ZKIZ Archives


港產馬袋韓國發威

2013-06-06  NM
 
 

 

韓國品牌﹑韓星在中港等地掀起熱潮,擁有不少香港粉絲的淘寶網,充斥大量打着韓國旗號的產品,其中有款馬仔手袋,因受韓星追捧,一度打入熱賣榜頭十位。網上湧現大量仿製品,但這個手袋,卻是如假包換的香港設計。做排版設計出身的劉志明(Joe),○五年「撈過界」,創辦手袋品牌Cupcake,以馬為標誌,獲韓國公司睇中,帶入韓國市場,找來當紅組合Miss A的成員任代言人,成功掀起熱潮,再「食住個勢」,進駐內地及新加坡。一切得來不易,Joe創業初期曾蝕到「一頸血」,負債二百萬,直至手袋廠家郭雄高(Stephen)入股,品牌才得以重生。二人拍住上,去年賣出二十四萬個手袋,生意額超過七千萬。Joe興奮道﹕「依家韓國多咗唔同主題手袋,例如貓﹑狗,我哋可以話改變咗韓國手袋設計嘅生態。」

任職市場部的Queenie剛從韓國網店訂了一個粉綠色的Cupcake馬仔袋,她興奮地推介﹕「我好鍾意睇韓劇,見過有女主角用呢個牌子嘅袋,覺得設計好特別,好多detail位,千幾蚊一個,好抵用。」Cupcake手袋由Joe與Stephen合資的公司伊迪奧卡,負責設計和生產,再於韓國零售代理商旗下店鋪Lapalette出售。韓國代理落重本做宣傳,除了在韓劇如《大話男女》、《最佳愛情》等植入廣告,韓星如裴秀智、朴秀珍及崔江熙亦是馬袋「客仔」,更請來當紅組合miss A做代言人,令手袋在韓國一炮而紅。現於韓國有二十二間分店,內地則有四十九間,另設有網店。「個袋好賣得,舊年產量比前年多咗一倍。」Stephen笑說。身旁的Joe補充:「早前發現我哋嘅袋登上淘寶十大暢銷商品榜,買返來一睇,係仿製品。」每天一早,Joe和Stephen都由香港開車去深圳平湖的工廠,傍晚才回港。火炭的辦公室,只處理訂單及會計工作,Stephen解釋﹕「所有訂單都以美元結算,內地稅高,仲有外匯管制,啲錢入咗去,我點攞得番? 」

工人好憎我

來到工廠門口,攝影師舉機拍攝外貌,Stephen緊張地阻止:「唔好出工廠名或外貌﹗內地部門知道間廠賺錢,就會來搞我哋,查吓呢樣嗰樣,雖然我哋依足法例,但都費事煩啦。」四層高的廠房,劃分為皮料庫﹑生產間﹑板房等,還有員工宿舍及飯堂。「繁忙時有一百五十個工人。」Stephen帶路來到生產間,工人正埋頭車袋,桌上布滿細件。Cupcake大部分手袋都是人造皮,招牌馬袋上的馬形圖案,由不同的皮料拼湊縫製而成,「一個袋嘅工序可以細分至二百至四百個。」Joe表示,細節正是Cupcake手袋的特色。為此,Stephen要重整生產線,他解釋﹕「以前做出口時,一個月做一萬個袋,會一次過做晒個袋嘅散件,月尾先嵌埋一齊。但馬袋設計複雜,試過最後先發現有問題,要成批貨再做過。依家每個手袋的工序都會喺一日內完成,即係每日都有製成品見到。」Joe聽後即打趣道﹕「啲工人好憎見到我,因為我設計到個袋好複雜,做死人。不過,亦令翻版貨無咁易抄到。」用馬做標誌,Joe笑言只是「誤打誤撞」,「試過熊、長頸鹿﹑豹,最後隻馬跑出。」

少女味攻韓

其實Joe只是半途出家,他原從事印刷品設計生意,亦是印刷公司的股東。後來,印刷數碼化,Joe發現生意難做,便與朋友合股做手袋,但做落先知中伏。「啲款式太複離,好多蕾絲,又要真皮、真絲,成本好貴,根本無錢賺。」一年後,拍檔退股,Joe「硬着頭皮」做下去,因他覺得中價手袋有市場﹕「市場嘅手袋,一係好貴嘅名牌袋,一係太大眾化,設計較簡單,Cupcake嘅定位,剛好食正呢個缺口。」第一件事,便是重新設計手袋,「以前嘅款係有特色,但太女性化。」另外,改用人造皮,Joe解釋﹕「我希望用細節同特色吸引年輕嘅顧客,如果用真皮,無可能賣千幾蚊,而啲客又唔會用幾千蚊買個無牌子嘅袋,無代理商會有興趣。」每年,Joe都參加在香港舉行的亞洲皮革展,果然吸引到不少代理商上門,包括韓國品牌代理商Beaucrea。「佢哋先買咗五十個,放喺網購平台上賣,十五分鐘便售罄。」Joe回憶時仍難掩興奮。後來,Beaucrea不但加單,更成為Cupcake的零售代理,並開設手袋店Lapalette,主要出售Cupcake手袋。記者找到Beaucrea內地分公司的董事長韓恩淑,她指公司睇中的正是Cupcake的少女味﹕「韓國的手袋一般顏色較沉,設計較簡單,Cupcake手袋以粉色為主,手工精細,好有新鮮感。」

絕處遇貴人

手袋的設計成功得到韓國公司青睞,但Joe指當時如果沒有Stephen幫助,根本接不起這單生意。○九年,韓國公司找上門時,Joe的手袋負債逾二百萬。「公司細又無人脈,搵內地嘅小型加工廠做,要買晒原料俾佢,有時連衣車都要幫佢搵埋,因為單細,啲廠仲要收晒錢先肯做。」當時,公司雖有歐美及日本的訂單「吊命」,但成本貴,根本入不敷支,他乾笑了兩聲,續說:「捱咗三年,無出糧,每個月就靠張信用卡,還最低還款額去生活。」同年,Joe在朋友介紹下認識Stephen,公司才一洗霉氣。原來,做了二十多年手袋出口生意的Stephen,亦面臨歐美訂單減少的問題,「○七年後,生意跌咗六成,毛利愈來愈低。」Stephen看過Joe的設計後,覺得正是轉型做品牌的好時機,於是主動拉攏Joe合作。Joe重複當年與拍檔的對話﹕「我話﹕『我欠人二百萬債喎,係咪你幫我孭?』點知佢傻更更話好。」Stephen聽後亦笑了﹕「當時有一半係抱住賭博嘅心態o架,真係衰咗嘅,咪執咗間廠,提早退休。」有了Stephen的手袋廠和資金做後盾,Cupcake正式與韓國公司洽談代理,找到穩定的銷售點。Joe終於迎來事業第二個春天,現在每月都要往韓國開會,「去同韓國代理商傾新設計,聽吓店長嘅前線意見。」經常要深、港﹑韓國三地跑,六呎二吋高的Joe突然腼腆道﹕「忙到搵唔到女朋友,佢哋成日講笑叫我多啲落去工廠睇吓,隨時幫到某個女工改善生活,哈哈,呢啲嘢隨緣啦。」


PermaLink: https://articles.zkiz.com/?id=56969

Next Page

ZKIZ Archives @ 2019