| ||||||
二○一三年十月廿二日，一輛貨車駛經油麻地果欄，撞倒一名推著木頭車的運輸公司老闆，涉案司機踩油逃離現場，被撞老闆送院後證實不治。這是馮智聰永不能忘記的日子。 每一天，阿聰都要重複經過這裡。他是專營高檔生果的「進濤菓欄」老闆，本來他跟隨爸爸在果欄做苦力、跟車，去年七月自立門戶。新鋪剛開張，至親便離世，但他沒有太多時間悲傷，因為他還要照顧媽媽、妻子、三歲的女兒，即將出生的寶寶，以及爸爸遺下的車隊共十多個司機。流了一整天眼淚，他重拾心情：「地球不會因為我而停轉，咁多人要養，我點都要向前行！」 阿聰爸爸發生意外那天，他正身處四川尋找生果貨源。他憶述：「我收到消息，話阿爸出事好嚴重，已即時買候補機位返香港，但都係趕唔切見他最後一面。」阿聰自小跟爸爸在果欄做運輸，中五畢業後，索性落欄跟爸爸做苦力、跟車，一做便十五年。後來，為免運輸生意不佳，會令兩父子「一鑊熟」，便另立門戶，與兩個拍檔開進濤菓欄，開闢另一條財源。 現在每一天，阿聰都很忙，不是去了試貨睇辦，便是傾新店的供貨事宜，中間還得找時間和快臨盆的太太到柴灣檢查。難得擠出時間接受訪問，他的電話仍響個不停。「你快啲車咗啲貨去大圍先，嗰邊趕住要。」電話的另一端，是車隊司機。「每日凌晨兩點就要起身，打電話叫啲車做嘢，有時司機『射波』（即失約）要自己落場。」車隊是他幫爸爸打理的。兩盤生意在身，他忙到無得瞓：「好多時瞓兩個鐘，就有電話打嚟問我嘢，斷斷續續咁。有時真係頂唔順，要熄咗電話瞓耐啲。」那副深近視厚鏡眼鏡，也遮不住他那對熊貓眼。忙得快要崩潰，為的是麻醉傷口，「夠忙就無時間諗，咁就無得掛住（爸爸）。」他淡淡然地說。 開舖前狂交學費 阿聰跟著爸爸在果欄長大，他以往曾在其他果欄檔學做買手，邊搬搬抬抬邊偷師。「做運輸嗰時識落好多來攞貨嘅人，有把握會有五、六十個客喺手，先決定做。」他表示在果欄「偷師」三年，獲益良多：「唔喺欄做過，係唔會識。最基本，要有韌力喺幾百箱、幾萬個橙內揀爛嘅出嚟。又好似你想啲未熟嘅生果放耐啲，就要將佢哋同熟透嘅分開放，因為熟透生果會散發熱力，將啲生嘅逼熟！呢啲知識，先係最賺錢！」阿聰在開檔前亦交了不少學費。「原本預計去年五月開檔，喺果欄傾咗個舖位，業主話大家果欄兄弟，唔使簽約住啦！到我入曬貨準備開檔，佢先話唔租！貨就買曬，但水果唔擺得，俾人睇穿我無地方去貨，被迫賤價賣曬，蝕咗廿萬！」除了這一課，阿聰還因自己魯莽交了另一次學費。曾有客點名要四川檸檬，他查了來源地便衝了上去，「無打聽過，孭個背囊就上咗去，點知上到去爛地一塊，成地水蛇，嚇到買機票即日返落嚟。」 開舖初期低檔打個和 去年七月，進濤菓欄終正式開業。當時主要賣內地平價水果，但做極都只是打個和。「大陸水果毛利太低，有百分之七已經好好。問題係來貨質素唔穩定，啲貨嚟到質素差少少已要平賣，即係白做。」阿聰繼續分析內地水果市道：「內地市場太扭曲。供應商仲會跳過我哋，直接派貨俾零售，邊有得做？」頭兩個月白做，直至一天，有日本人上門找阿聰，指有一批日本貴價水果，問他有否興趣試賣。「嗰次有水蜜桃、巨峰提子。用咗三萬蚊入批水蜜桃，好快賣曬，埋單賺成八、九千蚊！」進濤菓欄立即轉型，轉賣貴價水果，批發零售兼做。