ZKIZ Archives


【打牌治瘀傷?】衛詩雅三年冇工開畀唔出家用「好羞恥」

1 : GS(14)@2017-05-14 10:50:59

■3個仔女中,衛媽最錫詩雅,因為佢最貼心,不過有時都好激心。



32歲衛詩雅(Michelle)早前拍攝電影《失眠》演慰安婦,拍到成身瘀傷(新聞連結:http://bit.ly/2qq1CbY),當時佢唔敢話畀屋企人知,怕佢哋擔心,但紙點會包得住火吖,最後咪俾細心嘅衛媽媽發現,詩雅話:「我好唔開心都會見屋企人前先吸一啖氣,跟住入門口就笑。」對住呢種乜都自己孭晒上身所有嘢嘅女,衛媽有乜方法?衛媽話:「我有陣時會偷睇佢電話囉,哈哈!趁佢沖涼就睇佢有關工作上嘅事,因為佢乜都唔講囉!」



■詩雅話同媽媽關係似情侶。

■情侶到…成日互Check行蹤。

■打牌唔可以醫病,不過對衛家嚟講,喺麻雀枱上係一碗心靈雞湯。

衛媽除咗煲湯同幫詩雅執靚間房去支持個女,衛媽同一家人仲有殺手鐧:「支持佢咪我哋得閒打吓麻雀呀、玩吓大富翁!」佢哋仲同工作人員即場開枱打牌,即時生猛晒,詩雅又搞笑話媽媽呢幾年變晒、好情緒化:「唔知係咪更年期?!」而衛媽轉頭就話因為自己年紀大有啲情緒病喇。



■佢兩個仲會玩呢樣「竹簽」聯誼感情。

■詩雅(右)細細個對眼就好大好得意,同父母姐姐合照。(被訪者提供圖片)

■詩雅(右一)懂事開始就要做姊(左一)弟(左二手抱)中最強嗰個,希望可以照顧晒全家人。(被訪者提供圖片)

屋企有家姐同細佬嘅詩雅,由細就已經想做最強嗰個,指嘅係要分擔父母嘅責任,衛媽話:「三個仔女入面,佢都係最乖、好貼心。以前屋企最艱難時,佢就話要出去做嘢,嗰陣佢做一個鑽石Sales(銷售員)有幾多錢啫,佢都可以攞6千蚊返嚟,我哋嗰陣時真係靠嗰6千蚊生活。」詩雅之後慢慢學做珠寶批發,喺22、3歲嗰陣已經每月平均賺到大約4萬蚊,不過佢都選擇咗一份明知冇穩定收入嘅工作——演員。一入行雖然擔正劇集同電影,但點會咁順風順水吖,詩雅:「接近兩三年係冇電影拍,又冇乜任何工作,不過對我嚟講最難過係我冇錢畀屋企。我竟然我為咗追我嘅理想,我有幾個月竟然畀唔到錢佢哋,甚至乎要佢哋照顧番自己,覺得好羞恥。」



■阿女拍《失眠》受傷唔出聲,衛媽見到都心痛。(資料圖片)

■衛媽講到當年冇辦法供詩雅去外國讀書…佢哋都忍唔住…

■衛媽仲同詩雅講對唔住…

而衛媽又憶起詩雅中學時嘅難過事,就係供唔到詩雅去外國讀書:「我睇過佢個日記,佢每一頁,寫完佢嗰日嘅嘢就寫住『我好想去外國讀書』,當年我睇到嗰本日記嗰陣,眼淚係咁流、係咁流。」衛媽媽都忍唔住喊咗出嚟,「我覺得我好揼心,點解周邊嘅朋友啲仔女話去外國讀書,可以去到嘅?!但點解我唔可以呢,我當時唔知點樣去面對,所以好對唔住!」呢個時候傍邊嘅詩雅邊喊邊安慰媽媽。媽媽嘅心願只想一家人,尤其三個子女平安健康快樂,而詩雅話:「媽咪,我知道我嘅脾氣唔係好好,有陣時可能會唔小心講咗啲難聽嘅說話,同埋你成日都好就我,我知道嘅。如果有下一世,我做你媽咪,我照顧番你!」服裝:Michael Kors場地:Our Place採訪:懷鈺攝錄:馮峰、Neo




來源: http://hk.apple.nextmedia.com/entertainment/art/20170514/20020430
PermaLink: https://articles.zkiz.com/?id=332972

Next Page

ZKIZ Archives @ 2019