異動空間：莫非真的賣盤了
1 :
GS(14)@2016-10-17 08:08:00人民幣中間價七連跌後終於企穩，帶動港股失守23200支持位後，出現技術後抽。點解係後抽？跌市成交800億元，反彈得600億元，仲要靠歐洲開市急升、油價重上50美元先推得郁，確係弱雞咗啲。美滙超強勢，聯滙下本港出口競爭力勢削弱，資產亦相對貴咗；人幣貶勢加劇，樂觀睇係北水加快南下，但富戶走資來港會買股、買樓定買保險？三者中相信磚頭仍較具吸引力。個人當後抽去睇，就應趁反彈減持大股，用少少錢博中細股更好，上周五香港國際建投（687）偷襲得手，單日飆升18%，有貨食糊與否任君選擇。今日睇睇隻王氏港建（532）。本月以來無消息下拾級而上，而炒細股無消息就係最好消息，因為憧憬無限大！此股每股NAV近2蚊，現價半價有找，長期大折讓下，老闆王忠桐於2006年及2007年曾兩提私有化，惟遭股東反對而告吹。近年老闆已多番向傳媒提及或會賣盤。去年2月，年逾70的王忠桐辭去CEO一職，而獨子王賢誌亦自己搞生意，似無意接班，故趁殼價高企放售可說順理成章。該股近日炒上成交漸增，絕非乾炒牛河，莫非已搵到處好人家？魏力
http://www.fb.com/2012jason本欄逢周一、五刊出
來源:
http://hk.apple.nextmedia.com/financeestate/art/20161017/19802759