ZKIZ Archives


入迪士尼搗亂?石天欣呼籲:唔要嘅玩具放番原位

1 : GS(14)@2016-07-09 06:36:04

「石破天欣」石天欣前年離開大台,之後就去咗迪士尼做part time,噚日佢喺instagram到話自己都要離開呢個咁開心嘅樂園喇。一向敢言嘅天欣,之前佢就為咗何韻詩嘅Lancôme事件,同經理人炒大鑊,今次佢離開迪士尼,佢都好有心咁留番啲溫馨提示俾大家。石天欣噚晚ig到留言話:「唔覺唔覺,今次喺迪士尼都(可以叫)做咗差唔多十個月,我真係好鍾意好鍾意喺度返工,因為我啲同事都係好可愛同有禮,所以做迪士尼應該都係筍盤,同埋我好想講呢,其實0依家樂園人手唔係好足,所以大家可以嘅話都麻煩有手尾啲,拎完、睇完或者唔要嘅話,麻煩拎翻原位呀!我個人意見嚟嘅啫,我成日深信如果所有人都有呢個心,大家工作都可以輕鬆啲(係所有行業)」有網民見到天欣原來要離開樂園,都有啲唔捨得,有啲傷感咁話:「咁就見唔到你喇!」亦有人讚天欣嘅溫馨提示即讚:「天欣愛世人!」真係好有愛!其實除咗樂園,相信好多人行街時,去到一啲大型商店,都會見到啲貨俾人摷到亂晒,其實好似石破天欣話齋,只要大家睇完放返原位,多一啲同理心,大家工作都會輕鬆啲!





來源: http://hk.apple.nextmedia.com/entertainment/art/20160707/19684447
PermaLink: https://articles.zkiz.com/?id=302911

赴美秘密行禮石天欣着$100婚紗慳嫁才俊

1 : GS(14)@2016-07-17 16:01:34

【拉埋天窗】■石天欣於香港時間昨日凌晨,在美國秘嫁拍拖四年的男友Jacob。



在港女的年代,婚禮要豪使,婚紗又說一生人着一次要靚,不過這個世界仍然有「慳家新娘」石天欣!石天欣於香港時間昨日凌晨,在美國秘密跟拍拖四年的圈外男友Jacob拉埋天窗,她穿上一條白色通花lace襯肉色婚紗行禮,簡約而優雅,榮升李太的天欣昨越洋受訪時笑言:「婚紗簡單而隆重,係好平好平,如果冇記錯,應該平過港紙100元。」


現年23歲的石天欣經常在無綫劇飾演「被強姦受害人」,前年離開無綫,之後去迪士尼做part time,日前她宣佈在迪士尼last day,原來等嫁才俊。石天欣於香港時間昨日凌晨,即美國時間前日早上10時許與認識六年、拍拖四年的圈外男友Jacob拉埋天窗,由男方父母作見證榮升李太。原來天欣三年前已決定嫁Jacob,當年更去了法國預支蜜月,她昨日越洋接受電話錄音訪問,搞笑扮訪問老公仔,問老公叫甚麼名,老公乖乖配合說:「Jacob!」做甚麼工作?老公亦簡短回答:「Marketing。」



婚禮埋單唔使一千

天欣稱今次是一個簡單的婚禮,連婚紗也是價廉物美貨色。相中見Jacob穿上灰色西裝,而天欣則以白色通花lace襯肉色婚紗,再配一對四吋的肉色高踭鞋,簡約優雅,她笑說:「婚紗簡單而隆重,係好平好平,如果冇記錯,應該平過港紙100元。」為何這麼便宜?她解釋:「因為係淘寶買,自己諗點改,再搵人車。」原來婚禮連攝影師都沒請,她說:「結婚相係我哋自己去草地set腳架影嘅,而簽紙過程就由佢爸爸負責揸機,所以連最後kiss鏡頭都影唔到,好好笑。我諗整個婚禮加埋都唔使1,000蚊,花錢去食去玩仲好啦!」雖然好簡單,但一對新人宣讀結婚誓詞一刻仍然好認真莊嚴,兩人一直緊握對方的手,表現緊張,雙方講完「I will.(我願意)」後便交換婚戒。



【淘寶嫁衣】■天欣的lace婚紗裙是淘寶貨,自己改款後,埋單亦不用一百元,認真超值。

【捉實手仔】■天欣與Jacob宣誓時緊握對方的手,顯得有點緊張。





【肉緊錫錫】■一對新人享受平淡是福,婚照都是自己set相機拍攝,好慳家!

■天欣離開無綫後,四出兼職,早前曾在泡泡足球場任遊戲指導員。資料圖片



「想快啲有小朋友」


天欣透露求婚過程也不算特別浪漫,她解釋:「好似討論得出,之後佢都有認真求過一次(婚)。」宣誓一刻是否很緊張?她說:「因為佢喺三年前已經求咗婚,到而家先做就唔係咁緊張。美國呢邊都係要跟住講,我唔係好知自己要講啲乜,覺得自己係有啲蝦碌。有冇喊?一開始主持講嘅時候,都有啲想喊,不過好在最尾都冇喊。」由於天欣的老公是在美國工作,問到婚後會否移民兼退出娛樂圈?她說:「一半一半,如果香港有好吸引嘅工作,我都會返香港。」年紀輕輕便結婚,問是否奉子成婚?她說:「唔係啦,我哋上一年,差唔多成年冇見過,但佢都好想快啲有小朋友。」天欣昨晚在Ig正式宣佈自己榮升做李太,不少好友都送祝福。她自爆與老公以「死人頭」和「香蕉頭」稱呼對方,因為大家都是大細路喜歡minion,她直認兩人「超唔夾」,但一凹一凸反而互補不足。看似閃婚的天欣,上月已開始在社交網「洩蜜」,日前便貼出只得半截樣的高大猛男合照,並用英文寫了一段愛的宣言:「四周年快樂!雖然我們遠在千里之外,但經過兩年的長距離戀愛,終於可以在一起!」採訪:嵐山





來源: http://hk.apple.nextmedia.com/entertainment/art/20160717/19698143
PermaLink: https://articles.zkiz.com/?id=304056

長距離戀愛終於修成正果 石天欣fb晒戀情

1 : GS(14)@2016-07-17 16:01:36

其實喺石天欣公開婚訊前,早排已經喺fb公開咗「老公」身份。雖然當時只係貼咗男友半截面嘅相,不過睇到佢個樣好冧,石天欣仲用英文寫咗一段愛的宣言:「兩年長距離戀愛後終於可以一齊!知道我哋會鬧交,為咗一啲無謂事而嘈。我哋好大壓力因此我哋唔知一切事會點,我哋唔知對方會唔會放棄維繫呢段感情。失去承諾及信任,但最後我哋知道一切係值得,我哋會捱得過,所有事會變更好。我有信念因為我愛你,撇開一切發生嘅事,到最後,你是值得的。」公開戀情後,有唔少網民留言恭喜。





來源: http://hk.apple.nextmedia.com/entertainment/art/20160717/19698541
PermaLink: https://articles.zkiz.com/?id=304062

Next Page

ZKIZ Archives @ 2019