胡孟青在蘋果財經版專欄寫咗兩日中電，有朋友以為佢「勒索」中電賠錢，每年拎三億元出嚟回贈中電客戶，左丁山識佢咁耐，睇真啲，自然知道佢想講乜。這年頭，不少人以為大聲啲，示威惡啲，就會爭取到著數，至於講道理喎，咪各自表述囉，總之你唔答應我要求嘅話，你就係閉門造車，黑箱作業，諮詢全無，誤導公眾。
八月十六日睇報紙圖片，有「綠色和平」職員數人走入西洋菜南街嘅中電資訊中心抗議，靜坐地上後唔肯離開，對使用中心服務之市民造成不便。佢地掛起英文標語：Promise Hong Kong Save Energy1%（按：英文不通，嗌口號亦唔通順），真正要求係乜？要求中電每年撥款三億元，資助客戶更換節能裝置，以達致每年節省能源百分之一嘅目標喎。
節省能源，慳電費，係人都識講，問題係點樣做，譬如消委會測試十二款雪櫃耗電量，估計如果用西門子型號，每年全年電費約290元，用三菱電機一隻型號就要585元，高低相差近倍。左丁山屋企用開嘅Panasonic，一年用電430元，如果要節能嘅話，大家咪全部根據消委會要求，改用西門子雪櫃囉，但香港係佛利民所講，可以「自由選擇」嘅地方，買雪櫃或要照顧廚房面積大小及其他主婦考慮及嘅因素，故此西門子雪櫃並非香港最暢銷雪櫃，唔通政府與中電要強力勸喻大家為咗節能，改用西門子雪櫃咩。
節能係公司、商場，及家庭各自分別處理嘅事情，關中電乜嘢事？天下間邊度會有一間上市公司股東（如中電）俾錢另一間上市公司股東（如地鐵）嚟鼓勵佢買少啲本公司產品（電力）嘅事情㗎。普天下商家莫不視削減成本為第一要義，電費便宜就用多啲電，電費貴啲就想盡辦法慳電，此是不易之理，譬如睇領匯年報，就知道領匯每年都可以減低電費支出或保持極低增長狀態，不須中電送錢嚟鼓勵，或由中電代佢更換節能裝置。如果綠色和平嘅要求得逞，海港城、奧海城嘅大業主最高興，吳光正、黃志祥不妨做嚇啦啦隊吖。
（按：前曾提及聯合書院院歌作曲人Susan Tan之父親為陳蘭方，實陳能方之誤，謹此致歉。） 