【金像獎專題】為港產片點一盞燈阿Sa爭影后本土起義
1 :
GS(14)@2015-04-17 09:07:26【第34屆香港電影金像獎之女主角篇】第34屆香港電影金像獎後日揭曉，最受矚目的是多少帶有本土意識的影后之爭，跑出了憑港產片《雛妓》爭影后的蔡卓妍（阿Sa），力撼以《親愛的》奪得電影評論學會影后殊榮的趙薇。本報早前走訪了影圈人士以及街坊意見，撐阿Sa的佔大多數，阿Sa感謝各方好友支持，不過趙薇論演技冇得輸，她早前接受本報專訪時笑指可以賭贏今次影后寶座。撰文：余燕儀爆粗不是演技，但能夠衝破固有形象投入到角色之中，就是演技！撇除阿Sa在《雛妓》那句「我有俾你X㗎！」以及床戲演出，她今番獲提名香港電影金像獎最佳女主角，靠的還是那超越自己的演出。不過，若論層次，阿Sa早已被認定是越級挑戰《親愛的》女主角趙薇，問阿Sa覺得自己贏面有幾大？她坦言：「講真唔係好夠膽諗，哈哈哈，唔係對自己冇信心，我對套戲都好有信心，去到呢刻咁多朋友前輩同行畀好多鼓勵我，已經好夠，好多年冇試過呢啲讚賞。」
■《雛妓》題材大膽，令人印象深刻。劇照
「入到圍好叻豬」
為了知己知彼，阿Sa入圍後有睇其他候選影后的電影，她說：「我覺得趙薇《親愛的》真係好賺人熱淚，自己差唔多由頭喊到落尾。其實個個演員都好有實力，我都好鍾意《撒嬌女人最好命》，仲有君如姐同湯唯，今次係五個好唔同角色，我覺得入到圍好叻豬，就算唔適合今屆評審口味，唔代表作品唔好。」《雛妓》和《金雞sss》都是本土電影，身為香港演員的阿Sa是否較着數？她說：「唔好諗住本土就有優勢，都係嗰句，無論邊個演員攞都開心，攞唔到唔代表你唔好。我私心梗係想君如姐，君如姐成日畀意見我，佢真係好好，例如教我做演員要犧牲，以前我覺得犧牲係控制產量，你唔鍾意接嘅唔好接，貴精不貴多，但近年先知咁唔叫犧牲，犧牲係有啲你鍾意嘅都推。」
「太沉重有壓抑」
因為在《雛妓》的角色太沉重，既經歷過被後父強姦，又與任達華肉體交易，拍攝時阿Sa的情緒起伏很大：「拍呢部戲太過長時間壓抑情緒，每日拍十幾個鐘，返屋企瞓幾個鐘，再去開工又十幾個鐘，基本上冇乜時間返去現實世界，加上當時我隻狗又過身，雙重打擊！3月19號我好記得，舊年呢日我拍緊《雛妓》，我隻狗過身嗰日，我拍成套戲第一場戲，畀後父侵犯嗰場戲，導演畀我休息咗半日，本來導演話呢日唔拍，但其他演員又嚟晒，我覺得情緒啱啱好，所以完成咗。」阿Sa最滿意是跟任達華最後見面的一場戲：「成套戲自己諗得最多係呢一場，開拍前已經諗咗好耐，到正式拍攝時我都好滿意。」至於被華哥揸胸，她笑說：「有打底嘅，佢都係摸個pad啫，就正如我都係摸佢個pad，哈哈哈，拍戲啫。」如果阿Sa真的封后，她想多謝哪三個人？阿Sa想了一想說：「我諗三組人，第一組父母，多謝佢哋一直支持我，第二組係台前幕後工作人員，特別係導演同華哥，佢哋幫助我好多嘅，第三組係我老闆、經理人Mani、所有朋友，全靠佢哋一直支持我。」
來源:
http://hk.apple.nextmedia.com/entertainment/art/20150417/19115189
【港人在韓】粗豪導遊整蛋糕 最難忘：頂！港產片講國語
1 :
GS(14)@2017-02-07 05:15:58River因為做導遊而定居韓國二十年，佢話十年前韓國上映《少林足球》，終於有套講廣東話嘅戲令佢好興奮，點知原來講國語，都忍唔住講句：「頂！」
【尋找首爾的香港】「頂！《少林足球》講國語！」住咗喺韓國近二十年嘅River講返十年前喺當地睇《少林足球》非常激動，「十年前，諗住終於有得睇講廣東話嘅戲，點知原來講普通話，臨尾真係想界刂爛凳呀！」說話粗魯、外表粗豪嘅River，前身係一位導遊，誰不知竟然為興趣裸辭，轉行做細心嘅烘焙師，透過網上平台賣自家製蛋糕！River講嘢相當直接，自嘲自己唔係生得靚，又唔係溫柔體貼，「當一個咁粗魯嘅人，畀件咁溫柔嘅蛋糕人哋嗰陣，佢哋就會諗：『嘩！係咪你整o架？堅定流呀？』」
說話粗魯、外表粗豪嘅River，原來係一位細心嘅烘焙師。
呢啲蛋糕全部出自River雙手。
為咗唔好食死啲朋友，所有蛋糕少糖、天然，唔落防腐劑。
