佢同祝君好最後仍得不到大團圓結局，令不少苦等十五年的fans大為失望，更有不少網民斥此舉「毀童年」。《衝上雲霄》：電影版掛名係《衝上雲霄》系列，不過劇情扭轉，除咗都係講機師同空姐，好難同原作拉上關係。令人詬病嘅係，原本感情專一嘅Sam哥吳鎮宇，喺戲中無厘頭鍾意咗鄭秀文，完全破壞角色形象。電影版有大堆頭明星加持之下，票房去到2,163萬，叫做有交代。《Laughing Gor之變節》：謝天華09年翻身之作《學警出更》嘅角色，表現好到大台要開多套劇搵佢做主角。唔止咁，《學警出更》09年初先播完，8月中就拍成電影版《Laughing Gor之變節》上畫，食得住個勢有1,500萬票房；點知大台兩年後再添食，拍咗套《Laughing Gor之潛罪犯》，票房跌到去得番600萬多啲。《勁抽福祿壽》：由搞gag節目《荃加福祿壽》到劇集《荃加福祿壽探案》再到電影版《勁抽福祿壽》，憑住搞笑情節先挽回唔少支持，票房啱啱好過咗650萬。《刑警兄弟》：今年4月上畫嘅電影，可能聽都未聽過。由黃宗澤同金剛主演，齋睇男主角已經唔吸引，其他主要演員只係得方皓玟、徐子珊、湯盈盈咁......結果呢套戲上咗28日，票房只係得81萬左右。《人約離婚後》：又係大台班底，葉念深執導，主角係佘詩曼同羅仲謙，結果變成TVB師奶嘅大銀幕版，最終票房過咗600萬就上唔到去。
來源:
http://hk.apple.nextmedia.com/entertainment/art/20160815/19736763