【馮仁昭四圍超】四場同一個喊位被質疑薛凱琪真眼淚
1 :
GS(14)@2017-04-12 22:42:37■薛凱琪以舞台劇方式做演唱會，攰過比平時喺紅館開騷。
薛凱琪（Fiona）一連四場演唱會，前晚喺旺角麥花臣舉行尾場，佢繼續做喊包，仲喺台上分享今次個騷其中一個主題係快樂，佢話：「快樂唔使搵，常陪你左右。上天對我好好，畀好多嘢我，只要肯去搵同相信，唔好怕付出，唔好問回報。雖然呢個場唔係紅館，但你哋千幾位都好重要，希望有一日唔係靠我嘅愛畀你哋能量，而係你哋學識將愛去分享畀其他人，多謝你哋畀機會我去愛你哋。」
■前晚尾場騷，薛凱琪繼續做喊包。
■薛凱琪同歌迷分享愛，仲齊齊跳舞。
分享快樂
臨完場前，Fiona再話：「何為快樂？多諗別人，少諗自己就會快樂，送最後一首歌《慕容雪》。」不過佢唱咗幾句就嗌停，喊住問可唔可以再嚟過：「今晚最後一場最後一首歌，想唱好啲。」
Fiona完騷後受訪，佢笑話：「好難相信唱呢個騷會攰過紅館四、五倍，可能今次用舞台劇方式去做，一個人獨腳戲去包裝音樂，其實冇人做過，有一定危險，而且我有一段時間冇plug新歌。」講到唱《字花》已經喊，Fiona話首歌係抑鬱症康復之後寫，好想自己能夠放低，亦想話畀大家聽，就算幾黑暗都好，每個人都可以企番起身。問到佢不停提住大家去感受愛，但每一場都係同一個位喊？佢話都有粉絲問過呢個問題，分唔到究竟係演戲定真實，佢強調係真感情：「因為情感投入，所以每晚都心力交瘁。撰文：馮仁昭」
來源:
http://hk.apple.nextmedia.com/entertainment/art/20170411/19986175