採訪當日，記者見證River親手整出鬆軟嘅柚子蛋糕，枱上亦放滿佢一早整好嘅朱古力、紫薯小蛋糕，非常精緻。River話當朋友見佢整蛋糕都會話：「頂！點解你咁闊太嘅整蛋糕！」River就解釋背後其實花咗好多功夫、時間同金錢，「為咗研發無防腐劑嘅柚子蛋糕，我整咗100個先成功！」故事要講返River做導遊嘅日子，當時帶完團可以休息兩三日，咁啱好朋友送咗一箱柚子畀佢，食唔晒，就試下用嚟整蛋糕，結果出奇地夾。身邊嘅朋友開始成為River研究蛋糕嘅白老鼠，「為咗唔想食死啲朋友，我研究到唔落防腐劑，用新鮮食材，但係賣出去要考慮保存問題，於是試真空包裝。」
兩年前，River決定唔做導遊，全職整餅，靠網上平台接訂單。
生意初起步，接單、整餅、包裝、送貨、宣傳等River一手包辦。
當時日日做足21粒鐘，客源又未穩定，難捱嘅日子好彩有朋友同屋企人支持。
當整蛋糕整到十個朋友十個like，River兩年前決心裸辭，咬積蓄，搏一舖！正所謂萬事起頭難，初初得River一個人，接單、整餅、包裝、送貨、宣傳等一手包辦，加上未有足夠客源，喺體力和資金上都非常難捱。River坦言有掙扎過想放棄，「當頂完一陣積蓄之後，就要諗繼唔繼續呢，如果返去帶團，頂！好悶呀！同條鹹魚無分別！」好在得朋友撐住，「佢哋話試吓啦，最多你無飯食，我請你食飯，你無錢睇戲，我請你睇戲，一路捱到唔得嗰日為止！」River講到呢度，都忍唔住喊出嚟。
買工具、材料等，成本100萬港元，做咗九個月返本。
River仲考咗咖啡師牌，沖得一手靚咖啡。
River咬緊牙關四個月，每日做足21個鐘，先開始有錢賺，請到第一個員工。慢慢開始有回頭客，就租餅房，River話因為自己係外國人，喺韓國搵餅房都唔容易，「業主唔知我呢個外國人租地方嚟做啲乜，就算解釋咗都唔信，咁我咪敲兩次門、敲三次門、打多幾個電話，講到人哋怕咗我囉！」River仲話o依家同業主熟咗，有得減吓租添！目前，River嘅蛋糕生意已經上軌道，請咗五個員工，有餐廳、酒店、cafe shop等向佢訂蛋糕，客源亦有唔少香港人，River就將蛋糕空運回港。計下數，呢門蛋糕生意成本約一億五千萬韓圜，約100萬港元，九個月已經回本，未來打算物色店舖開蛋糕店。
River話深信如果當日無去韓國，留喺香港嘅話，今日就唔會有自己嘅生意，「首先唔好計搵錢先，做人要新鮮啲，要喺未死之前做自己開心嘅嘢。」就係韓國呢個地方畀到空間River搵自己嘅興趣，有機會令興趣變成事業，「我覺得定居韓國係無揀錯！」
Mephistopheles Le Pastries
https://www.facebook.com/mephistopheleslepastries/?fref=ts記者：鄒倩婷（阿仙）攝影：陳家文、李錦鏵剪接：Roy_theme_kdrama,_kstar_hkinseoul,_mt_娛樂,_mt_韓流
來源:
http://hk.apple.nextmedia.com/entertainment/art/20170207/19920226
拍港產片好緊張波多野、盤菜瑩子做飯友
1 :
GS(14)@2017-04-08 19:39:58日本AV女優波多野結衣以「暗黑林志玲」封號走紅大中華，她到台灣吸金之後，前日已轉飛到香港，她透露今次再訪港是為電影拍攝，前晚她便公開了與毛記主播盤菜瑩子合照，兩位靚女見面短短時間相當好傾，盤菜還約定她下次來港見面。
■盤菜瑩子（左）有幸見波多野，但她否認兩人有機會合作。
■波多野上載雲吞麵照，並指香港行食不停。
因廣東話NG
除了拍攝愛情動作片，波多野早已試過拍攝台灣片《沙西米》衝出日本成大銀幕女主角，今次她為拍電影重臨香港，並透露對手有本地著名演員及歌手，雖然暫未知電影陣容，已令不少網民及粉絲對女神接拍的首套港產片相當期待。前日，波多野投入電影拍攝，她即於twitter留言表示因為要說廣東話對白，正式埋位時緊張得NG了兩次，幸好拍檔很友善，令她大為感動。
食不停呻要減磅
之後，波多野公開了與盤菜瑩子的合照，形容對方是首個香港認識到的朋友，而盤菜亦有在facebook留言，指雖然見面時間短暫，好開心能與波多野傾偈，還約定波多野下次來港一齊飲嘢與唱卡拉OK。盤菜能與波多野見面又合照，莫非是因新片有機會合作？對此盤菜表示：「其實因為電影公司工作人員知道我識日文，所以邀請我一齊食餐飯。無合作，純粹食餐飯。」波多野昨日繼續大嘆香港美食，上載了食雲吞麵的照片。貴為AV界紅人的波多野，任何時候體形均要保持最佳狀態，但她留言指每逢到海外工作便食不停，即使已飽肚仍然繼續要食，看來要運動減磅。撰文：程芬
來源:
http://hk.apple.nextmedia.com/entertainment/art/20170407/19982051