除了改革貨源，阿聰及拍檔亦改變了營業時間，由原本的朝九晚八、凌晨再做批發，變成二十四小時營業。另一老闆、買手阿鋒說：「晚上啲客會揸車來、慢慢揀，比較捨得使錢，好易就一張單有幾千蚊。唔開舖，啲燈同雪櫃都要照開，條數喺番度。」其中一個員工、阿聰的三姑媽則說：「對面就係油麻地戲院，好多觀眾都會幫襯，所以夜晚好多客！」記者見晚上約十一時，剛看完戲的王先生便和家人花六百多元買了一箱富士蘋果，消費力相當高。 開舖九個月鬥快出貨 雙重改革下，進濤菓欄平均每月賺四萬元。現時進濤會賣哥倫比亞麒麟果、以色列蜜棗乾、及南非無花果等高檔生果，平均毛利兩成六。在果欄工作，要周旋於客人及同行外，還要和供應商打好關係。進濤的優勢在於能直接跟日本批發商取貨，「咁樣比起搵本地代理商入貨，平兩成。因為有水位，我哋有批發俾其他欄商。」其中一個供應商是日本人龍義典，採訪當日，他剛巧送一批日本士多啤梨給進濤，他以不鹹不淡的廣東話對記者說：「我哋喺香港都有鋪頭，同佢哋合作半年，賣嘅係日本九州嘅水果。」阿聰指，日本人做生意很小心，須觀察一段時間才建立合作關係。「日本人好怕你打破市場平衡，鬥平推低個零售價。我批貨都只俾信得過嘅欄商，以免佢哋亂劈價，因為日本人都睇住我點做。」由於和日本人關係良好，他可以盡快攞貨，食「第一浸錢」。「啲新奇生果主要做第一浸，之後去貨會慢，最後唔新鮮嘅仲要平價賣咗佢！」當然，他亦知日本人也會不停嘗試和其他人合作，「我份人好直腸直肚。同佢哋建立咗信任，都愈來愈多款俾我賣。」果欄競爭大，又龍蛇混雜，欄商間既是老街坊、又是互相供貨的行家及同行對手，記者感到阿聰的危機感較其他人重，去年十二月他已萌生「開多瓣」的念頭。「我想開多間鋪賣果汁、貴價果籃同日本雜貨。」新店未計入貨，他已投資五十萬裝修，醉心工作的他說：「呢間鋪仲裝咗個大雪房方便發展批發，保守估計，未來三、四年我都唔會有假放！」 未來日子向前行 工作令阿聰有安全感，去年十月的一個清晨，他父親在果欄搬貨時，遭一輛運魚車撞倒，涉案車輛事後不顧而去，在場工友見狀，即飛的死追，雙方追逐近四公里，貨車始被截停，但阿聰爸爸遭輾過重創，送院搶救終告不治。「人總有離開嘅一日，差別在點走。自知一定要向前行，做好件事。阿爸車隊有百幾個客，自己生意加打理車隊，真係心力交瘁。無得停o架！地球唔會為你停轉！」「日日對住阿爸出事嘅地方，但忙到無諗起佢。你諗嚇，一日接電話可以接到部電話無曬電，你仲邊有空間去諗？但當個人靜低，好似搭升降機、沖涼、臨瞓前，就會諗番起。」邊說邊執雪櫃的阿聰，頓一頓說：「所以我都幾享受咁忙，無得諗。」親人突然離世，總會留下遺憾。「阿爸一路都有教我做生意，遺憾係當生意行得順嘅時候，佢就唔喺度，無得一齊拍住上。」阿聰說服自己說：「可能佢覺得有工開已經好開心，又可能佢有得同個孫玩已好滿足，無咩遺憾呢！我真係唔知……。」 開業資料（7/13） 租金*$60,000裝修$20,000器材$400,000入貨$800,000總數$1,280,000*三按一上 營業資料（2/14） 營業額$470,000租金$15,000人工#$55,000入貨$350,000雜費$8,000利潤$42,000#三個全職，兩個兼職 | ||||||