ZKIZ Archives


堅盧治再摘金棕櫚康城影展 噓聲中閉幕

1 : GS(14)@2016-05-24 10:28:02

【第69屆康城影展】第69屆康城影展於香港時間昨日凌晨舉行的閉幕頒獎禮,在一片爭議聲下結束,金棕櫚大獎由79歲英國導演堅盧治(Ken Loach)執導的《I, Daniel Blake》奪得(詳見附表),是他相隔10年再獲此殊榮。由澳洲名導佐治米勒(George Miller)率領評審團包括姬絲頓丹絲(Kirsten Dunst)及Vanessa Paradis,昨日在閉幕禮揭曉的賽果惹起爭議,大部份獲獎作品於賽前口碑麻麻,甚至乎劣評。堅盧治的作品《I, Daniel Blake》雖未有引起太大迴響,仍擊敗賽前大熱的德國喜劇《Toni Erdmann》奪金棕櫚大獎。這是堅盧治繼2006年《風吹麥動》(The Wind That Shakes the Barley)後,再次獲得此殊榮。當米路吉遜(Mel Gibson)與佐治米勒一起宣佈賽果時,全場畀面地起立拍掌。堅盧治的新作向英國福利制度作出控訴,他獲獎時說:「多謝影展支持這一部代表了人民對抗強權的電影,我們要透過電影發放希望,去相信另一個世界是可能的。」



■眾得獎者在台上合照,不過影展賽果引起很大爭議。路透社

■堅盧治的金棕櫚作品《I, Daniel Blake》反映對英國福利制度的不滿。劇照



影后結果爆冷

康城影展「親生仔」加拿大導演Xavier Dolan,兩年前憑《慈母多惡兒》(Mommy)奪得評審大獎,去年升呢成為康城評審。他今年憑《It's Only the End of the World》再上一層,奪格蘭披治大獎,不過由於該片評價差勁,記者室爆出一片噓聲。Xavier致辭時激動得哽咽,多謝評審明白他透過電影所表達的情感。張曼玉前夫、法國導演阿薩耶斯(Olivier Assayas)的作品《Personal Shopper》在試映時頻頻傳出噓聲,不過阿薩耶斯仍然與《Graduation》羅馬尼亞導演基斯安文橋(Cristian Mungiu)一同獲得獎項。康城影后結果爆冷,由菲律賓女星Jaclyn Jose憑《Ma’Rosa》獲得,她上台領獎時表示為得獎感驚訝。而影帝則由伊朗電影《The Salesman》男主角Shahab Hosseini奪得,該片亦獲最佳編劇成為大贏家。撰文:泰米



■任頒獎嘉賓的米路吉遜與女友行紅毯咀嘴晒恩愛。

■評審成員姬絲頓(右)及Vanessa一同頒獎。





來源: http://hk.apple.nextmedia.com/entertainment/art/20160524/19624558
PermaLink: https://articles.zkiz.com/?id=301284

老而彌堅 堅盧治 2017-02-03

1 : GS(14)@2017-02-06 12:13:57

https://www.am730.com.hk/news/%E ... B%A7%E6%B2%BB-16301
舊年康城影展嘅競賽單元作品水平不一,多部電影表現差到令人O嘴,賽果固然備受質疑,尤其是阿契仔薩維杜蘭獲得評審團大獎,之但係,就冇人質疑兩奪最高榮譽「金棕櫚」大獎嘅英國導演堅盧治。原因唔係佢貴為大前輩或者「種子級」人馬,而係因為,佢出道逾50年間對英國社會貢獻良多,藉電影為工人階級發聲,更成為佢招牌式電影題材。
文:Wing


news-images
今年80歲嘅英國導演堅盧治。
news-images
堅盧治入行多年,依然事事親力親為,唔止親自做資料搜集,現場拍攝亦跟到足。
news-images
女主角同樣係福利制度下嘅受害者,同貝丹尼互相扶持。
話退唔退「決定太輕率」
呢位年屆80嘅英國左翼導演,牛津法律系畢業,唔做律師,反而走去做收入差天共地嘅導演。1961年出道嘅佢,66年憑戲劇《Cathy Come Home》闖出名堂,以一對年輕新婚夫妻嘅遭遇,批評政府僵化嘅福利及房屋制度。今年剛好係呢部成名作面世50周年,舊年,堅盧治話《翩翩舞自由》將會係佢收山之作,諗都冇諗過可以睇到另一版本嘅《Cathy Come Home》——《我,不低頭》。而佢之所以唔退休,老人家受訪時只丟下一句:「當時決定得太輕率。」


年長版《雙失十六歲》
基本上,《我》片每幕戲都充斥堅盧治「簽名」,故事講述喪妻嘅中年主角貝丹尼,因心臟病而被診斷為唔適合工作,惟有申請失業援助,但被勞工署多番刁難,最後更拒絕申請,全片集中描述佢點樣俾政府部門當人球咁踢來踢去。其實就係堅盧治另一名作《雙失十六歲》嘅中年/老人版,只係將年輕人對社會嘅迷茫,變成中年雙失嘅無奈。


一世求真
堅盧治拍電影,幾廿年嚟都只有一個宗旨──反映社會現況,從電影角度嚟睇,就係紀實電影,經常啟發自真人真事。《我》片亦然,佢同編劇保羅去朋友開設嘅慈善機構宿舍參觀,訪問過N位失業人士及就業機構員工,發現英國嘅就業及退休保障部門問題多多,唔止可提供職位數量不足,甚至削減救濟金,態度敷衍,如果援助者唔制就要接受「個人改善計劃」。堅盧治今次講嘅議題,同樣帶有強烈批判性,但故事唔係單純嘅case study,而係帶出英國窮人喺「市場經濟」下,即使再努力生活都只係垂死掙扎嘅實況。


棟篤笑演員擔正
雖然堅盧治貴為兩屆金棕櫚大導,但多年嚟少有起用A cast,反而經常起用新人、非資深演員甚至路人,今次佢就搵嚟首次參演電影嘅棟篤笑演員戴維莊斯擔正。多年來,無論係咩大作,堅盧治都要求主角必須具親和力,引起觀眾共鳴,唔需要有神級演技,只要真情流露。佢每次拍戲,通常會同選角總監一齊casting,當時透過電郵自薦,獲得面試機會嘅戴維透露,《我》片招募演員要求係擅長「即興」同「喜劇」演出,雖然開正佢嗰瓣,但第一次拍戲難免緊張,多得導演現場導戲先可以完成任務。


《我,不低頭》 上映日期:2月9日
PermaLink: https://articles.zkiz.com/?id=325731

Next Page

ZKIZ Archives @ 2019